1 Ndin Yetro, aku Midian, ete anwaan Moses amaakop abaña afịd ñkpọ se Abasi akenam anọ Moses ye ikọd amọ Isrel, ye naña Abọọñ akekoono ammọ asio ke Iyib.

2 Ke Moses amaakenọ anwaan amọ Sipora nọ aka ukañ ammọ, ete anwaan amọ Yetro amaabọ anye 3 ye nditọ ideen amọ iba. Ayịn keed akekere Kesọm,* sia Moses amaabo, "Ami mmekappa ndo asenawo ke asenidịd"; 4 ayịn anye ako akekere Eliesa,* sia anye amaabo, "Abasi ete mmi akedo andiñnwam miin; anye amañnyaaña miin asio ke akañkañ Fero."

5 Ete anwaan Moses, Yetro, amaasaña keed ye nditọ ideen Moses ye anwaan Moses abịne Moses ke anaan, ke itie a-anye akebaaha akpere abod Abasi. 6 Yetro amaadọñ utom anọ Moses ate, "Ami, ete anwaan mfo Yetro, nsʌk ndi ye anwaan mfo ye nditọ ideen amọ iba."

7 Moses amaawuọ akesoobo ye ete anwaan amọ, asuuk iwuod ke isọñ anyʌñ atʌm anye inua. Ke ammọ emaedukọmmọ emọ-emọ, emaeboiyo edʌk esịd atayad. 8 Moses amaadọkkọ ete anwaan amọ afịd se Abọọñ akenam Fero ye mbon Iyib ke ntak Isrel ye ufen se ammọ ekekịt ke usʌñ, ye naña Abọọñ akenyaaña ammọ.

9 Esịd amaadat Yetro adikop mbaña afịd nti ñkpọ se Abọọñ akenam anọ Isrel ke anye adikifak ammọ nsio ke ubọk mbon Iyib. 10 Ndin Yetro amaabo, "Itooro anie Abọọñ, a-akufakka fiin asio ke ubọk nditọ Iyib ye Fero, a-akenyʌññọ afak nditọ Isrel asio ke ubọk mbon Iyib. 11 Ami mmediọọñọ idahami ke Abọọñ akpon akan afịd mme abasi mfen, sia anye akenam ami ye mbon se ikifʌnnọ Isrel ye ntañidem." 12 Ndin Yetro, ete anwaan Moses, amaanam ufọfọb uwa ye mme uwa mfen anọ Abasi, ndin Erọn ñko amaadi ye afịd ñkpisọñ Isrel edidia ndidia ye ete anwaan Moses ke iso Abasi.

13 Ayio akesiere, Moses amaadọọk ñkpọitie amọ atie nte abiideikpe nnọọ nditọ Isrel, ammọ emaenyʌñ eda ekanna anye ekʌk tọọñọ ke ubakusen tutu ndubiayio. 14 Ke ete anwaan amọ amaakekịt afịd se Moses akenam anọ ikọd amọ, anye amaabo ate, "Nsoo ke afo anam ami ye mbon mfo? Nsoo ido nọ afo atie ikpọọñ nte abiideikpe, ado afịd mbon awo edada ukanna ekʌk tọọñọ ke ubakusen tutu ndubiayio?"

15 Moses amaabọọrọ anye ate, "Sia mme awo esidi embịne miin ediyem uduak Abasi. 16 Ini akeedodo a-ammọ enieghe mfịna, esiben ensọk miin, ndin ami mbiere ke ufọọd ammọ ñnyʌñ ndọkkọ ammọ mbaña ewʌhọ ye mme item Abasi."

17 Ete anwaan Moses amaabọọrọ ate, "Se afo anam ifọnnọ. 18 Afo ye mbon se idi ubịne fiin eyaekpañña mba. Utom ami adoppo abọhọ unọ fiin; ndin afo uduukanna unam anye ikpọọñ. 19 Kpañ utọñ nnọ miin idahami, ndin ami ñyaunọ item; yak Abasi ñko aba ye afo. Ana afo ada ke itie ibon ami ke iso Abasi, anyʌñ aben mfịna ammọ asọk anye. 20 Kpeep ammọ mme ewʌhọ ye item Abasi, nyʌñ temme ammọ usʌñ eduuwem ye naña ammọ ana esaña. 21 Ado mek mbon nti iwuod sio ke atu afịd ami, ideen se ibaak Abasi, ideen se inam akpanikọ, e-esuaha idiọọk udod, nyʌñ sio ammọ nte mme ñkpisọñ ke atu mme tọsịn, ke mme ikie, ke mme aba mme duob, ye ke mme duob. 22 Yak ammọ enam utom nte mme akpe ikpe nnọọ Isrel afịd ini, ado yak ammọ ekoono ikpe se inekke isọñ usọk fiin; ado ammọ ekeme adibiide ntək ikpe. Ado ayaanam utom mfo ayakka, sia ammọ ediiwawana inam utom ye afo. 23 Adieke afo anamma ami naña Abasi anọ uyio, afo ayaakan anam utom nọ akpeene; ndin afịd mbon awo ami eyaenyọñọ ye uyʌkkọ."

24 Moses amaakpañ utọñ anọ ete anwaan amọ anyʌñ anam afịd se anye aketañ. 25 Anye amaamek mme akobidem ideen ato afịd Isrel, anyʌñ anịm ammọ nte mme etubom, mme adaiso ke atu mme tọsịn, ke mme ikie, ke aba mme duob ye ke mme duob. 26 Ammọ emaenam utom nte mme abiideikpe enọ mme awo afịd ini. Ammọ emaenyʌñ ekoono ñkpoon ikpe esọk Moses, enyʌñ ekpe ntək ikpe ke idem ammọ.

27 Ndin Moses amaasio ete anwaan amọ unyọñ, ndin Yetro amaatịmme anyọñ idịd ammọ.