1 Akema Abọọñ amaabo Moses ate, "Ami mmunam fiin aba nte Abasi anọ Fero, ndin ayịneka mfo Erọn ayaado prọfed mfo. 2 Ana afo atañ afịdñkpọ se ami unọọ uyio mbo atañ, ndin ayịneka mfo Erọn ana adọkkọ Fero abo ayaak nditọ Isrel ekpọñ idịd amọ. 3 Ado ami ñyaasọñ Fero esịd, ndin akpesʌkado a-ami ndiinam mme idiọọñọ ye utịppeñkpọ mmi ewak ke Iyib, 4 Fero idiikpañña utọñ unọ fiin. Ndin ami ñyaadot ubọk mmi ke Iyib, ñyaanyʌñ ñkama mme ñkpoon ufen ndʌt ikpeghe ubon mmi nsio, ikọd mmi, mbon Isrel. 5 Nditọ Iyib eyaediọọñọ ke ami ndo Abọọñ ke ini ami mmaanyan ubọk mmi ndot ke Iyib ñnyʌñ mben nditọ Isrel nsio do."

6 Moses ye Erọn emaenam kpa naña Abọọñ akenọọ ammọ uyio. 7 Moses akedo isua anaañ, ndin Erọn ado isua anaañ mme ita ke ini ammọ eketañña ikọ enọ Fero.

8 Abọọñ amaadọkkọ Moses ye Erọn ate, 9 "Fero amaibo ndufo, ‘Inam utịppeñkpọ,’ afo bo Erọn ate, ‘Ben esañ mfo top nịm ke isọñ ke iso Fero,’ ndin ayaakappa udʌkikọd."

10 Ndin Moses ye Erọn emaekaa ebịne Fero enyʌñ ekenam kpa naña Abọọñ aketemme ammọ. Erọn amaatop esañ amọ anịm ke isọñ ke isọ Fero ye mme ñkpisọñ mbon utom amọ, ndin esañ amaakappa udʌkikọd. 11 Fero amaanyʌñ adọñ ekoot mbon aniọñ ye mbon useñkpọ, ndin mbon mmayịk Iyib emaenyʌñ enañña ukem ñkpọ ado ato ndịbe idiọñ ammọ: 12 Ammọ keedekeed emaetop esañ ammọ enịm ke isọñ, ndin emaekappa udʌkikọd. Ado esañ Erọn amaakoono esañ ammọ amen. 13 Kpa ye ado esịd Fero akesʌk asọsọñ, ndin anye ikiikpañña utọñ inọ ammọ, kpa naña Abọọñ aketañ.

14 Akema Abọọñ amaabo Moses ate, "Esịd Fero asʌk asọsọñ; anye a-asịn adiyaak nditọ Isrel enyọñọ. 15 Kaa bịne Fero ubakusen ke ini anye awuọhọ aka inyañ. Soobo anye ke mben Inyañ Nail, nyʌñ ben esañ a-akekappake udʌkikọd do kama ke ubọk mfo. 16 Ndin dọkkọ anye bo, ‘Abọọñ, Abasi nditọ Hibru, andọñ miin abo ndudọkkọ fiin: Yaak ikọd mmi enyọñọ, nọ ammọ ekeñkpono miin ke anaan. Ado tutu ami afo ukpañña utọñ. 17 Se Abọọñ atañ ado ami: Ayaato ke ami afo ayaadiọọñọ ke ami ndo Abọọñ. Ami ñyaakama esañ a-asịneke ke ubọk mmi ñyʌppọ mmọọñ Nail, ndin anye ayaakappa iyiib. 18 Mme iyak ke mmọọñ Nail eyaekpañña, inyañ ado ayaanyʌñ atebe; mbon Iyib idiikanna inwọñ mmọọñ amọ aba.’ "

19 Abọọñ amaabo Moses ate, "Dọkkọ Erọn, ‘Ben esañ mfo nyʌñ sio ubọk mfo nyan ke mmọọñ isọñ Iyib, ke anyọñ mme idịm ye mme akpaubom, ke anyọñ mme ibiok ye afịd udiọhọ mmọọñ ndin ammọ eyaekappa iyiib.’ Iyiib ayaayọhọ afịd itie ke isọñ Iyib, kpa ke mme ekamba udọññkpọ ake eto ye itiad."

20 Moses ye Erọn emaenam kpa naña Abọọñ akenọọ ammọ uyio. Anye amaadịppe esañ amọ ke iso Fero, ye mme ñkpisọñ mbon utom amọ, anyʌñ amia mmọọñ Nail, ndin afịd mmọọñ amaakappa ado iyiib. 21 Iyak ke Nail emaekpañña, ñko mmọọñ ado amaatebe adiọọk tutu nditọ Iyib ikikanna inwọñ anye aba. Iyiib amaayọhọ afịd itie ke Iyib.

22 Ado mbon unam mmayịk ke Iyib emaekama idiọñ ammọ enyʌñ enam mme ukem ñkpọ ado, ndin esịd Fero amaasọñ; anam anye ikikamma ikpañ utọñ nọọ Moses ye Erọn, kpa naña Abọọñ aketañ. 23 Utu ke ado, Fero amaakanna iso anyọñ ufọkubọọñ amọ, inyʌññọ isesịn akikere amọ do. 24 Ndin afịd mbon Iyib emaedọk isọñ ekanna Inyañ Nail eyem mmọọñ se enwọñ, sia ammọ ikikanna inwọñ mmọọñ a-aketooho inyañ ado.

25 Usen itiaba emaeboiyo tọọñọ Abọọñ akenam mmọọñ Nail akappa iyiib.