1 Abọọñ amaabo Moses ate, "Kpịkke itiadñwed iba naña akenam akpa, ndin ami ñyaawet ke mme itiadñwed ado mme ikọ se ñkewet ke mme akpa itiadñwed a-afo akebommo. 2 Beeñe idem ubakusen, nyʌñ dọọk di Abod Sainai. Ben idem mfo diñwọt miin ke anyọñ ekamba abod. 3 Inaaha awo ndomokeed asaña ye afo adi, me aba akpere anyọñ abod; ukpọk udịmedọñ, me udịmenañ inaaha edi uta mbid ke iso ekamba abod ado."

4 Ndin Moses amaakap itiadñwed iba nte akpa itiad, anyʌñ adakka akaa Abod Sainai ke ñkịmñnwaña ubakusen, naña Abọọñ aketemme anye. Anye amaanyʌñ akama itiad ñwed iba ado ke ubọk amọ. 5 Ndin Abọọñ Abasi amaasọiyọ ke ntọñanyọñ adida ye anye anyʌñ atommo anyịñ amọ, Abọọñ. 6 Ndin anye amaaboiyo ke iso Moses, atommo ate, "Abọọñ, Abọọñ, Abasi mbọm ye mfọn, isọppọ iyadesịd, ayọhọ ye ima ye akpanikọ, 7 a-awọttọ tọsịn emana ima amọ, anyʌñ afeen ibak, afai ye idiọọkñkpọ. Ado anye itreke adimia awo ufen ke ndudue amọ; anye amia nditọ ye nditọnditọ ufen ke idiọọkñkpọ mme ete ammọ, tutu asịm ayọhọ emana ita ye inaañ."

8 Moses amaaduọ ke isọñ ini keed anyʌñ akpono Abasi. 9 Anye amaabo, "Abọọñ," "adieke adooho ami mmekịt mfọn ke iso mfo, yak Abọọñ asaña ye ñnyịn. Akpesʌkado idịd ami edooho mbon esọññọ aboditọñ, feen mme ibak ye idiọọkñkpọ ñnyịn, nyʌñ dat ñnyịn nte udeeme mfo."

10 Ndin Abọọñ amaabo: "Ami ñyaanam edioomo ye afo. Ke iso afịd ikọd mfo ami ñyaanam utịppeñkpọ a-adooho kpaanam awo inamma ke idịd ndomokeed ke afịd ederimbod. Mbon se afo adʌñ ke atu ammọ eyaekịt ñkpọ ñkpaidem se Ami Abọọñ, ndiinam unọ fiin. 11 Nekke kpeme se ami utemme fiin mfịn ami. Ñyaabịn mbon Amọọ, mbon Kenan, mbon Hed, mbon Peris, Hif ye mbon Yebus nsio ke iso mfo. 12 Kpeme mbaak ndufo idinam edioomo ye mbon e-edʌñọke ke isọñ a-ndufo ekaaha, mbaak adikappa ado afia inọ ndufo. 13 Bom mme akpokoro uwa ammọ, bom ndisana itiad ammọ, nyʌñ kpịkke mme abai Asera ammọ nịm ke isọñ. 14 Kuukpono abasi mfen, sia Abọọñ, a-anyịñ amọ adooho Ufịb, ado Abasi ufịb.

15 "Ikpeme mbaak ndufo idinam edioomo ye mbon e-edʌñọke ke isọñ a-ndufo ekaaha; sia ammọ emaenam akpara ye mme abasi ammọ, enyʌñ enam uwa enọ ammọ, ammọ eyaikoot ndufo, ndin ndufo eyaedia mme uwa ammọ. 16 Ndin ndufo imaidat usʌk nditọ ibaan ammọ inọ nditọ ideen ndufo ke ndọ, ndin nditọ ibaan ado ekenam akpara ye mme abasi ammọ, ammọ eyaenam nditọ ideen ndufo ekeene enam ntoro.

17 "Ikiinam ubobodñkpọ ndomokeed.

18 "Inam usọrọ Uyo a-yiis imiisịneke. Ke usen itiaba ana eta uyo a-yiis imiisịnneke, naña ami ñkitemme ndufo. Inam ami ke uyọhọ ini ke afiọñ Afif, sia ke afiọñ ado ke ndufo ekewuọñọ ke isọñ Iyib.

19 "Afịd akpa mfịdidịb ado ake mmi, tutu asịm afịd akpa nditọ ufene se ido ñyaara, ñkọm ado udịmenañ me udịmedọñ. 20 Idat ñyịn edọñ ifakka akpa ñyịn dọñki, ado ndufo imiifakkake anye, ibuuñ itọñ amọ. Ifak afịd akpa ayịn awodeen ndufo.

"Inaaha awo ndomokeed asaña ubọk ñkaña adi ke iso mmi.

21 "Ke usen itiokeed ke ndufo ediinam utom, ado ke ayọhọ usen itiaba, ana eduọk adudu; ukem ado ke ini utọ ñkpọ ye ke ini ukpeeñe.

22 "Inam idaara Usọrọ Udua ye mme akpa mfịd inwañ idọk, ye Usọrọ Idọk ke ntọọñọ isua. 23 Akañ ita ke isua afịd ideen ndufo ana edi ke iso Abọọñ Andikara, Abasi Isrel. 24 Ami ñyaabịne mme idịd nsio ke iso ndufo, ñnyʌñ ntat adaña ndufo, ndin ba awo ndomokeed idiisịnne anyen ke isọñ ndufo idaha a-andufo ekaaha iso Abọọñ Abasi ndufo akañ ita ke isua.

25 "Ikiinam uwa a-asịneke iyiib innọọ miin ye ñkpọ ndomokeed a-sịneke yiis, ñko ikiiyak uwa Usọrọ Nsaña Mboiyo ana awuọ ubakusen edem usen.

26 "Iben mme akpa mfịd inwañ ndufo andifọn ñkan idi ke ufọk Abọọñ Abasi ndufo.

"Ikiitem ñyịn ebod ke mmọọñeba eka amọ."

27 Akem, Abọọñ amaabo Moses ate, "Wet mme ikọ ami, sia ami nnam edioomo ye afo ye nditọ Isrel akeene mme ikọ ami." 28 Moses akeba do ye Abọọñ ke uweemeayio aba ye akonayio aba, inyʌññọ ita uyo me inwọñ mmọọñ. Ndin anye amaawet ke itiadñwed mme ikọ edioomo, a-adooho mme Mbed Duob.

29 Ke Moses amaakesọiọ ke Abod Sainai ye itiadñwed mbed edioomo iba ke ubọk amọ, anye ikidiọọñọke ke iso imọ ayaayamma, sia anye amaaneme nneme ye Abọọñ. 30 Ke ini Erọn ye afịd mbon Isrel ekekịtte Moses, iso amọ akeyaayamma, ndin ammọ emaekop ndịk adisaña ñkpere anye. 31 Ado Moses amaakoot ammọ; ndin Erọn ye afịd mme adadusʌñ ke esob, emaetịmme ebịne anye, ndin anye amaatañ ikọ anọ ammọ. 32 Akema afịd mbon Isrel emaesaña ekpere anye, ndin anye amaanọ ammọ afịd mme mbed se Abọọñ akenọọ anye ke Abod Sainai.

33 Ke ini Moses amaaketañ ikọ anọ ammọ ama, anye amaafʌk afọñ ke iso amọ. 34 Ado ini akeedodo a-anye akesikaaha iso Abọọñ adinie nneme ye anye, Moses amaasifʌkkọ iso amọ tutu anye atịmme awuọ adi. Ndin anye amaawuọ adi adidọkkọ nditọ Isrel se Abọọñ aketemme anye, 35 mbon Isrel emaesikịt ke iso amọ ayaayamma. Ndin Moses amaasimaana aben afọñ afʌk iso amọ tutu anye atịmme akaa adineme nneme ye Abọọñ.