1 "Ikiisuan etob a-adooho nsu. Ikiinọọ awo a-anieghe ndudue unwam ke adido ntiense nsu."

2 "Ikiikeene atu awo ke adinam idiọọk. Imainọ ikọ ntiense ke esob, ikiikwaañ unen ke adikeene nda ye atu awo, 3 ikiinyʌñ inam adusad ye uweene ke itie ikpe."

4 "Adieke ndufo ekịtte ayaaraenañ me dọñki awo usua ndufo naña asop usʌñ, nwam ke adiben anye nsọk andinie. 5 Adieke ndufo ekịtte dọñki awo i-isuaha ndufo naña aduọ ye mbiomo amọ, ikiidakka ikpọñ anye; idomo ukeme adinwam anye."

6 "Ikiinyịm mme uweene ndufo unen ubiideikpe ke mme ikpe ammọ. 7 Ikiinie ñkpọ ndomokeed adinam ye ukwañ ikpe, ikiinyʌñ iwot awo imiidueghe me awo akpanikọ, sia ami ndiisaanake awo adueghe ñyaak."

8 "Ikiibọọ ubọkedem, sia ubọkedem akekịm mme amọọnọ ñkpọ anyen, anyʌñ adukpakka ikọ mbon i-imiidueghe ñkpọ."

9 "Ikiifiik awo asenidịd; ndufo ke idem ndufo emediọọñọ naña aba adido adidʌñ, sia ndufo ekedoñño mme adidʌñ ke Iyib."

10 "Ke isua itiokeed ana ndufo etọ inwañ ndufo enyʌñ edọk mme mfịd amọ, 11 ado ke ayọhọ isua itiaba iyak isọñ ana ukpọk, ke awo atọ ñkpọ. Ndin mme mbon unana ke atu ndufo ekeme adidat ndidia do ndia, ndin ndiọi unam ikọd ekeme idia ñkpọ se enyọñ ekpọñ. Inam ukem ado ye inwañ fain ndufo ye inwañ ọlif ndufo."

12 "Ke usen itiokeed nam utom mfo, ado ke ayọhọ usen itiaba kuunam utom, yak ayaaraenañ mfo ye dọñki mfo ebọ nduọkadudu, nọ ifʌn a-amanake ke ufọk mfo ye awo asenidịd a-adʌññọ ye afo amaana anie nsọọñọidem."

13 "Ikpeme adinam afịd mme ñkpọ se ami ntañ inọọ ndufo. Ikiitommo anyịñ abasi mfen; ikiiyak ekop ammọ ke inua ndufo."

14 "Akañ ita ke isua, ana ndufo enam usọrọ ennọ miin."

15 "Inam Usọrọ Uyo a-yiis imiisịneke. Ke usen itiaba, ita uyo a-yiis imiisịneke, kpa naña ami ñkitemme ndufo. Inam ami ke asaña-asaña ini ke afiọñ Afif, sia ke afiọñ ado ke ndufo ekewuọọñọ ke isọñ Iyib.

"Inaaha awo ndomokeed asaña ubọk ñkaña adi iso mmi.

16 "Inam Usọrọ Idọk ye mme akpa mfịd a-ndufo eketọọhọ ke inwañ.

"Inam Usọrọ Mboho ke utịd isua, ke idaha a-ndufo etañña mfịd ndufo ke inwañ.

17 "Akañ ita ke isua, afịd ideen ana edi iso Abọọñ Andikara.

18 "Kuunam uwa a-asañake ye iyiib unnọọ miin ye ñkpọ se isịne yiis.

"Inaaha enịm akpọñ e-enọọhọ ke mme usọrọ mmi tutu ayio asiere.

19 "Ben mme akpa mfịd mfo se ifọọn ikan a-atooho isọñ inwañ mfo di nịm ke ufọk Abọọñ Abasi mfo.

"Kuutem ñyịn ebod ke mmọọñeba eka amọ.

20 "Ami mmedọñ enyere nọ ibem ndufo iso, ikpeme ndufo ke usʌñ, anyʌñ iben ndufo akesịm itie a-ami ñkebeeñeke nnịm. 21 Ikpañ utọñ inọ anye, inyʌñ ikop se anye atañ. Ikiisọñ iwuod ye anye; sia anye idiifeene nsọñiwuod ndufo, koro anye ado isʌñutom mmi. 22 Adieke ndufo etʌmmọ ekpañ utọñ enọọ se anye atañ, enyʌñ enam afịd se ami atañ, ami ñyaado asua nnọ mbon usua ndufo, ñnyʌñ nnam mfịna ye mbon e-enamma mfịna ye ndufo. 23 Mme enyere mmi eyaeboiyo iso inọ ndufo, enyʌñ iben ndufo ekaa ke isọñ mbon Amọọ, Hed, Peris, Kenan, Hif ye Yebus, ndin ami ñyaakwokko ammọ nsio ke iso isọñ. 24 Ikiinʌhọ inọọ mme abasi ammọ, ikiinyʌñ ikpono ammọ, me adikeene edu unam ñkpọ ammọ. Ana ndufo ewuut ammọ, enyʌñ eboom mme itiad itieuwa ammọ mbai-mbai. 25 Ikpono Abọọñ Abasi ndufo, ndin adidiọñ amọ ayaaba ke ndidia ndufo ye mmọọñ ndufo. Ami ñyaaben udọñọ mfep ke atu ndufo, 26 ndin idịb idiiwuọñọke awo ndomokeed; ada idinyʌññọ iba ke isọñ ndufo. Ami ñyainọ ndufo ayọhọ isua uwem.

27 "Ami ñyaadọñ ñkpọ ndịk ibem ndufo iso, ñnyʌñ nsịn ndutịme ke afịd mme idịd se ndufo esoobo. Ami ñyaanam afịd mme asua ndufo ekappa edem efeeñe. 28 Ami ñyaadọñ akwọọk ibem ndufo iso ekebịn mme Hif, mbon Kenan ye mbon Hed esio ke usʌñ ndufo. 29 Ado ami ndiibịneke ammọ nsio ke isua keed, sia isọñ ayaakappa anaa ukpọk ndin mme ndiọi unam ikọd ediwak ikan ndufo. 30 Ami ndiibịn ammọ usʌk-usʌk nsio ke iso ndufo, tutu ndufo ediwak ekem se eben isọñ ado enie.

31 "Ami ñyaasịn adaña ndufo tọọñọ ke Ndad-ndad Akpainyañ tutu akesịm Akpainyañ Mediterenia ake Filistia, ndin tọọñọ ke akpautatan tutu akesịm Inyañ Yufretis. Ami ñyaiyaak ndufo nsịn ke ubọk mbon e-edʌññọ ke isọñ ado, ndin ndufo eyaebịn ammọ esio ke iso ndufo. 32 Ikiinam edioomo ye ammọ, me ye mme abasi ammọ. 33 Ikiiyak ammọ edʌñ ke isọñ ndufo, imiidooho ntoro ammọ eyaenam ndufo enam idiọọkñkpọ, sia ukpono abasi ammọ ayaakappa ado afia inọ ndufo."