* 1 Ndin Abọọñ amaabo Moses, "Kaa ke bo Fero ntom, ‘Se Abọọñ abo ado ami: Yak ikọd mmi enyọñọ, nọ ammọ ekeñkpono miin. 2 Adieke afo umuuyakka ammọ enyọñọ, ami ñyaakama nsobo mfuọd mmia afịd idịd mfo ufen. 3 Inyañ Nail adiiyọhọ ye mfuọd. Ammọ eyaedọñọ edi ufọkubọọñ ye ubeed nnaa ye ikʌk mfo, tutu akesịm ufọk mme ñkpisọñ mfo ye afịd mbon mfo, dian ye mme ediok mfo ye mme itiad ukọkñkpọ. 4 Mme mfuọd eyaedọọk ubịne fiin ye mme ñkpisọñ mfo.’ "

5 Akema Abọọñ amaabo Moses ate, "Dọkkọ Erọn, ‘Sio ubọk mfo nyan ye esañ ke anyọñ mme idịm, mme akpaubom ye mme ibiok, nyʌñ nam mme mfuọd ewuọñọ ediyọhọ isọñ Iyib.’ "

6 Ndin Erọn amaanyan ubọk amọ ke anyọñ mme mmọọñ Iyib, ndin mme mfuọd emaewuọñọ edifʌk isọñ. 7 Ado mbon unam mmayịk emaenyʌñ enam kpa ukem ñkpọ ado ke ndedịbe idiọñ ammọ; ammọ emaenam mme mfuọd ewuọñọ ediyọhọ isọñ Iyib.

8 Fero amaadọñ ekoot Moses ye Erọn adibo ammọ ate, "Ibọñ akam inọ Abọọñ nọ aben mfuọd akpọñ ikọd mmi, ndin ami ñyaayaak mbon ndufo enyọñọ ekewa uwa enọ Abọọñ."

9 Moses amaabo Fero ate, "Ke ukpono mfo, ami ñkpaama afo anịm ini a-afo akpemaaha ami mbọñ akam unọ fiin, mme ñkpisọñ mfo, ikọd mfo, ye mme ufọk mfo nọ mfuọd enyọñọ, ibọhọke mbon se isʌhọ ke Inyañ Nail."

10 Fero amaabo "Yak ado ñkpọñ." Ndin Moses amaabọọrọ abo, "Adiido naña afo abo, nọ afo adiọọñọ ke ibaaha awo a-abaaha nte Abọọñ Abasi ñnyịn. 11 Mfuọd eyaukpọñ fiin ye ufọk mfo, mme ñkpisọñ mfo ye ikọd mfo; ammọ ediisʌhọ ke Nail kpọd."

12 Ke Moses ye Erọn emaekekpọñ Fero, Moses amaaseeme akoot Abọọñ ke abaña mfuọd a-anye akedọññọ anọ Fero. 13 Ndin Abọọñ amaanam se Moses akebeeñe. Mfuọd emaekpañña ke ufọk, ke esịd akwere ye ke mme inwañ. 14 Emaekoono ammọ ekʌp ke ebono ke ebono, ndin utebe ammọ amaakara abio. 15 Ado Fero amaakekịt ke imibọ emem, anye amaamaana asọñ esịd, inyʌññọ ikpañ utọñ inọ Moses ye Erọn, kpa naña Abọọñ aketañ.

16 Ndin Abọọñ amaabo Moses ate, "Dọkkọ Erọn, ‘Sio esañ mfo nyan nyʌñ yʌppọ ntọñ ke isọñ,’ ndin ayaakappa ndañ ke afịd isọñ Iyib." 17 Ammọ emaenam ntoro, ndin ke ini Erọn amaakesio ubọk ye esañ ayʌppọ ntọñ isọñ, ndañ amaafʌk mme awo ye unam. Afịd ntọñ ke isọñ Iyib amaakappa ndañ. 18 Mbon unam mmayịk emaedomo adinam ndañ ke ido idiọñ ammọ, ado ikikanna.

Sia ndañ amaakeyọhọ awo ye unam idem ke afịd itie,

19 mbon unam mmayịk emaebo Fero ete, "Anye ami ado nnuunubọk Abasi." Ado Fero akesʌk asọsọñ esịd, inyʌññọ ikpañ utọñ inọ Moses ye Erọn, kpa naña Abọọñ aketañ.

20 Akema Abọọñ amaabo Moses ate, "Bak dakka da ubakusen kaa ke soobo Fero idaha a-anye akaaha mben inyañ, nyʌñ bo anye ntom, ‘Se Abọọñ atañ ado ami: Yak ikọd mmi enyọñọ, nọ ammọ ekeñkpono miin. 21 Adieke afo umuuyakka ikọd mmi enyọñọ, ami ñyaadọñ uwak-uwak udịm nsʌñ unọ fiin, mme ikpọ mbon utom mfo, ikọd mfo ye afịd ufọk mfo. Mme ufọk nditọ Iyib eyaeyọhọ ye nsʌñ; tutu nsʌñ afʌk afịd isọñ.

22 " ‘Ado ke usen ado ami ñyaasio isọñ Kosen mfep, itie i-ikọd mmi edʌñọke, mme udịm nsʌñ idiibaaha do, nọ afo adiọọñọ ke ami, Abọọñ, mmọdo mba ke isọñ ami. 23 Ami ñyaabakka ikọd mmi ñkpọñ ikọd mfo. Idiọọñọ ami ayaatịppe ñkpọñ.’ " 24 Ndin Abọọñ Abasi amaanam ntoro. Uwak-uwak udịm nsʌñ emaeduọññọ edọñọ akwere Fero ye ufọk mme ñkpisọñ amọ, enyʌñ ebiat afịd isọñ Iyib.

25 Ndin Fero amaadọñ ekoot Moses ye Erọn, anyʌñ abo ammọ ate, "Ikaa, ikinam uwa inọ Abasi ndufo mi ke isọñ ami." 26 Ado Moses amaabọọrọ, "Idiinenne adinam ntoro. Mme uwa a-ñnyịn iwaaha inọ Abọọñ Abasi ñnyịn ediiba nte mbubiam ke iso mbon Iyib. Nte ammọ idiitọọñọ ñnyịn ke itiad, adieke ñnyịn iwaha uwa a-abaaha nte mbubiam ke anyen ammọ? 27 Ana ñnyịn inam isañ usen ita, ika ke anaan ikinam uwa inọ Abọọñ Abasi ñnyịn, naña anye inọ ñnyịn uyio."

28 Fero amaabo, "Ami ñyaayaak ndufo eka ekewa uwa enọ Abọọñ Abasi ndufo ke anaan, ado inaaha ndufo edọọk eka nọ anekke anyọọñ usʌñ. Ñko, ibọñ akam innọ miin."

29 Moses amaabọọrọ, "Ami mmaasʌk ukpọkpọñ fiin, ñyaabọñ akam nnọ Abọọñ, ndin nsʌñ eyaekpọñ Fero, mme ñkpisọñ amọ ye mbon amọ ñkpọñ. Ado yak Fero akịt abo ke imọ idiinamma ñkpọ ñkara-ñkara aba ke anye aditre adiyaak nditọ Isrel eka ekewa uwa enọ Abọọñ."

30 Ndin Moses amaakpọñ Fero, akaa akebọñ akam anọ Abọọñ, 31 Abọọñ ñko amaanyʌñ anam se Moses akebeeñe. Mme nsʌñ emaekpọñ Fero, ye mme ñkpisọñ amọ ye ikọd amọ; nsʌñ ndomokeed ikisʌhọke aba. 32 Ado ini ami ñko Fero amaamaana asọñ esịd, inyʌññọ iyak nditọ Isrel enyọñọ.