* 1 "Awo akeedodo a-ayịppe abaakenañ me edọñ anyʌñ awot anye me anyam anye ana akpe iwuod enañ ition anọ andinie abaakenañ, anyʌñ anọ iwuod edọñ inaañ ke edọñ ado."

2 "Adieke emʌmmọ inọ naña abom ufọk adʌk akonayio, ndin etịm enyʌñ etọọñ anye eta tutu anye akpa, mbon e-etịmme anye inieghe ndudue uduọk iyiib; 3 ado akpetịppe ke ayio amaasiere, awo a-atịmme anye a-adue ke uduọk iyiib."

"Awo ndomokeed a-ayịppe ñkpọ ana akpe utịb, ado adieke ammọ imiinieghe ñkpọ ndomokeed, ana enyam ammọ edat ekpe utịb se ammọ ekeyịp. 4 Adieke ekịtte unam e-ekeyịppe ke uwem ke ubọk ammọ, me ado abaakenañ, me dọñki, me edọñ, ana ammọ ekpe akʌk akañ iba."

5 "Adieke awo ndomokeed anọọhọ ufene amọ ndidia ke inwañ fain, ndin ayak anye adʌk inwañ awo mfen ata ñkpọ, awo a-adueehe ana anam ukpeutịb ke inwañ amọ andifọọn ñkpọ ñkañ."

6 "Adieke ikañ abịppeke awuọ anyʌñ atara adʌk ikọd ndin ata mme mfịd inwañ, awo se ikitọọñọ ikañ ado ana akpe utịb."

7 "Adieke awo anọọhọ mbọhọidʌñ amọ silfa me kold ate anịm inọ imọ, ndin ediyịp ke ufọk mbọhọidʌñ, ekpemʌm inọ ado, ana anye akpe utịb akañ iba. 8 Ado adieke awo imiikịtte inọ ado, andinie ufọk ana ada ikpe ke iso mme abiideikpe, ndin ammọ ana ebiere me andinie ufọk ado amaatuuk ubọk ke inie awo mfen. 9 Ke afịd idaha ukwañ-ukwañ ukọ inie, nte abaakenañ, dọñki, edọñ, afọñ, me mme ñkpọ inie mfen a-anamma nọ awo abo ate, ‘Ake mmi ado ami,’ ibon iba ami ana eben mfịna ammọ edi iso mme abiideikpe. Awo a-mme abiideikpe ebooho ke a-adue ana akpe utịb akañ iba anọ awo anye ako."

10 "Adieke awo ndomokeed anọọhọ mbọhọidʌñ amọ dọñki, abaakenañ, edọñ, me unam ndomokeed mfen ate adʌñ keed ndin ufene ado akpa, me adat unan, me ediyịp anye idaha a-awo ndomokeed imiikịtte, 11 eyaekpe mfịna ke ufọọd ammọ ato ke adita unwọñọ ke iso Abọọñ mbo ke mbọhọidʌñ ado ikidatta ubọk amọ ituuk inie awo mfen. Andinie ñko ana anyịmme ntoro, ndin ukpeutịb idiiwanake. 12 Ado adieke adooho ekeyeeyịp unam ami eto mbọhọidʌñ, ana enam ukpeutịb enọ andinie. 13 Adieke adooho idiọọk unam afai akewai anye mbai-mbai, mbọhọidʌñ ado ana akoono mbai ado adi nte ñkpọ ntiense, ndin inaaha ebọ anye utịb ke unam se idiọọk unam afai akewai."

14 "Adieke awo awuọdọ ufene ato mbọhọidʌñ amọ, ndin ufene ado adinie unan me adikpa ke idaha andinie imiibaaha, ana ammọ ekpe utịb. 15 Ado adieke andinie akebaaha ye mme ufene ado, awo andikiwuọt inieghe adikpe utịb. Adieke adooho ekebọ ufene ami ke ewuọd, akʌk ekekpeeghe ke ewuọd a-akem ke ntakudua ado."

16 "Awodeen akpekpek adisịre abọikpa a-awo imiinọọhọ ke ndọ anyʌñ anaa ye anye, ana awodeen ado akpe akʌk ndọ iwuod amọ, ndin ana anye ado anwaan amọ. 17 Adieke ete ayịn awonwaan ado asịnne adiyaak anye nnọọ awodeen ado ke ndọ, awodeen ado ana asʌk akpe akʌk ndọ ubọikpa i-imiidiọọñọke awodeen."

18 "Ikiiyak abiamfa awonwaan adu uwem."

19 "Ana ewot awo akeedodo a-anieghe ewuana ye unam."

20 "Ana ewot awo akeedodo a-awaaha ñkpọ anọ abasi mfen ke imiibọhọke Abọọñ."

21 "Ikiifiomo, ikiinyʌñ ifiik asenawo, sia ndufo emaedo isenawo ke isọñ Iyib."

22 "Ikiifiik ebekpa me ayịnakpa. 23 Adieke ndufo enamma ntom, ndin ammọ eseeme ennọ miin, ke akpanikọ, ami ñyaakop uyio ayịd ammọ. 24 Iyadesịd mmi ayaademme, ndin ami ñyaiwot ndufo ke akañkañ. Ibaan ndufo eyaedoñño mme ebekpa, ndin nditọ ndufo eyaedoñño nditọakpa."

25 "Adieke afo awuọdọ awo mmi keed ke atu ndufo a-abaaha ke unana akʌk, kuunam ado nte ndubeghe; kuubọọ anye udod. 26 Adieke afo abọọhọ mbọhọidʌñ mfo afọñ ke ewuọd, ben sọk anye mbemiso utịn asakka, 27 sia ukweeñe afọñ ufʌkidem a-mbọhọidʌñ mfo anieghe adodo. Nsoo ndin ke ammọ ediidat ifʌhọ idaiya? Ammọ emaeseeme ennọ miin, ami ñyaakop, sia ami ñyọhọ ye mbọm."

28 "Kuutañ idiọọk ikọ udian Abasi, kuunyʌñ usuuñọ mme andikara mbon ndufo."

29 "Ikiimʌm mme enọ e-etooho inwañ, me itie unịm ukọd ndufo, me ikpọ abañ ukọd ikama."

"Ana ndufo ennọ miin akpa ayịn awodeen ndufo. 30 Inam ukem ado ye mme enañ ye mme edọñ ndufo. Yak ammọ eba ye mme eka ammọ ke usen itiaba, ado iben ammọ insọk miin ke ayọhọ usen itiaita."

31 "Ana ndufo edo mme ndisana awo mmi. Ke ntoro ikiita unam a-mme ndiọi unam ikọd ewotto; itop anye inọ mme ewa."