1 Ke ini mme awo ekekịtte ke Moses amaakpeene adisọiyọ ndi ke anyọñ ekamba abod, ammọ emaebịne Erọn ekebo ete, "Di, bot mme abasi inọ ñnyịn e-ediisaña ke iso ñnyịn. Amaado awo e-ekoodo Moses a-akisịññeke ñnyịn ke isọñ Iyib, ñnyịn idiọọñọke se itịppe inọ anye."

2 Erọn amaabọọrọ ammọ ate, "Isịññe afịd ñkpahautọñ kold i-ibaan ndufo, nditọ ideen ndufo, ye nditọ ibaan ndufo esịneke iben insọk." 3 Ndin afịd awo emaesịññe mme ñkpahautọñ ammọ eben esọk Erọn. 4 Anye amaaben ammọ anam ubobodñkpọ ke mbid ñyịn enañ, akama ñkpọutom adiọñ anye. Akema, ammọ emaebo, "Ami ado mme* abasi ndufo, Isrel, e-ekesioho ndufo ke isọñ Iyib."

5 Ke ini Erọn akekịtte ami, anye amaabọp akpokoro uwa ke iso ñyịn enañ ado anyʌñ anọ uyio ate, "Ñkpọñ usọrọ ayaaba anọ Abọọñ." 6 Ke edem usen, mme awo emaebak edemme ewa ufọfọb uwa, enyʌñ enam uwa ewuana. Ke emaekema ammọ emaesuuk etie edia ñkpọ, enwọñ ñkpọ, enyʌñ enam mme mbubiam ido.

7 Ndin Abọọñ amaabo Moses ate, "Sọiyọ kaa, sia mbon mfo, a-afo akesioho ke isọñ Iyib, e-ebiaña. 8 Ammọ e-esọp aditịmme ñkpọñ usʌñ a-ami ñketemmeke ammọ, enyʌñ enam ubobodñkpọ ke mbid ñyịn enañ enọ idem ammọ. Ammọ enʌhọ ekpono anye, enyʌñ ewa uwa enọ anye ete, ‘Isrel, mme abasi ndufo edoñño ami, e-ekisioho ndufo ke isọñ Iyib.’ "

9 Abọọñ amaabo Moses ate, "Ami mmekịt mbon ami, ammọ edo mbon esọọñọ aboditọñ. 10 Dakka ñkpọñ miin idahami nọ ami ñwọt ammọ iyadesịd mmi ñnyʌñ nsobo ammọ. Ndin ami ñyaunam fiin akappa ado ekamba idịd."

11 Ado Moses amaabeeñe mfọn Abọọñ Abasi amọ. Anye amaabo, "Abọọñ, nsoo inam nọ iyadesịd mfo afiop abaña ikọd mfo, a-afo akesioho ke isọñ Iyib ke ekamba adudu ye ekamba ubọk? 12 Ntak a-mbon Iyib ekpebooho, ‘Akedo ye idiọọk uduak ke anye akesio ammọ, adiwot ammọ ke mme ñkpoon abod, nyʌñ nsọọk ammọ nsio ke iso ederimbod-o’? Siññe idem kpọñ ufiob iyadesịd mfo; teeghe ube, kuunyʌñ uben nsobo usọk ikọd mfo. 13 Toiyo mme isʌñutom mfo Ebraham, Aisik ye Isrel, a-afo akenwọñọke ke idem mfo: ‘Ami ñyaanam ubon ndufo awak nte ntantaafiọñ ke ikpaanyọñ, ndin ami ñyaanọ ubon mfo isọñ a-ami ñkenwọñọke nnọ ammọ, ndin ado ayaado udeemeñkpọ ammọ ke nsi-nsi.’ " 14 Akema, Abọọñ amaasịññe idem akpọñ iyadesịd a-anye akeduakka adidot ikọd amọ ke idem.

15 Moses amaawọññọ iso asọiyọ ke abod ye itiadñwed mbed iba ke ubọk. Ekewet ke mbeñ iba, iso ye edem. 16 Mme itiadñwed ado ekedo ubọkutom Abasi; ekekakap ubọkñwed Abasi esịn ke mme itiadñwed ado.

17 Ke ini Yọsua akekoppo uyom ñkpo mme awo, anye amaabo Moses, "Uyom ekọñ a-aba ke anwa mbono."

18 Moses amaabọọrọ:

"Idooho uyom adikan ke ekọñ,

idooho uyom mfʌhọ;

ado uyom ikwọ ke ami ñkop."

19 Ke ini Moses akekpereke anwa mbono, anyʌñ akịt ubobod ñyịn enañ ye mme awo naña enek unek, iyadesịd amọ amaafiop, ndin anye amaatop itiadmbed ke ubọk amọ aduọk, abom ammọ mbai-mbai ke mben ekamba abod. 20 Ndin anye amaaben ubobod ñyịn enañ a-mme awo ekebotto afọp ke ikañ; ndin akọk anye tutu akappa ntọñ, asuan anye ke mmọọñ anyʌñ anam nditọ Isrel enwọñ mmọọñ ado.

21 Moses amaabo Erọn ate, "Nsoo ke idịd ami ekunam fiin, nọ afo aben ammọ asịn ke uto ekamba idiọọkñkpọ ami?"

22 Erọn amaabọọrọ ate, "Kuuyat esịd, abọọñ mmi, afo amediọọñọ naña idịd ami esọp ke adinam idiọọkñkpọ. 23 Ammọ emaembo miin, ‘Bot mme abasi inọ ñnyịn se idiiboiyo iso inọ ñnyịn. Ado amaado awo e-ekoodo Moses akisịññeke ñnyịn ke isọñ Iyib, ñnyịn idiọọñọke se itịppe inọ anye.’ 24 Ami mmaadọkkọ ammọ nte, ‘Yak awo se inie ñkpọ mbanaidem kold, asịññe adi.’ Ndin ammọ emaennọ miin mme kold ami, ndin ami mmaatop nsịn ke ikañ, ndin ubobod ñyịn enañ ami amaawuọ!"

25 Moses amaakịt ke mme awo ekeba ke ndutịme, ndin Erọn amaayaak ammọ eba nte inieghe ukpeme aba, ndin ammọ emaenyʌñ ekappa edo ñkpọ nsakimam enọ mme asua ammọ. 26 Ndin Moses amaada ke inuausʌñ anwa mbono abo, "Awo akeedodo adaaha anọ Abọọñ, di mbịne miin." Ndin afịd mme Lifai emaekaa ebịne anye.

27 Ndin anye amaabo ammọ, "Ñkpọ se Abọọñ, Abasi Isrel atañ ado ami: ‘Ana afịd ideen efaak afịd ke ñkañ ammọ. Ikaa edem ye iso ke afịd anwa mbono ami ke ñkañ keed tutu asịm edem uko, awo keedekeed ana awot ayịneka amọ awodeen, anyʌñ awot ufan amọ ye mbọhọidʌñ amọ.’ " 28 Mme Lifai emaenam naña Moses aketemme, ndin ke usen ado ñkpọ nte awo tọsịn ita emaekpañña. 29 Akema, Moses amaabo, "I-isịññe ndufo enịm asaña-asaña enọ Abọọñ mfịn ami, sia ndufo ekenwanake ye nditọ ndufo ye nditọeka ndufo, ndin anye i-idiọñ ndufo mfịn ami."

30 Edem usen Moses amaabo mme atu awo ate, "Ndufo emenam ekamba idiọọkñkpọ. Ado idahami ami ñyaakaa mbịne Abọọñ; me ami ñyaakan adinam ñkpeubọk mbaña idiọọkñkpọ ndufo."

31 Ndin Moses amaatịmme abịne Abọọñ akebo ate, "O, se utọ ekamba idiọọkñkpọ i-idịd ami enamma! Ammọ emaenam ubobod abasi kold enọ idem ammọ. 32 Ado idahami, mbọk feen mme idiọọkñkpọ ammọ, imiidooho ntoro, ñkwokko miin sio ke ñwed a-afo awette."

33 Abọọñ amaabọọrọ Moses ate, "Awo akeedodo a-anamma idiọọkñkpọ andian miin ñyaakwokko anye nsio ke ñwed mmi. 34 Ado kaa, dat mme awo usʌñ kaa itie a-ami ñketañña mbaña, ndin mme enyere mmi eyaubem fiin iso. Ado, ini amaakem ami adimia ammọ ufen, ami ñyaamia ammọ ufen ke mme idiọọkñkpọ ammọ."

35 Ndin Abọọñ amaatọ ammọ idiọọk udọñọ nsobo akeene se ammọ ekenam ye ubobod ñyịn enañ ake Erọn akebotto anọ ammọ.