1 Akedikem Abọọñ amaabo Moses ate, "Ami ñyaaben udọñọ keed mfen nnọ Fero ye mbon Iyib. Ado amaakweeñe, anye ayaayak nọ ndufo enyọñọ, ndin anye ayaibịne ndufo asịññe afịd-afịd. 2 Dọkkọ mbon awo bo ke ideen ye ibaan ana ebeeñe mme mbọhọidʌñ ammọ ñkpọ a-silfa ye kold." 3 (Abọọñ amaanam nditọ Iyib ewọt mbon Isrel mfọn, ndin Moses ke idem amọ ado awo a-mme ñkpisọñ Fero ye mbon abio ekenekke ekpono ke Iyib.)

4 Ndin Moses amaabo ate, "Se Abọọñ atañ ado ami: ‘Ke ñkpọ nte ufọọd akonayio, ami ñyaawuọ ndʌk ke afịd isọñ Iyib. 5 Afịd mme akpan ke Iyib eyaekpañña, tọọñọ ke akpan Fero, a-atieghe ke ebekpo, tutu asịm akpan afʌn awonwaan a-abaaha ke itie ukọkñkpọ, ye afịd akpa nditọ enañ ñko. 6 Akpọsọñ uyom ntuaña ayaaba ke afịd isọñ Iyib, ayaadiọọk akan se ikidadak iba me se idiinyʌñ iba ke ini iso. 7 Ado ke atu nditọ Isrel, ewa idiikpọiyọ awo me unam ndomokeed.’ Ndin ndufo eyaediọọñọ ke Abọọñ anịm ubakka ke ufọọd mbon Iyib ye Isrel. 8 Afịd mme ñkpisọñ mfo eyaedi embịne miin, edinyuuk iwuod ke iso mmi enyʌñ ebo ete, ‘Ikaa, afo ye afịd ikọd mfo e-esañake ye afo!’ Ado amaakweeñe ami ñyaanyọñ." Ndin Moses amaakpọñ iso Fero, ke akpọsọñ iyadesịd.

9 Abọọñ amaadọkkọ Moses ate, "Fero idiikpañña utọñ unọ fiin nọ ato ke ado mme utịppeñkpọ edinam mmi ewak ke isọñ Iyib." 10 Moses ye Erọn emaenam afịd mme utịppe edinam ami ke iso Fero, ado Abọọñ amaanam esịd Fero asọñ, ndin anye ikiyakka nditọ Isrel ekpọñ abio amọ.