1 Akema, Abọọñ amaabo Moses ate, "Kpọñ itie ami, afo ye afịd mbon se afo akeben asio ke isọñ Iyib, nyʌñ kaa ke isọñ a-ami ñkenwọñọke nnọ Ebraham, Aisik ye Yekọb, nte, ‘Ñyaanọ mme ubon mfo.’ 2 Ami ñyaadọñ mme enyere ubem fiin iso, enyʌñ ekebịne mbon Kenan, mbon Amọọ, mbon Hed, mbon Peris, mbon Hif ye mbon Yebus esio. 3 Ikaa ke isọñ a-afiọọrọke ye mmọọñeba ye adanakwọọk. Ado ami ndiisañake ye ndufo, sia ndufo edo mbon esọññọ aboditọñ, sia ami mmekeme adikisobo ndufo ke usʌñ."

4 Ke ini mme atu awo ekekoppo mme anie ndịk ikọ ami, ammọ emaetọọñọ adifʌhọ, ndin awo ndomokeed ikisịneke ñkpọ mbanaidem ndomokeed. 5 Sia Abọọñ amaabo Moses ate, "Dọkkọ nditọ Isrel, ‘Ndufo edo mbon esọññọ aboditọñ. Adieke ñkpesañake ye ndufo ke etək ibio ini, ami mmekeme isobo ndufo. Isịññe ñkpọ mbanaidem ndufo idahami, ndin ami ñyaadiọọñọ se nnam ye ndufo.’ " 6 Ndin nditọ Isrel emaesịññe mme ñkpọ mbanaidem ammọ ke Abod Họreb.

7 Ndin Moses amaasima adiben atayad ñwuuk ke anwa esiin mbono ke itie amaanake asanna etək, akoot anye "atayad mbono." Awo ndomokeed se iyem adibịp Abọọñ ñkpọ akena aka atayad ami ke anwa esiin. 8 Ndin ini akeedodo ake Moses akesikaaha atayad mbono ado, akena afịd awo edaaña eda ke inuausʌñ atayad ammọ ese Moses tutu anye adʌk atayad ado. 9 Naña Moses adʌkkọ atayad mbono, adaaha ntọñanyọñ ayaasọiyọ adida ke inuausʌñ, ke ini Abọọñ atañña ikọ ye Moses. 10 Ini akeedodo a-mme awo ekesikịtte adaaha ntọñanyọñ naña ada ke inuausʌñ itie mbono, ammọ keedekeed emaesida ke inuaatob atayad ammọ ekpono Abasi. 11 Abọọñ ayaatañ ikọ ye Moses iso ye iso, nte ufan atañ ikọ ye ufan. Ndin Moses ayaatịmme akaa esịd nnaaekọñ, ado etək ayịnufọk amọ, Yọsua ayịn Nọn ikikpọññọ atayad ado.

12 Moses amaabo Abọọñ ate, "Afo amesindọkkọ miin, ‘Dat idịd ami usʌñ,’ ado afo unamma ami ndiọọñọ awo se afo uduunọ nọ asaña ye ami. Afo amesibo, ‘Ami mmudiọọñọ fiin ke anyịñ, ndin afo amekịt mfọn ke ubọk mmi.’ 13 Adieke afo anemme esịd ye ami, ñkpeep miin usʌñ mfo nọ ami udiọọñọ fiin, ñnyʌñ ñkaiso ñkịt mfọn ye afo. Toiyo ke idịd ami edo ikọd mfo."

14 Abọọñ amaabọọrọ anye ate, "Ami ñyaasaña ye afo, ndin ami ñyaunọ fiin nduọkadudu."

15 Ndin Moses amaabọọrọ anye ate, "Adieke afo umuusañake ye ñnyịn, kuusio ñnyịn udọñ. 16 Mme awo ediisaña die idiọọñọ ke afo amenen iso ye ami ye ikọd mfo ibọhọke afo asaña ye ñnyịn? Nsoo idiinam ami ye ikọd mfo inie ukpʌhọde ye afịd mbon mfen ke afịd iso isọñ?"

17 Ndin Abọọñ amaabo Moses ate, "ami ñyaanam ñkpọ afo abeeñe, sia ami mmenem esịd ye afo, ndin ami mmudiọọñọ fiin ke anyịñ."

18 Akema, Moses amaabo ate, "Idahami ñwọt miin ubọọñ mfo."

19 Ndin Abọọñ amaabo anye, "Ami ñyaanam afịd ubọọñ mmi aboiyo ke iso mfo, ndin ami ñyaatommo adisana anyịñ mmi, Abọọñ, ke iso mfo. Ami ñyaatua awo se ami ñyem aditua mbọm, ndin ñnyʌñ ñkop udʌk mbaña awo se ami ñyem adikop udʌk." 20 Ndin anye amaabo, "ado afo ukemeke adiñkịt miin iso, sia awo ndomokeed ikemeke adiñkịt miin ndin adu uwem."

21 Ndin Abọọñ amaabo ate, "Itie aba añkpere miin a-afo akpedaaha ke anyọñ itiad. 22 Ubọọñ mmi amaaboiyo, ami ñyausịn fiin ke ufañ abaitiad ñnyʌñ ñkama ubọk mmi ufʌk fiin tutu ami nsaña mboiyo. 23 Ndin ami ñyaafʌkkọ ubọk mmi, ndin afo ayaakịt edem mmi; ado inaaha ekịt iso mmi."