1 "Nam eben Erọn, ayịneka mfo usọk fiin ke atu nditọ Isrel, ye nditọ amọ ideen, Nadab ye Abihu, Eliasa ye Itama, nọ ammọ enam ñkpọ ennọ miin nte mme aku. 2 Nam mme ndisana afọñ nọ ayịneka mfo, Erọn, nọ anọ anye uku ye ukpono. 3 Dọkkọ afịd mme anam mfọọn ubọkutom a-ami ñkenọọhọ ifiọk ke utọ usʌñ ami ate ammọ enam mme afọñ enọ Erọn, ke udodubọk amọ, nọ anye adiinam ñkpọ innọ miin nte aku. 4 Mme afọñ se ammọ ana enam ado ami: Afọñ ikpanesịd, afọñ aboditọñ, ewịra, udọdọk afọñ, afọñiwuod, ye udʌkisịn. Ana ammọ enam mme ndisana afọñ ami enọ ayịneka mfo, Erọn, ye nditọ ideen amọ, nọ ammọ ediinam ñkpọ innọ miin nte mme aku. 5 Ana ammọ edat kold, ye bru, iduod-iduod, ye ndad-ndad udʌk, ye eti linen enam mme afọñ ado.

6 "Nam afọñ aboditọñ ke kold, ye ke bru, ye iduod-iduod, ye ndad-ndad udʌk, ye ake eti linen ewaññawañ, utom mme anam mfọọn ubọkutom. 7 Ana anie afọñ afara iba ke inuuk amọ iba, nọ ekan emʌm anye eyịt. 8 Mfọọn udọdọk mbọbọisịn amọ ana aba ukem ntoro, ado keed ye afọñ aboditọñ, enyʌñ enam ke kold, ye ke bru, ye ke iduod-iduod, ye ke ndad-ndad udʌk, ye ke eti uwawañ linen.

9 "Dat itiad ọniks iba nyʌñ kap anyịñ nditọ ideen Isrel sịn ke ammọ 10 akeene naña eketo emana, anyịñ itiokeed ke itiad keed, ndin itiokeed ke itiad anye ako. 11 Kap mme anyịñ nditọ ideen Isrel sịn ke mme itiad iba ami ukem usʌñ naña mme akabitiad esinam ye ufiikñkpọ. Ndin dot mme itiad ami ke uyaiya akpasa kold, 12 nyʌñ tobo ammọ yịt ke udʌk afara afọñ aboditọñ nte itiad ñkpọ aditoiyo anọ nditọ ideen Isrel. Erọn ana abiom mme anyịñ ami ke afara amọ nte ñkpọ aditoiyo anọ Abọọñ. 13 Nam uyaiya akpasa udọññkpọ ke eti kold daaha, 14 ye ekọb ukwak iba edọkkọdọk ke ataa eti kold, nte udʌk, nyʌñ ben udʌk ukwak yịt ke ñkpọ ado.

15 "Mme anam mfọọn ubọkutom ana enam afọñ ikpanesịd se ekama ebiere ñkpọ. Nam nọ anye aba nte afọñ aboditọñ. Ana enam ke kold, ye bru, ye iduod-iduod, ye ndad-ndad, ye eti linen ewaññawañ. 16 Ana ado mbañinaañ, span* keed ke unyọọñ ye span keed ke ukpa, ñko enyʌñ ekpañ anye ndodiba. 17 Ndin dot udịm nsọñudua itiad inaañ ke anye. Akpa udịm ana ado kanelian, krisolaid ye beril; 18 ayọhọ udịm iba ana ado tọkwọis, lapis lasuli ye emeraal; 19 ayọhọ udịm ita ana ado yasịn, akate ye ametis; 20 ayọhọ udịm inaañ ana ado topas, ọniks ye yaspa. Doot ammọ ke mme uyaiya akpasa kold udoodñkpọ. 21 Ana ado itiad duob mme iba, keed ada anọ mme anyịñ nditọ ideen Isrel keed, ekap ammọ keedekeed nte ufiikñkpọ ye ukem anyịñ esiin duob mme iba.

22 "Yak edọk afọñ ikpanesịd ke ataa eti kold, nte udʌk. 23 Nam ikara kold iba nọ ekọp ammọ ke inuuk afọñ ikpanesịd iba ado. 24 Kọp kold ukwak iba ado ke ikara inuuk afọñ ikpanesịd ado, 25 ndin yịt utịd ukwak ukañ uko dian ke abai iba, tobo ammọ dian ke afara ye afọñ aboditọñ ke iso. 26 Nam kold iba ikara-ikara, nyʌñ bọọp ammọ ke inuuk iba ako ke itie afọñ ikpanesịd ke ukañ esịd-esịd ako a-akpereke afọñ aboditọñ. 27 Maana nam ikara kold iba, nyʌñ yịt ammọ ke idak afara ke ñkañ iso afọñ aboditọñ, a-akpereke itie e-eketoboke udʌk ke anyọñ mbọbọisịn afọñ aboditọñ. 28 Ana etobo mme ikara afọñ ikpanesịd ado edian ye ikara afọñ aboditọñ ke bru udʌk, edat anye ekesịm isịn, mbaak afọñ ikpanesịd adifakka awuọ ke afọñ aboditọñ.

29 "Ini keed akeedodo ake Erọn adʌkkọ Adisana Itie, ana anye adian anyịñ nditọ Isrel ke esịd amọ ke afọñ ikpanesịd e-ekamake enam ubiere nte ñkpọ ñkaiso aditoiyo ke iso Abọọñ. 30 Ñko sịn Urim ye Tumịm ke idak afọñ ikpanesịd, nọ ammọ edoro ke esịd Erọn ini keed akeedodo a-anye adʌkkọ iso Abọọñ. Ke ntoro Erọn adiisikọñọ mme ñkpọ e-edatta enam ubiere enọ nditọ Isrel ke ikpanesịd amọ ke iso Abọọñ afịd ini.

31 "Nam udʌk afọñ aboditọñ ado bru afịd-afịd, 32 ye adu ke ufọọd iwuod ado. Ana edọdọk mben ado nte itọñafọñ ekanna itie adu ado, mbaak anye adiwakka. 33 Nam mme kpomekrened ke bru, iduod-iduod ye ndad-ndad udʌk kanna mben afọñ ado, ye mme ñkanika kold ke ufọọd ammọ. 34 Mme ñkanika kold ye mme kpomekrened ana edukpuuñọ itie ammọ ekanna mben afọñ ami. 35 Erọn ana asịne anye ke ini anye anamma uwa. Ana emia ñkanika ke ini anye adʌkkọ Adisana Itie ke iso Abọọñ ye ke ini anye awuọọhọ, mbaak anye adikpa.

36 "Nam usan ke ataa kold, nyʌñ mịñ mme ikọ ami nte ufiikñkpọ ke esịd amọ:

Ado Adisana Anọ Abọọñ.

37 Tobo bru ekpək ke anye nọ eyịt anye ke afọñiwuod; ana aba ke iso afọñiwuod. 38 Anye adiiba ke akpọiso Erọn, ndin anye adiibiom ndudue a-asịneke ke adisana enọ a-nditọ Isrel ediinọ, se ikpidodo se ammọ enọ. Adiiba ke akpọiso Erọn afịd ini nọ Abọọñ akop inem adibọ mme enọ ado.

39 "Dọk afọñ idakidem ke eti linen nyʌñ nam afọñiwuod ke eti linen. Udʌkisịn ana ado ubọkutom mbon udọk afọñ. 40 Nam mme afọñ idakidem, mme udʌkisịn, itam nditọ Erọn nọ anọ ammọ uku ye ukpono. 41 Umausịn ayịneka mfo Erọn ye nditọ amọ ideen mme afọñ ami uma, yet ammọ adan nyʌñ dot ammọ ubọk. Diọñ ammọ nọ ammọ enam ñkpọ ennọ miin nte mme aku.

42 "Nam afọñ idakidem ke linen se ekama efʌk idem, atọọñọ ke isịn tutu asịm ifʌkkọ. 43 Erọn ye nditọ amọ ideen ana esịne ammọ ini keed akeedodo a-ammọ edʌkkọ atayad mbono, me esañake ekpere akpokoro uwa adinam uwa ke Adisana Itie, mbaak ammọ ediben ndudue enyʌñ ekpañña.

"Ami adido nsi-nsi ewʌhọ inọ Erọn ye ubon amọ.