1 "Kama adukpọk eto akasia bọp akpokoro uwa, kubid ita* ke unyọọñ. Ana anie mbañ inaañ, kubid ition ke anyan ye kubid ition ke ukpa.* 2 Nam nnʌk nịm ke afịd inuuk inaañ ado, nọ mme nnʌk ye akpokoro uwa edo keed, nyʌñ fʌk akpokoro uwa ke brọns. 3 Nam nọ afịd ñkpoduoho amọ ado brọns: Mme ako amọ nọ ekama esio ntọñ, mme udọk amọ, mme bọwịd usiime mmọọñ, mme akuum ukịm unam ye mme akpañkpañ ufraññkpọ. 4 Nam akuọk nọ anye, ñkpọ brọns, nyʌñ nam ikara ke brọns ke afịd inuuk ntondʌk usʌñ amọ. 5 Sin anye ke idak eto akpokoro uwa, nọ anye ado mbakka iba ke ñkan anyọñ akpokoro uwa. 6 Nam mboi eto akasia nọ akpokoro uwa, nyʌñ dat brọns fʌk ammọ. 7 Ana esịn mme mboi ado ke mme ikara nọ ammọ eba ke mben ñkañ akpokoro uwa iba idaha ediiben anye. 8 Nam nọ akpokoro uwa anie ekamba ufañ, awuọ ada ke mme adukpọk. Ana anam anye ukem naña ekuwọt fiin ke anyọñ ekamba abod.

9 "Bọp esịd akwere nọ tabanakịd Abasi. Edem ukañ usuuk adiido kubid ikie* ke unyọọñ, ndin mme afọñ anyenusʌñ amọ ana ado ataa eti udọdọk linen, 10 ye mboi edịb ye brọns edịb ke idak, ndin ye mme ekọb silfa ye mme idiọọñọ ke mboi amọ. 11 Ukañ anyọñ-anyọñ ñko ana ado kubid ikie ke unyọọñ, ndin ana anie mme afọñ ikpeghe, ye mboi edịb ye brọns edịb ke idak, ye mme ekọp silfa ye mme idiọọñọ ke mboi ami.

12 "Utịd ukañ usobutịn esịd akwere ana ado kubid aba mme duob* ke ukpa, anyʌñ anie afọñ ikpeghe, ye adaaha duob ye idakisọñ duob ñko. 13 Ke edem usakkautịn, ke ukañ u-utịn asitooho asakka, esịd akwere ana ado kubid aba mme duob ñko ke ukpa. 14 Mme afọñ ikpeghe enyọọñọ kubid duob mme ition* ana eba ke ntondʌk, ye adaaha ita ye idakisọñ ita ñko. 15 Mme afọñ ikpeghe kubid duob mme ition ke unyọọñ ana eba ke mbeñ uko, ye adaaha ita ye idakisọñ ita.

16 "Ke ntondʌk esịd akwere, yịt afọñ ikpeghe a-adooho kubid edịb* ke unyọọñ, yak ado bru, ye iduod-iduod, ye ndad-ndad udʌk ye ataa eti afọñ linen edọkkọdọk, utom awo andidọk ñkpọ, ye eto adaaha inaañ ye idakisọñ inaañ. 17 Afịd mme abọbọọk usʌñ e-ebaaha ke esịd akwere ana enie idiọọñọ silfa ye mme ekọb, ye brọns ke idak. 18 Esịd akwere ana ado kubid ikie ke unyọọñ, anyʌñ ado kubid aba mme duob ke ukpa,* ye ataa eti afọñ linen a-adooho kubid ition* ke anyan, ye mme brọns nte itiad ke idak amọ. 19 Afịd mme ñkpọ mfen se edat enam utom ke tabanakịd, se ikpidodo se edat ammọ enam, tutu asịm afịd mme eto mboi atayad ye ake mme esịd akwere, ana edo ke brọns.

20 "Nọ nditọ Isrel ewʌhọ bo nọ edat adan a-atarake, enyịmmeke esio ke ọlif edi, se edat edomo ikañ nọ mme utuenikañ esak afịd ini. 21 Ke atayad mbono, ke anwa ikpeghe itie a-afʌkkọ akebe edioomo mbed enwọñọ, Erọn ye nditọ amọ ideen ana enam nọ utuenikañ akaka iso asak ke iso Abọọñ tọọñọ ke ndubiayio tutu ubakusen. Ami ana ado nsi-nsi ewʌhọ ke ufọọd nditọ Isrel ke afịd emana se idiidi.