1 Ɛnee adwuledievolɛma mɔɔ nzisi ɛhu bɛ kuu, nee menli mɔɔ ɛtaneyɛlɛ a bɛdi bɛda la, ta ba kɛ bɛbadie Gyisɛse Nyamedwɛkɛ ne bie. 2 Ɛhye maanle Falasiima anzɛɛ Dwuuma asɔne mgbanyima ne mɔ nee mɛlakɛlɛvoma ne mɔ dendɛle dɔɔnwo, ɔluakɛ bɛnea a ɛnee Gyisɛse nee menli mɔɔ anwo ɛnde la ala a tu a, bɔbɔ ɔ nee bɛ a di aleɛ a! 3,4 Ɛhye ati Gyisɛse bule ɛrɛlɛ ɛhye hilele bɛ: "Bɛ nuhua ne boni a saa ɔlɛ mboane ɛya ko na bɛ nuhua ko minli a, ɔnrɛhɔkpondɛ ko ne mɔɔ ɛminli la kɔkpula mekɛ mɔɔ ɔkɛnwu ye la a? 5 Na saa ɔnwu ye a asoo ɔnrɛzoa ye ɔ kɔme zo ɔnrɛra sua zo ɔnrɛli nwolɛ fɛlɛko ɔ? 6 Na saa ɔba suazo noko a asoo ɔnrɛvɛlɛvɛlɛ ɔ gɔnwo mɔ nee ye aako nu amra kɛ bɛ nee ye ɛrali fɛlɛko, ɔluakɛ yenwu ye boane ko ne mɔɔ minlinle la ɔ?

7 "Nɔhalɛ nu, zɔhane ala noko yɛɛ anwuma maanle ne bali fɛlɛko wɔ ɛtanevolɛ ko mɔɔ kɛzia kɛra Awulae ɛkɛ ne la anwo, tɛla abulahɔnla nee ngɔnla mɔɔ ɛtɛminlinle la anwo a!

8 "Anzɛɛ raalɛ ne boni a lɛ ye ezukoa nvutuke asomade bulu, na nuhua ko minli a, ɔnrɛzɔ nwolɛ tɛkɛ anzɛɛ kɛnlaneɛ ɔnrɛnleɛnlea ahodoka ne kpokpoti anu, na ɔnrɛkpoɔkpoa sua ne anu ɛnwea ne amuala ɔnrɛkegya dedee kɔkpula mekɛ mɔɔ ɔkɛnwu ye ɛ? 9 Na saa ɔnwu ye noko a, asoo ɔnrɛvɛlɛvɛlɛ ɔ gɔnwo mɔ nee ye aako nu amra kɛ bɛ nee ye ɛrali fɛlɛko ɔ? 10 Zɔhane ala yɛɛ Nana Nyamenle anwumabɔvolɛma ne mɔ di fɛlɛko wɔ ɛtanevolɛ kokye mɔɔ kɛnyia anlubɛnwo la anwo a."

Amaa bɛade ɛhye abo kpalɛ kpalɛ la, eza ɔbule bɛ ɛrɛlɛ ɛhye: 11 "Nrenyia bie lɛ mralɛ mrenyia nwiɔ. 12 Na nuhua ekyi ne rale razele ɔ ze kɛ, ‘Egya, kyɛ wɔ agyapadeɛ ne anu na fa me afoa nu deɛ mɔɔ saa ɛwu a ɔkɛyɛ me deɛ la maa me!’ "

Amgba noko ɔhyɛle ye agyapadeɛ ne anu na ɔvale ye afoa nu deɛ ne ɔmaanle ye.

13 "Na yeangyɛ biala, kpavolɛ ne zoale ye ninyɛne ne dule adenle hɔle moamoa. Na ɔzɛkyele ye ezukoa nee ɔ nwo ninyɛne muala wɔ huhunli nyɛleɛ nee ɛbɛlabɔlɛ ɛtane nwo. 14 Zɔhane mekɛ ne anu ala, ɛhɔne totohyia bie noko zile maanle ne anu. Kpavolɛ ye ɛhye mɔɔ ɛwie mia a! Ɛhɔne nee alɔbɔlɛ ngome ɛmaa ɔ nwo ɛli kɛ silikoko. 15 Ɔvale ɔ nwo ɔhɔbetanle maanlema ne mɔ bie mɔɔ sie agbolike la anwo. 16 Ɛhɔne anyezota ngome maanle ɔ nye bolole agbolike ne mɔ aleɛ mgbane ne bɔbɔ; noko nwane a amaa ye debie a?"

17 "Na nzinlii mɔɔ awieleɛ ne wiele ye la, akee ɔzele ɔ nwo kɛ, ‘Anzɛɛ Egya ɛnlɛ ngɛkɛlɛ dɔnwo bɛnli aleɛ ɔmbo bɛ nwo zo mɔɔ akee mame mela ɛke ɛhɔne ku me ado me lɔ a! 18 "Mebahɔ egya anwo lɔ, na meahɔze ye kɛ, Egya; meyɛ ɛtane metia anwuma nee aze wɔ ɛ nyunlu, 19 na mendwu kɛ ɛkɛvɛlɛ me ɛ ra bieko bɔbɔ; emomu mesɛlɛ wɔ, fa me yɛ wɔ ngɛkɛlɛ ne mɔ anu ko ala." ’ "

20 "Ɔti amgba noko ɔzile nu kɛ ɔsia yeahɔ sua nu. Na mɔɔ ɛnee ɔtɛdua moa lɔ la, yɛɛ ɔ ze nwunle ye a. Na ɔvale ɛhulolɛ nee anwunvɔnezelɛ ɔnriandinle ɔhɔyiale ye, na ɔyɛle ye awawaatuu, na ɔvole ɔ nloa anwo.

21 "Na ɔ ra ne zele ye kɛ, ‘Egya, meyɛ ɛtane metia anwuma nee aze wɔ ɛ nyunlu; na mendwu bɔbɔ kɛ bɛkɛvɛlɛ me ɛ ra bieko.’

22 "Noko ɔ ze ammaa ɔ nloa andɔ bɔbɔ. Ɔvɛlɛle ye ngɛkɛlɛ ne mɔ bie na ɔzele bɛ kɛ, ‘Bɛmaa bɛ nwo ɛyɛ ndɛ! Bɛva aboka ngɛnlɛma kpalɛ ne ko bɛraheda ye! Eza bɛva mgbɔdelera bɛrawula ɔ sa; na bɛva mgbɔlaboa bɛrawula ɔ gyakɛ! 23 Na bɛhu nlankɛ mgbole ne mɔ mɔɔ ɛlɔ kpalɛ la anu ko bɛmaa yɛva yɛlie yɛ nye. 24 Ɔboalekɛ, me ra ɛhye, yemɔ nɔhalɛ nu, ɔwule, yɛɛ eza yezia yera ngoane nu a. Ɔminlinle bɔkɔɔ, yɛɛ eza yɛnwu ye a!’ Ɔti amgba noko bɛbɔle pilasilililɛ ne abo.

25 "Mekɛ ɛhye anu, ɛnee ɔ ra kpanyinli ne ɛlɛyɛ gyima wɔ ɛya nu lɔ. Na mɔɔ ɔwiele, na ɔba sua nu la, ɛnee ɔte kɛ anyelielɛ ɛmaa aako ne anu ɛkpudwu kɛ mgbudwu zɛhae ala. 26 Ɔti ɔvɛlɛle ngɛkɛlɛ ne mɔ ko na ɔbizale ye kɛ, ‘Na duzu edwɛkɛ a ɛzi ɛke a?’

27 "Na akɛlɛ ne buale ye zele kɛ, ‘Ɛ diema ne ɛzia ɛra bieko, yɛɛ ɛ ze ɛmaa bɛhu ɛnlankɛ bedevinli kpalɛ ne bɛlɛto ye ɛkponle a; ɔboalekɛ ɔse, ɔyɛ ye fɛ kɛ debie anyɛ ye ɛmaa yeva ɔ nwo kɔlɔɔnwo yezia yera anzondwolɛ nu a.’

28 "Ɛhye yɛle ɔ diema kpanyinli ne ɛya totohyia, ɔti ɔkpole kɛ ɔkɛhɔ sua nu bɔbɔ. Na ɔ ze rale rabodole ye dedee la, 29 ɔzele ɔ ze kɛ, ‘Asoo ɛdawɔ nea kɛ mezi meyele me nwo mezonle wɔ wɔ ɛvolɛ dɔɔnwo ɛhye mɔɔ ɛze ɛhɔ la anu a; kenle ko bɔbɔ ɛnle ɛkɛ, mɔɔ mendule me gye wɔ wɔ ɛzoanlɛ nwo a. Noko ɛtɛsele me kɛ, Fa abɔnkye ralɛ ɛhye bɔbɔ ɛ nee ɛ gɔnwo mɔ bɛva bɛlielie bɛ nye ɛlɛ. 30 Noko akee ɛ ra ɛhye mɔɔ yehɔzɛkye wɔ ezukoa wɔ mraalɛ nee ɛbɛla funli nwo la, kɛ yemɔ ɔdwu ɛke ala la, wɔmaa bɛhu ɛnlankɛ bedevinli kpalɛ ko ye mɔɔ wɔ ɛke la bɛmaa ye.’

31 "Na ɔ ze buale ye zele kɛ, ‘Awolɛ, wɔmɔ a dahuu me nee wɔ de a, ɛhye ati mɔɔ melɛ ye biala la le wɔ deɛ. 32 Noko ɔfa adenle nu kɛ yɛkɛli pilasili ɛhye. Ɔboalekɛ ɛ diema ɔ; ɔwule, yɛɛ yezia yera ngoane nu bieko a! Ɔminlinle, na yɛnwu ye!’ "