1 Na Dwuuma kpanwo mɔɔ mgbɔvonle ɛnle nu la ɛvoyia ne, ɛvoyia ne mɔɔ eza bɛfɛlɛ ye Akpabɛnwo la dwule zo mɔɔ ɔwɔ kɛ bɛdi a. 2 Ɛnee azɛlɛvolɛ mgbanyinli ne mɔ nee kɛlɛhɛlɛvolɛ mgbanyima ne mɔ ɛlɛfa Gyisɛse anwo akpame akpondɛ adenle mɔɔ bɛdua zo bɛku ye a, basabasayɛlɛ ɛnrɛra maanle ne anu la.

3 Na Abɔnsam rawolole Dwudase Yesekaleɔto, mɔɔ le ɛdoavolɛma bulu nee nwiɔ ne anu la ko anu, 4 ɔti ɔhɔle ɔhɔnwunle azɛlɛvolɛ mgbanyinli ne mɔ nee Asɔne Sua Kpole ne anu sinzavolɛ mgbanyima ne mɔ, na ɔ nee bɛ dwenlenle adenle mɔɔ ɔdua nu a ɔkɛhola ɔkɛye Gyisɛse ɔkɛmaa bɛ la. 5 Bɛ nye liele kpole kpalɛ, kɛ yeyɛ anwomoalɛ kɛ ɔkɛboa bɛ wɔ adenle ɛhye anu a, ɔti bɛbɔle ye ɛwɔkɛ kɛ bɛkɛdua ye nwolɛ kakɛ mɔɔ ɔsɛ a. 6 Ɛhye ati ɔbɔle ɔ bo kɛ ɔkpondɛ mekɛ kpalɛ yeamaa bɛ yeamaa bɛahye Gyisɛse wɔ fealera nu wɔ mekɛ mɔɔ menli dɔɔnwo ɛnle ɛkɛ la.

7 Akee Akpabɛnwo ɛvoyialilɛ ne kenle ne mɔɔ bɛku akpabɛnwo mboane ne mɔ na bɛfa bɛboka kpanwo mɔɔ mgbɔvonle ɛnle nu la anwo na bɛdi la dwule zolɛ. 8 Gyisɛse zoanle Pita nee Dwɔn kɛ, "Bɛhɔ bɛhɔziezie ɛleka mɔɔ yɛbali yɛ Akpabɛnwo ɛvoyia aleɛ ɛdeɛ ne la na bɛziezie ɛkɛ ne."

9 Bɛbizale ye kɛ, "Nienwu ɛleka a ɛkulo kɛ yɛkɔsiezie a?"

10 Na ɔbuale bɛ kɛ, "Saa bɛdwu Gyɛlusalɛm suakpole ne azo a, bɛbanwu nrenyia bie mɔɔ zo nzule buakɛ la wɔ adenle nu. Bɛdoa ye bɛhɔ aako ne mɔɔ ɔbalumua yeawolo nuhua la anu, 11 na bɛze aakomenle ne kɛ, ‘Yɛ Kilehilevolɛ ne se, ɛhile yɛ wɔ nyɛvolɛ sua ekpumgbunli ne mɔɔ wɔziezie nu wɔmaa ye mɔɔ ɔ nee ye ɛdoavolɛma ne mɔ barali bɛ Akpabɛnwo ɛvoyia aleɛ ne wɔ nu la.’ 12 Ɔ nee bɛ bahɔ esianwu kpole bie mɔɔ bɛziezie ekpumgbunli ko anu la azo, na ɛkɛ ne a bɛdabɛ noko bɛziezie aleɛ ne a."

13 Bɛhɔle suakpole ne azo na bɛhɔnwunle debie biala kɛmɔ Gyisɛse zele bɛ ala la pɛ, na bɛzieziele Akpabɛnwo aleɛ ne.

14 Mɔɔ mekɛ ne dwule la, akee Gyisɛse nee ye ɛdoavolɛma bulu nee nwiɔ ne rale na bɛ muala bɛdɛnlanle ɛkponle ko anwo.

15 Akee ɔzele bɛ kɛ, "Me nye ɛla dɔnehwele ɛhye ade ɛhye kpalɛ kpalɛ, kɛ me nee bɛ kɛli Akpabɛnwo aleɛ ɛhye kolaa na me amaneɛnwunlɛ ne abɔ ɔ bo. 16 Na akee mese bɛ nɔhalɛ nu kɛ, menrɛli ye bieko kɔkpula mekɛ mɔɔ deɛ mɔɔ ɔgyi ɛkɛ ne ɔmaa ye la kɛyɛ zɔ wɔ Nana Nyamenle Belemgbunli maanle ne anu la."

17 Akee ɔvale nwanye tɔmɛlɛ ko. Na mɔɔ ɔyilale zolɛ ɔwiele la, ɔyɛle Nana Nyamenle mo na akee ɔzele kɛ, "Bɛlie ɛhye na bɛhyɛ bɛmaa bɛ nwo. 18 Ɔluakɛ menrɛnlo nwanye ɛhye bieko kɔkpula mekɛ mɔɔ Nana Nyamenle ye Belemgbunli maanle ne kɛra la."

19 Eza ɔvale kpanwo dolɔfo ko; na mɔɔ ɔyilale zolɛ ɔwiele na ɔyɛle Nana Nyamenle mo wɔ nwolɛ la, ɔbubule nuhua nzokenzoka na ɔvale ɔmaanle bɛ muala, ɔzele bɛ kɛ, "Ɛhye a le me nwonane mɔɔ bɛlɛfa bɛamaa wɔ bɛ ɛtane ti a. Bɛli ɛhye na bɛva bɛhakye me dahuu."

20 Bɛwiele nɔsolɛ aleɛ ne di la, eza ɔvale nwanye tɔmɛlɛ ko na ɔzele kɛ, "Nwanye ɛhye a le me mogya ne mɔɔ bɛbahwi bɛagua wɔ aleɛabo amra bɛ ɛtane ti a, na yemɔ noko a le ngyehyɛlɛ fofolɛ ne mɔɔ Nana Nyamenle ɛyɛ mɔɔ balie bɛ ngoane a. 21 Bɛnlea kɛ, wɔ ɛkponledolɛ ɛhye abo, ahenle ne mɔɔ baye me amaa la wɔ yɛ avinli kɛ asɛɛ agɔnwolɛ bie la. 22 Nɔhalɛ nu mese bɛ kɛ, ɔwɔ kɛ Sonla Ra ne wu, ɔluakɛ ɔboka Nana Nyamenle ngyehyɛleɛ ne anwo. Na emomu, mɔɔ ɔlua ɔ nwo zo a bɛbaye ye bɛamaa la, ye gyakɔ!"

23 Ɛdoavolɛma ne mɔ bizebizale bɛ nwo ngoko ngoko kɛ, "Ɛnee yɛ nuhua ne boni ɔ?"

24 Akee bɛzule bɛ nuhua ne mɔɔ banyia dibilɛ kpole kpalɛ ne wɔ Belemgbunli maanle ne mɔɔ bara la anu la anwo kpolera.

25 Na Gyisɛse zele bɛ kɛ, "Aleɛabo arelemgbunli nee menli mgbole mgbole ne mɔ di bɛ ahanra ne mɔ anwo zo, na ahanra ne mɔ noko ɛnlɛ nwolɛ biala ɛhwee ɛnga, kɛ ɛhulolɛ ala a ɔwɔ kɛ bɛkulo a! 26 Na emomu wɔ bɛ avinli ɛdeɛ, bɛmaa mɔɔ sonle bɛ kpalɛ la ɛyɛ bɛ nu kpanyinli. 27 Wɔ ewiade anu; kpanyinli ne a tɛnla ɛkponle nwo na ye sonvolɛma ado ye ɛkponle a. Noko akee tɛ wɔ ɛke ɔ? Ɔluakɛ mame a mele bɛ sonvolɛ a. 28 Wɔ melɛ ala mɔɔ bɛli nɔhalɛ bɛgyinla me nzi kpundii wɔ me anwubɛnyunlu anzɛɛ amaneɛnwunle mekɛ ɛhye anu, 29 na eza noko ɔluakɛ Egya ɛva Belemgbunli maanle ɛwula me sa la ati, medame noko memaa bɛ adenle kɛkala wɔ ɛke, 30 amaa bɛali na bɛanlo wɔ me ɛkponle ne azo wɔ me Belemgbunli maanle ne anu; na bɛadɛnla arelemgbunli mbia zo na bɛabua Yizilayɛ abusua eku eku bulu nee nwiɔ ne mɔ ndɛne.

31 "Saemɔn, Saemɔn, Abɔnsam ɛbiza kɛ saa ngyengyɛne nu biala ɔ sa kɛha wɔ ɔkɛkpogya wɔ kɛ awule a, 32 noko akee mezɛlɛ memaa wɔ, amaa ɔlua zo wɔ diedi ande andɔ aze amminli. Ɛhye ati saa akee ɛfu ɛ nwo na ɛsia ɛba me ɛkɛ ne bieko a, nea maa ɛ mediema ne mɔ noko bɛ diedi ne ɛyɛ kpundii."

33 Saemɔn zele kɛ, "Awulae, meyɛ anwomoalɛ kɛ me nee wɔ bahɔ yɛahɔla efiade, ne eza bɔbɔ me nee wɔ ahɔ ewule nu." 34 Gyisɛse noko zele kɛ, "Pita, meka ye nɔhalɛ nu meahile wɔ kɛ, akɔlɛ kabɔ, ɔvi kɛkala kɔkpula ɛhyema nwonlomɔ la, ɛnee wɔkpo me fane nsa."

35 Akee Gyisɛse bizale bɛ kɛ, "Melɛ mɔɔ menzoanle bɛ kɛ bɛhɔha Edwɛkpa ne, mɔɔ ɛnee ezukoa biala ɛnle bɛ nwo, na bɛnlɛ kodoku anzɛɛ ndanlɛ gyɛne mɔɔ bɛbaheda la, kɛ bɛzile bɛdule adenle ne ɛ?"

Bɛbuale ye kɛ, "Debie biala anwo angyia yɛ."

36 Akee ɔzele bɛ kɛ, "Kɛkala, mɔɔ lɛ kodoku anzɛɛ ezukoa la ɛva. Zɔhane ala noko a, mɔɔ ɛnlɛ nrɛlande la, ɔdɔne ye ndanlɛ anzɛɛ adɛladeɛ ɔva ɔdɔ bie a. 37 Ɔluakɛ mekɛ ne ɛdwu mɔɔ ɛhye mɔ mɔɔ bɛhanle ye me nwo la ɔwɔ kɛ yɛ zɔ a, kɛ: ‘Bɛbabua ye mgbɔvodɛne kɛ kodiawu bie la!’ Ɛhɛe, debie biala mɔɔ ngapezoma ne mɔ hɛlɛle ye wɔ me nwo la bayɛ zɔ bɔkɔɔ."

38 Bɛzele ye kɛ, "Awulae, yɛlɛ nrɛlande nwiɔ wɔ yɛ nwo."

Ɔzele bɛ kɛ, "Ɔle kpalɛ!"

39 Akee ɔvile ekpumgbunli ne anu wɔ anwuma nehane ɔvindele; ye ɛdoavolɛma ne mɔ doale ye, na ɔhɔle Boka Ɔlivi azo kɛmɔ ɔyɛ ye dɛba la. 40 Wɔ boka ne azo, ɔzele bɛ kɛ, "Bɛzɛlɛ Nana Nyamenle ɛsesebɛ ɛsesebɛ ammaa bɛangɔ ngyegyelɛ nu."

41,42 Ɔvile bɛ nwo ɛkɛ ne ɔhɔle ɔ nyunlu ekyii na ɔhotole ɔ gyakɛ abonyi zo ɔzɛlɛle kɛ: "Egya, saa ɔyɛ wɔ ɛhulolɛ ɛdeɛ a, medobo wɔ, ɛnee maa dwora ɛhye ɛkpa me ti. Noko akee wɔ ɛhulolɛdeɛ ne a mekpondɛ a, tɛ me ɛhulolɛdeɛ ne ɔ."

43 Akee anwumabɔvolɛ bie vi anwuma rayele ɔ nwo hilele ye na ɔmaanle ye akɛnrazilɛ, 44 ɔluakɛ ɛnee ɔlɛdi nyane somaa yeahɔ ewule nu; ɔti ɔzɛlɛle ɛsesebɛ ɛsesebɛ ne ala, ɔlua zo ɛhɛlɛnra mɔɔ dule ye la yɛle kɛ mogya kputaa bie mɔɔ ɛlɛsonyi agua aze la. 45 Ɔwiele asɔne ne yɛ la, ɔziale ɔrale ye ɛdoavolɛma ne mɔ anwo ɛkɛ, na ɔradole bɛ kɛ, ɔlua nyane somaa ti, bɛdeda.

46 Ɔzele bɛ kɛ, "Bɛdeda ɔ? Bɛdwazo! Bɛzɛlɛ ammaa bɛangɔ ngyegyelɛ nu."

47 Mɔɔ ɔ nloa wɔ zo ɔka ɛhye la, ɛlɔne kpole bie mɔɔ Dwudase, mɔɔ le ye ɛdoavolɛma bulu nee nwiɔ ne anu ko a li bɛ nyunlu la bikyele ye. Dwudase hɔle Gyisɛse anwo ɛkɛ na ɔvole ɔ nloa anwo kɛ asɛɛ ɔsoma ye wɔ agɔnwolɛyɛlɛ nu la.

48 Gyisɛse nwunle ɛhye la ɔzele kɛ, "Dwudase, ɔti ɛkpati wɔava anloanwovolɛ wɔaye Sonla Ra ne wɔamaa ɔ?"

49 Mɔɔ ɛdoavolɛma ne mɔ mɔɔ ɛha la nwunle mɔɔ ɛlɛba arazi la, bɛzele kɛ, "Awulae, anzɛɛ yɛ nee bɛ ɛho ɔ?" 50 Na bɛ nuhua ko bɔle Sɛlɛvolɛ Kpanyinli ne sonvolɛ ne, na ɔpɛle ɔ nzo fema ne.

51 Gyisɛse zele kɛ, "Bɛmaa ɔha ɛke ala." Ɔzɔle ɛleka ne mɔɔ sonvolɛ nrenyia ne anzo ne wɔ la na ɔvale ɔbetanle ɛkɛ ne ɔyɛle ye kɛ ye dɛba ne ala la. 52 Akee Gyisɛse dendɛle bagua nu hilele azɛlɛvolɛ mgbanyima ne mɔ, nee Asɔne Sua Kpole ne anu sinzavolɛ mgbanyima ne mɔ, ɔ nee kɛlɛhɛlɛvolɛma ne mɔ mɔɔ lile menli dɔɔnwo ne anyunlu la. Ɔzele kɛ, "Mele kodiawu bie ati a bɛdedɛ nrɛlande nee ahoholombaka bɛra kɛ bɛbahye me la anzɛɛ? 53 Mengilehilele bɛ wɔ Asɔne Sua Kpole ne anu, na duzu ati a bɛangye me wɔ ɛkɛ ne a? Tɛ bɛ ɔ, ɔluakɛ melɛ ne mɔɔ Abɔnsam kile ye tumi la ɛdwu."

54 Akee bɛhyele ye, na bɛ nee ye hɔle Sɛlɛvolɛ Kpanyinli ne sua nu, na Pita lile ɔ nzi wɔ moamoa. 55 Ɛnee sogyama ne mɔ ɛhua senle wɔ ndɛneleka ne alie ne anwo bɛlɛte, na Pita rabokale bɛ nwo wɔ ɛkɛ ne, ɔluakɛ ɛnee ɛyɛlɛ mekɛ ɔ.

56 Na mɔɔ ɔde senle ne anwo la, sonvolɛ bɛlɛra bie nwunle ye; ɔnleanle ye koonwu na ɔzele kɛ; "Nrenyia ɛhye le Gyisɛse ɛdoavolɛma ne mɔ anu ko!"

57 Pita zale ɔ ne, ɔzele kɛ, "Bɛlɛra, menze ye hweledede!"

58 Ɔ nzi hyɛle ekyii la, awie bieko noko nwunle ye, na ɔzele kɛ, "Ɛdawɔ noko ɛle bɛ nuhua ko!"

Pita buale kɛ, "Yɛmenle, Kyɛkyɛ, memboka bɛ nwo."

59 Kɛyɛ dɔnehwele ko anzi, awie bieko gyinlanle zolɛ ɛsesebɛ ɛsesebɛ hanle kɛ, "Meze ye nɔhalɛ wienyi kɛ sonla ɛhye le Gyisɛse ye ɛdoavolɛma ne mɔ anu ko, ɔluakɛ bɛ mu nwiɔ bɛvi Galeli." 60 Na Pita zele kɛ, "Ayi, menze mɔɔ ɛlɛka nwolɛ edwɛkɛ la hweledede." Na mɔɔ ɔ nloa wɔ zo bɔbɔ mɔɔ ɔka ɛhye ala la, yɛɛ akɔlɛ bɔle a.

61 Mekɛ zɔhane anu, Gyisɛse hakyile ɔ nwo na ɔnleanle Pita. Akee Pita hakyele Awulae edwɛkɛ ne mɔɔ ɔhanle kɛ, "Kolaa mɔɔ akɔlɛ abɔ nwonlomɔ la, ɛnee wɔkpo me fane nsa" la. 62 Pita vindele hɔle alie nwo, na ɔhɔzunle ɔmaanle ɔyɛle alɔbɔlɛ.

63,64 Sinzavolɛma ne mɔ mɔɔ lɛ Gyisɛse anu la bɔle ɔ bo kɛ bɛsi ye amgbu. Bɛkyekyele ɔ nye amu nwiɔ na bɛbobɔle ye abotokuma; akee bɛbizale ye kɛ, "Kapezonli, nwane a bɔle wɔ a?" 65 Bɛbɔle ye aholoba na bɛhanle edwɛkɛ avunli dɔɔnwo ne ala bɛtiale ye.

66 Aleɛ hyenle na ye nwonlomɔ ne, Dwuuma Kɔɔto Kpole Kpale ne, mɔɔ azɛlɛvolɛ mgbanyima ne mɔ, nee maanle mgbanyima ne mɔ boka kɛlɛhɛlɛvolɛ mgbanyima ne mɔ wɔ nu la yiale. Bɛ nee Gyisɛse hɔle edwɛkɛlilɛ, 67,68 na bɛzele ye kɛ, "Saa wɔmɔ a ɛle Kelaese ne a ɛnee ka kile yɛ."

Ɔbuale bɛ kɛ, "Saa meka mekile bɛ a, bɛnrɛlie me bɛnrɛli, anzɛɛ bɛnrɛmaa me adenle bɛnrɛmaa menrɛva me edwɛkɛ menrɛdo gua. 69 Na ɔnrɛhyɛ biala, melɛ ne ɛlɛba, mɔɔ bɛbazoa Anyunlunyia Sonla ne belemgbunli a, na yeadɛnla Nyamenle Bedevinli ne asa fema zo."

70 Bɛ muala bɛdeɛdeanle nu bɛzele ye kɛ, "Ɔti ɛkpondɛ wɔaze yɛ kɛ, wɔmɔ a ɛle Nyamenle Ra ne anzɛɛ?"

Ɔbuale bɛ kɛ, "Ɛhɛe! Bɛdabɛ mumua ne bɛha."

71 Bɛdeanle nu bɛzele kɛ, "Yɛngyia alasevolɛ bieko anwo. Ɔluakɛ yɛdayɛ mumua ne yɛde yɛvi ɔ nloa anu."