Lucas 4

Bɛzɔ Gyisɛse bɛnlea

1,2 Na Gyisɛse vile Azule Dwɔdan ne anu, mɔɔ ɛnee Sunsum Nwuanzanwuanza ne ɛyi ye tɛkɛɛ la, Sunsum ko ne ala vale ye hɔle Dwudiya ɛsɛlɛ reserese ne azo. Na Abɔnsam zɔle ye nleanle too kenle abulanla. Zɛhae mekɛ ye amuala ɛnee ɔlɛkye ɛhɔne, ɔti nzinlii, akee ɛhɔne hunle ye kpole.

3 Na Abɔnsam zele ye kɛ, "Saa ɛdawɔ a ɛle Nyamenle Ra ne a, ɛnee kakyi bolɛ ɛhye maa ɔyɛ kpanwo."

4 Gyisɛse buale ye zele kɛ, "Bɛhɛlɛ ye wɔ Ngɛlɛlera ne anu kɛ, ‘Tɛ kpanwo angomekye a sonla di a ɔnyia ngoane a!’ "

5 Akee Abɔnsam vale ye hɔle boka bie ati zo hɔyele ewiade ye arelemgbunli maanle nee bɛ anyunlunyia muala hilele ye wɔ mekɛ ekyi bie anu; 6,7 na Abɔnsam zele ye kɛ, "Ɛhye mɔ amuala le me deɛ, yɛɛ mekola mefa memaa awie biala mɔɔ mekulo la. Ɛhye ati saa ɛkoto ɛsonle me ekyii ala a, mebava bɛ muala kpokpoti meamaa wɔ."

8 Gyisɛse buale zele kɛ, "Bɛhɛlɛ ye wɔ Ngɛlɛlera ne anu kɛ, ‘Mmasonle debie biala ɛboka wɔ Nyamenle ne anwo, na ɔ ngome ala a sonle ye a.’ "

9-11 Abɔnsam eza vale Gyisɛse vole Gyɛlusalɛm Asɔne Sua Kpole tawa ne ati zo, na ɔzele ye kɛ, "Saa wɔmɔ a ɛle Nyamenle Ra ne a, ɛnee wulu pe! Ɔluakɛ Ngɛlɛlera ne se kɛ, Nana Nyamenle bazoa ye anwumabɔvolɛma amaa bɛarazɔ wɔ bɛ sa nu ammaa ɛ gyakɛ amkpula mgbane bɔbɔ!"

12 Gyisɛse noko buale ye kɛ, "Ngɛlɛlera ne noko kile yɛ kɛ, ‘Mmasɔ wɔ Awulae Nyamenle ɛnea mgbane mgbane.’"

13 Mɔɔ Abɔnsam wiele ye sɔnea ne amuala la, akee ɔhwenle ɔ nwo ɔgyakyile Gyisɛse wɔ mekɛ ekyi bie anu na ɔhɔle.

Gyisɛse ɛbɔ ye gyima bo

14 Na Gyisɛse, mɔɔ ɛnee Sunsum Nwuanzanwuanza ne tumi ɛyi ye tɛkɛɛ la, ziale hɔle Galeli. Yeangyɛ biala ye nganeɛ zandele maanle ne anu amuala, 15 ɔlua ye nwanwane ngilehile ne mɔ wɔ ayiasua ne mɔ anu ati; ɔti awie biala hanvole ye na bɛwulale ye anyunlunyia.

16 Mɔɔ ɔrale Nazalɛte namule nu, mɔɔ le ɔdaye ye sua zo, ɛleka mɔɔ bɛtetele ye wɔ la, ɔhɔle ayiasua ne anu wɔ Folɛ anzɛɛ Ɛnwomenlelielɛ Kenle ne kɛmɔ ɔta ɔyɛ ye la; na ɔdwazole ɔgyinlanle kɛ ɔkenga Nyamedwɛkɛ ne. 17 Bɛvale Ayezaya kapezonli buluku ne bɛmaanle ye, na ɔbukele ɛleka ne mɔɔ se kɛ:

18,19 "Awulae Sunsum ne ɛdwu me nwo zo; ɔluakɛ yedu me kɛ membanga Edwɛkpa ne mengile ehyiavolɛma; eza yezoa me kɛ membankyekye bɛdabɛ mɔɔ bɛlɛdi nyane la arɛle, na menze bɛdabɛ mɔɔ bɛgua efiade la kɛ bɛbaye bɛ, yɛɛ anyezinliravolɛma kɛ bɛdabɛ noko bɛbanwu debie, na menze bɛdabɛ mɔɔ menli sisi bɛ la noko kɛ bɛbaye bɛ bɛavi bɛ kpɔvolɛma asa anu; na Nana Nyamenle noko ɛboa ɔ nwo kɛ ɔbayila bɛdabɛ mɔɔ bɛkɛra ye ɛkɛ la."

20 Akee ɔdole buluku ne anu na ɔvale ɔmaanle ahenle mɔɔ nea asɔne ninyɛne ne mɔ azo la, na ɔhɔdɛnlanle aze. Na awie biala mɔɔ wɔ ayiasua ne anu bie la anye hale ɔ nwo. 21 Ɔzele bɛ bieko kɛ, "Ɛnɛ demua ye a zɛhae Ngɛlɛlera ne ɛli munli a!"

22 Menli mɔɔ wɔ ɛkɛ ne la amuala hanvole ye, na eza noko ɔyɛle bɛ azibɛnwo kɛ ɔ nloa edwɛkɛ yɛ fɛ a. Bɛzele bɛ nwo ngoko ngoko kɛ, "Na tɛ Dwosefi ara ye ɛhye ɔ? Duzu ati a akee ɔ nwo yɛ nwanwane zɛhae a?"

23 Gyisɛse zele bɛ kɛ, "Nɔhalɛ, bɛbava ɛrɛlɛ ɛhye bɛabu me bɛaze me kɛ: ‘Ninsinli, yɛ ɛ nwo ayile ɛ’ anzɛɛ ‘Duzu ati a ɛnyɛ nwanwanendeɛ ne mɔ mɔɔ ɛyɛle bɛ wɔ Kapɛnayɛm la bie wɔ ɛdawɔ wɔ sua zo a?’ 24 Noko akee memaa bɛade ɔ bo wienyi kɛ, kapezonli biala ɛnlɛ anyunlunyia wɔ ɔdaye ye sua zo! 25,26 Memaa bɛ ndonwo: Bɛnlea kɛ ɔyɛle mɔɔ Yilaegya kapezonli ne yɛle nwanwanendeɛ vale boale Zalɛfate, kunlavolɛ raalɛ ne mɔɔ le ɛyɛvolɛ mɔɔ vi Saedɛn maanle nu la. Ɛnee Dwuuma kunlavolɛma dɔɔnwo ne ala wɔ Dwudiya maanle ne anu, mɔɔ bɛhyianle moalɛ wɔ ɛhɔne kpole bie mɔɔ zile azɛlɛ ye azo wɔ mekɛ zɔhane anu la; ɔluakɛ ɛnee ɛvolɛ nsa nee foa: kpalɛ ɛpɛ nu ɛze mɔɔ ezule biala ɛndɔ a; noko akee bɛanzoa Yilaegya wɔ ɛhye mɔ biala ɛkɛ. 27 Na eza noko bɛdwenle kapezonli Yilaehya mɔɔ yɛle Neeyaman mɔɔ le Seleanli ne ayile wɔ mekɛ mɔɔ ɛnee Dwuuma kokobɛvolɛma dɔɔnwo hyia: moalɛ la."

28 Edwɛkɛ ɛhye mɔ mɔɔ bɛdele la maanle ɛya kpole hunle bɛ; 29 ɔti bɛvale ye kɛ bɛ nee ye kɔ sua ne azo boka ne agye nu, na bɛawɔ ɔ kɔme anzi, bɛazuhu ye bɛado bɔnza ne anu bɛamaa yeatete kpasakpasa. 30 Noko ɔwolole menli ne anu ɔgyakyile bɛ ɛkɛ ne ɔhɔle.

31 Ɔziale ɔrale Galeli sua ne mɔɔ bɛfɛlɛ ye Kapɛnayɛm la azo bieko, na ɔhanle Edwɛkpa ne wɔ bɛ ayiasua ne anu wɔ mekɛ biala mɔɔ Ɛnwomenlelielɛ Kenle ne kɛdwu la. 32 Ɛke noko, eza menli ne mɔ nwunle kɛ ye edwɛkɛ mɔɔ ɔka la amuala yɛ nwanwane. Ɔluakɛ tumi wɔ ye edwɛkɛ ɛhanlɛ ne anu kɛ sonla mɔɔ ze nɔhalɛ ne, na ɔnle mɔɔ mɔɔ awie mɔ ɛha la azo yɛɛ ɔto la.

33 Kenle ko bie mɔɔ ɛnee ɔlɛkile debie wɔ ayiasua ne anu la, nrenyia bie mɔɔ bozonle ɛva ye la bɔle ɔ bo kɛ ɔteɛdea nu ɔse kɛ, 34 "Gyisɛse Nazalɛtenli, ɛvi ɛke kɔ! Duzu a yɛ nee wɔ lɛ ye a? Wɔra kɛ ɛbahu yɛ ɔ? Meze wɔ sonla holɛ; Wɔmɔ a le Nyamenle Ra Nwuanzanwuanza ne."

35 Gyisɛse deanle ye nu zele kɛ, "Yɛ koonwu! Ɛvi ye nu finde!" Na amgba noko bozonle ne pɛle nrenyia ne dole ye aze na ɔvindele nyaa ɔhɔle.

36 Ɛhye zinle menli ne anwo totohyia, na bɛbizale kɛ, "Na duzu bɔbɔ a wɔ nrenyia ɛhye edwɛkɛhanlɛ nu a, mɔɔ ɔti awozonle bɔbɔ tie ye a?" 37 Ɔti yeangyɛ yɛɛ ye nganeɛ zandele maanzinli ne anu amuala a.

38 Mekɛ mɔɔ ɔvi ayiasua ne anu wɔ zɔhane kenle ne la, ɔhɔle Saemɔn sua nu, na ɔhɔdole kɛ ebunlu ɛhye Saemɔn azebɛla ne, ɔti bɛbodole ye kɛ ɔyɛ ye ayile.

39 Ɔhɔgyinlanle raalɛ ne ɛsokpa ne anwo na ɔdendɛle wɔ tumi nu ala ɔguale ɔ nwo zo, na ɛkɛ ne ala, ebunlu ne mɔɔ ɛhye ye la amgba noko vile ɔ nwo dule bɔkɔɔ, ɔti ɔdwazole foa, na ɔrazonlenle bɛ.

40 Ye nɔsolɛ nu mɔɔ sɛnzɛne ne ɛlɛkɔ ahɔdɔ la, sua ne azo amra mɔɔ lɛ awuliravolɛ la zoale bɛ muala rɛlɛle Gyisɛse; na amgba noko ɔvale ɔ sa ɔtotole bɛ nwo zo ngoko ngoko na ɔyɛle bɛ ayile. 41 Na awozonle vile menli dodo ne ala nu dule, na bɛdeɛdeanle nu bɛzele kɛ, "Wɔmɔ a le Nyamenle Ra ne a." Na kɛmɔ bɛze kɛ yemɔ a le Kelaese ne la ati, yeammaa bɛ adenle yeammaa bɛandendɛ.

42 Aleɛ hyenle nwonlomɔ ne la, ɔhɔle ɛsɛlɛ ne azo. Menli dodo ne kpondɛle ye dedee, na nzinlii mɔɔ bɛnwunle ye la, bɛbodole ye kɛ ɔmmakɔ, na ɔ nee bɛ ɛdɛnla Kapɛnayɛm ɛkɛ. 43 Na ɔzele bɛ kɛ "Ɔwɔ kɛ mekɔ mekɔka Nana Nyamenle Belemgbunli Maanle ne anwo Edwɛkpa ne mekile ɛleka bie amra noko, ɔluakɛ ɛhye ati a bɛzoanle me a." 44 Ɔti ɔhɔle zo ɔkpɔsale Dwudiya maanle ne anu amuala ɔhanle Edwɛkpa ne wɔ ayiasua ne mɔ anu.