Marcos 12

Adawu adawu mɔɔ Gyisɛse bɔle la

1 Mrɛlɛbulɛ nwɔra ne mɔ mɔɔ Gyisɛse dole hilele menli ne mekɛ ne anu la bie mɔ ɛne: "Nrenyia bie yɛle ye nwanye tola bie na ɔliele nwolɛ bane, na ɔvunle kuma mɔɔ ɔbahwihwi bakama ne mɔ anu nzule yeagua nu la, na ɔzile esianwu ɔmaanle ɛya sinzavolɛ ne. Akee ɔhyɛle ɛya ne ɔmaanle ɛya abunsama na nzinlii ɔdule ɔvile ɛkɛ ne ɔhɔle maanle fofolɛ nu. 2 Mɔɔ ma ɛdelɛ mekɛ dwule zo la, ɔzoanle ye menli ne mɔ anu ko wɔ ɛya abunsama ne mɔ ɛkɛ kɛ ɔhɔlie ye afoa nu deɛ ɔrɛlɛ ye. 3 Na ɛya abunsama ne mɔ bolɛ nrenyia ne mɔɔ bɛzoanle ye la, na bɛmaanle ɔvale ɔ sa mgbane ɔziale ɔhɔle.

4 "Ɛya ne amenle ne zoanle sonla fofolɛ, na ɔdaye noko ɔnwunle anwubɛnyunlu zɔhane ko ne ala mɔɔ ɔdɛlale alumua ɛdeɛ ne bɔbɔ a, ɔluakɛ, bɛbole ye kpole kpalɛ too bɛbodale ɔ ti bɔbɔ. 5 Sonla fofolɛ bieko mɔɔ ɔzoanle ye la ɔdaye noko bɛhunle ye kpatalakpa; yɛɛ nzinlii ɛdeɛ noko mɔɔ ɔzoanle bɛ la yemɔ saa bɛambo bɛ a, bɛhunle bɛdabɛ hɔkpulale 6 kɛ ɔhale sonla kokye ɔdaye mumua ne ɔ ra nrenyia kokye ne. Ɔzoanle ɔdaye noko, na ɔdwenlenle kɛ yemɔ bɛkɛva bɛ nidi muala bɛkɛmaa ye.

7 "Na mɔɔ ɛyazonlɛma ne mɔ nwunle ye kɛ ɔlɛba la, bɛzele kɛ ‘Koliagya ne a ɛlɛba la. Bɛmaa yɛhu ye, na akee ɛya ne ayɛ yɛ deɛ!’ 8 Ɛhye ati bɛhyele ye bɛhunle ye na bɛvuandinle ye sonlabaka mumua ne bɛdole ye lɔ wɔ nwanye tola ne anzi.

9 "Duzu a ɛdwenle kɛ saa nwanye tola ne amenle te wɔ ɛhye anwo a ɔkɛyɛ a? Ɔbara yearahu bɛ muala noko, na yeava nwanye tola ne yeawula menli fofolɛ asa anu. 10 Yemɔti bɛngakye kɛ bɛgenga ɛhye wɔ Ngɛlɛlera ne anu ɔ? ‘Bolɛ ne mɔɔ suasivolɛma ne mɔ kpole ye la yemɔ a rayɛle kodoka zo bolɛ, mɔɔ bɛye ye nu a ɔnyɛ boɛ a! 11 Ɛhye le Awulae ngyehyɛleɛ mɔɔ yɛ azibɛnwo kɛ yɛkɛnwu ye yɛ nye zo a.’ "

Akpɔvolɛ zɔle Gyisɛse nleanle

12 Dwuuma mgbanyima ne mɔ hulole kɛ bɛkɛhye ye ɛkɛ ne ala, kɛ yeva adawu ɛhye yeha bɛ edwɛkɛ a, ɔluakɛ bɛnwunle ye kofee kɛ bɛmɛ a ɔ nee bɛ a, kɛ bɛmɛ a bɛle ɛya abunsama atisesebɛvoma ne mɔɔ wɔ ye adawu ne anu la a. Na ɔlua ɛzulolɛ mɔɔ bɛnyianle ye kɛ menli ne mɔ barateta bɛ la ati, bɛzulole kɛ bɛkɛzɔ ye nu. Yemɔti bɛgyakyile ye ɛkɛ na bɛhɔle. 13 Na bɛzoanle Falasiima nee Hɛlɔdianema, mɔɔ bɛle Nyamenlezonlenlɛ nee maanlebulɛ nwo eku la, kɛ bɛhɔzɔ ye bɛnlea wɔ edwɛkɛbizalɛ nu, amaa bɛanyia debie bɛaha bɛatia ye wɔ ye ɛdendɛlɛ nu mɔɔ ɔlua zo a bɛ sa baha ye bɛahye ye a.

14 Na menli ɛhye mɔ noko hɔle la bɛzele ye kɛ, "Kilehilevolɛ, yɛze kɛ Wɔmɔ ɛka nɔhalɛ ne bɔkɔɔ! Ɛnva sonla ɛnyɛ ɛhwee, yɛɛ ɛnnea sonla nyunlu, na emomu Awulae Nyamenle nɔhalɛ adenle ne ala a ɛkilehile a. Ɛhye ati ka kile ye, ɔfa mɛla nu kɛ yɛkɛdua adwule yɛkɛmaa Wulumu Arane ne anzɛɛ?"

15 Gyisɛse nwunle bɛ nzi na ɔzele bɛ kɛ, "Bɛva dwɛtɛ ne bie bɛmaa menea, na mebahile bɛ."

16 Na mɔɔ bɛvale bɛmaanle ye la, ɔbizale bɛ kɛ, "Na nwane nvoninli nee amodinli a gua dwɛtɛ ye azo la?" Bɛbuale ye kɛ, "Belemgbunli Siza ɛdeɛ ɔ."

17 Gyisɛse zele bɛ kɛ, "Saa ye deɛ a, ɛnee bɛva bɛmaa ye. Yɛɛ debie biala mɔɔ le Nyamenle deɛ noko la ɔdaye bɛva bɛmaa Nyamenle!" Gyisɛse ye azibɛnwo edwɛkɛ ɛhye maanle bɛvonvoanle bɛ ti anwo zɛhae ala.

18 Akee Sadusiima bie noko mɔɔ ka kɛ ewudwazo biala ɛnle ɛkɛ ne la, noko rale ɔ nwo ɛkɛ rabizale ye kɛ:

19 "Kilehilevolɛ, Mosisi maanle yɛ mɛla bie kɛ, saa sonla nrenyia wu na yeangyakyi mralɛ a, ɔwɔ kɛ ɔ diema nrenyia ne gya kunlavolɛ raalɛ ne na ɔ nee ye wo mralɛ wɔ ɔ diema ne duma nu. 20-22 Yɛde ɛhye. Na mediema mrenyia nsuu bie wale ɛkɛ, mɔɔ nuhua kpanyinli ne gyale raalɛ, na ɔwule la yeangyakyi mralɛ a. Yemɔti mɔɔ tia ye nwiɔ ne la gyale kunlavolɛ raalɛ ne; na yeangyɛ biala ɔwule, ɔdaye noko yeangyakyi mralɛ. Mɔɔ tia ye nsa ne noko la ɔdaye zɔhane ala, hɔkpulale kɛ bɛ muala bɛwuwule, mɔɔ biala angyakyi mralɛ a. Ɛhye amuala anzi ye, raalɛ ne ɔdaye noko ɔwule.

23 "Mɔɔ yɛkpondɛ yɛadie la a le ɛhye: ɛnee saa ewudwazo mekɛ ne dwu a boni a raalɛ ɛhye bayɛ ɔ ye a, ɔluakɛ yeyɛ bɛ nuhua ko biala aye ɛlɛ?"

24 Gyisɛse buale kɛ, "Mɔɔ gyegye bɛ la a le kɛ bɛnze Ngɛlɛlera ne, yɛɛ eza noko bɛnze Nyamenle tumi ne. 25 Saa mediema nsuu ne mɔ nee raalɛ ne noko vi ewule nu dwazo a, bɛ nuhua biala ɛnrɛhɔ agyalɛ bieko, bɛbayɛ kɛ anwumabɔvolɛma ne la pɛ.

26 "Na mɔɔ fale ewudwazo ne anwo ɛdeɛ, kɛ bɛkɛdwazo la bɛtɛkengale ye wɔ ‘Adendulɛ’ nwoma ne anu kɛ Nyamenle zile dendɛle hilele Mosisi wɔ kpɔkɛ ne mɔɔ ɛlɛyela la anu la ɔ? Nana Nyamenle zele Mosisi kɛ, ‘Mame a mele Ebileham Nyamenle ne a, eza Mame a mele Ayezeke Nyamenle ne a, yɛɛ Mame noko a mele Gyekɔbo Nyamenle ne a.’

27 "Ɛnee Awulae Nyamenle ɛlɛka ahile Mosisi kɛ menli ɛhye mɔ, mɔɔ bɛwu dɛbadɛba la tɛte ngoane nu, ɔluakɛ anrɛɛ ɔnrɛha kɛ, ɔnle mɔwuamra bɛ Nyamenle, na emomu ɔle anyewɔzo amra bɛ Nyamenle! Na mese bɛ kɛ, bɛvo kpole kpalɛ."

28 Na kɛlɛhɛlɛvolɛma ne mɔ ko mɔɔ ɛnee gyi ɛkɛ ne bie na ɔlɛtie edwɛkɛ nzuzuleɛ ne bie la nwunle kɛ Gyisɛse ɛmaa bɛ nyelebɛnloa kpalɛ bɔkɔɔ. Ɔti ɔbizale ye kɛ, "Mɛla ne mɔ anu boni a hyia kpalɛ a?"

29 Gyisɛse buale kɛ, "Ko ne mɔɔ se kɛ, ‘Tie, O Yizilayɛ! Yɛ Awulae Nyamenle ne a le Nyamenle kotokokye ne a. 30 Na ɔwɔ kɛ ɛfa wɔ ahonle ne amuala, ɔ nee wɔ ɛkɛla anzɛɛ sunsum nee wɔ adwenle nee wɔ anwosesebɛ ne mɔ amuala ɛkulo ye.’

31 "Mɔɔ tia ye nwiɔ ne la a le ɛhye: ‘Ɔwɔ kɛ ɛkulo ɛ gɔnwo kɛ ɛdawɔ ɛ nwo.’ Mɛla biala ɛnle ɛkɛ mɔɔ ɔtɛla ɛhye mɔ a."

32 Na kɛlɛhɛlɛvolɛ ne noko zele ye kɛ, "Yɛmenle, wɔha nɔhalɛ ne bɔkɔɔ kɛ Nyamenle le kokye, na awie bieko ɛnle ɛkɛ, kɛ Ɔdaye ɔ ngomekye. 33 Yɛɛ meze noko kɛ ɔhyia ɔtɛla debie biala kɛ menwɔva me ahonle nee me ndelebɛbo nee me anwosesebɛ muala menwɔhulo Ye, na menwɔhulo awie biala noko kɛ medame me nwo, tɛla kɛ menwɔva azubɔndeɛ ngakyile muala menwɔhɔ azukponle ne mɔɔ wɔ Asɔne Sua ne anu la azo."

34 Mɔɔ Gyisɛse noko nwunle kɛ nrenyia ɛhye lɛ ndelebɛbo la, ɔzele ye kɛ, "Ɛ nee Nyamenle Belemgbunli maanle ne bɛ avinli ɛndwe fee zɛ." Na ɔvi zɔhane melɛ ne, awie biala angola ye edwɛkɛ biza bieko.

35 Amozi ye mɔɔ Gyisɛse kilehile wɔ Asɔne Sua Kpole ne anu la, ɔbizale bɛ edwɛkɛ ɛhye kɛ:

"Duzu ati a bɛ kɛlɛhɛlɛvolɛ mgbanyima ne mɔ ka kɛ Ngoanedievolɛ ne ɔwɔ kɛ fi Belemgbunli Devidi abusua nu a? 36 Ɔluakɛ, Devidi mumua ne lua Sunsum Nwuanzanwuanza ne anwo zo zele kɛ ‘Nyamenle zele me Awulae kɛ, tɛnla me sa fema zo ɛke, kɔkpula kɛ menwɔva wɔ kpɔvolɛma amuala menwɔyɛ ɛ gyakɛ abo ebia a.’ 37 Na saa Devidi mumua ne fɛlɛ ye Awulae a, ɛnee kɛ ɔsi mɔɔ akee ɔyɛ ɔ ra ɛ?"

Ngilenu ɛhye yɛle menli ɛwolaa ne fɛlɛko, ɔti akee bɛvale anyeliele bɛdiele ye kpalɛ.

38 Ninyɛne bieko noko mɔɔ ɔhilehilele bɛ mekɛ zɔhane anu la bie mɔ ɛne:

"Bɛnlea bɛ nwo boɛ wɔ kɛlɛhɛlɛvolɛma ne mɔ anwo! Ɔluakɛ, dahuu bɛkulo kɛ bɛwula azukoavolɛ nee nwomavoma adeladeɛ mgbole mgbole, na eza bɛkpondɛ kɛ awie biala kɛhoto bɛ wɔ mekɛ biala mɔɔ bɛlua gua zo bɔbɔ la. 39 Bɛkulo kɛ bɛtɛnlɛdɛnla mbia mgbalɛ ne mɔ azo wɔ ayiasua ne mɔ anu, ɔ nee mgbanyinli tɛnlabelɛ wɔ ɛkponledolɛ bo, 40 noko akee ɔnyɛ bɛ nyiane bɔbɔ kɛ bɛsisi ahunlavolɛ mraalɛ wɔ bɛ aako aako nu, na bɛkpati bɛyɛ nzɛlɛlɛ ndendenle ndendenle wɔ bagua nu a. Na ɔlua deɛ ɛhye noko mɔɔ bɛyɛ la ati, bɛ ndeanlɛ ɛdeɛ ne bayɛ bedevinli kpalɛ."

41 Akee ɔhɔle ɛleka mɔɔ nlɛka ne mɔ mɔɔ bɛfa bɛdielie ezukoa wɔ Asɔne Sua Kpole ne anu la gyigyi la, na akee ɔdɛnlanle aze kɛ ɔnea menli ɛwolaa ne bɛ ezukoa mɔɔ bɛlɛfa bɛaragua nlɛka ne anu la. Azukoavolɛ mɔɔ wɔ nu la vale ezukoa mgbole mgbole guale nu. 42 Na kunlavolɛ raalɛ ehyianli bie ɔdaye noko ɔrale na ɔradole nu kapɛlɛ nwiɔ.

43,44 Gyisɛse nleanle ɛhye koonwu na ɔvɛlɛle ye ɛdoavolɛma ne mɔ ɔ nwo ɛkɛ ne na ɔzele kɛ, "Kunlavolɛ raalɛ ehyianli zɔhane ɛmaa ezukoa mɔɔ bo mɔɔ azukoavolɛ ne mɔ ɛmaa mɔɔ bɛva bɛbɔ nu la azo! Ɔluakɛ, bɛmɛ mɔɔ yebu bɛ nwo zo la anu ekyi bie a bɛmaanle a, wɔ melɛ mɔɔ raalɛ ne yemɔ ɔvale ɔ ti nee ɔ bo ne amuala ɔmaanle la."