1 Mɔɔ Gyisɛse wɔ Kapɛnayɛm la, ɔhɔle ayiasua ne anu bieko, na ɔ nye bɔle nrenyia bie mɔɔ asa ɛdwe la anwo zo.

2 Kɛmɔ melɛ zɔhane ɛnee le Ɛnwomenlelielɛ Kenle la ati, Gyisɛse ye kpɔvolɛma ne mɔ nleanle ye koonwu kpalɛ kɛ saa ɔkɛyɛ ye ayile wɔ Ɛnwomenlelielɛ Kenle ne a ɛnee bɛava ɔ nwo adwenle na bɛahye ye.

3 Na Gyisɛse maanle nrenyia ne dwazole na ɔrale ɔragyinlanle menli ne mɔ anyunlu wɔ asɔne sua ne anu. 4 Na Gyisɛse dole ɔ nye ɔ nzi na ɔbizale ye kpɔvolɛma ne mɔ kɛ, "Ɔfa mɛla nu kɛ ɛkɛyɛ kpalɛ wɔ Ɛnwomenlelielɛ Kenle ne, anzɛɛ kɛ ɛkɛyɛ ɛtane wɔ nu ɔ? Kɛ ɛkɛlie menli ngoane anzɛɛ kɛ ɛkɛhu bɛ ɔ?" Na bɛ nuhua biala ambua ye bie. 5 Akee ɔvale ɛya ɔnleanle bɛ muala ɔyiale, ɔluakɛ ɛnee ye ɛbolɛ ɛlɛte wɔ bɛ ahonle ɛsesebɛ ne mɔ ati. Na akee ɔzele nrenyia ne kɛ, "Tenrɛ ɛ sa ne anu!" Nrenyia ne noko yɛle zɔhane, na ɛkɛ ne ala ɔ sa ne yɛle kɛ ye dɛba ne ala la.

6 Na ndɛndɛ ne ala Falasiima ne vindele hɔle hɔyiale Hɛlɔdiama ne na bɛvale akpame, kɛ ɔkɛyɛ na bɛ sa aha Gyisɛse bɛahu ye la. 7,8 Wɔ mekɛ ɛhye anu, Gyisɛse nee ye ɛdoavolɛma ne mɔ noko hwenle bɛ nwo hɔle ɛnweazo lɔ; na menli dɔɔnwo mɔɔ vi Galeli, Dwudiya, Gyɛlusalɛm, Ayedumia, nee Azule Dwɔdan ne anzi moamoa lɔ nee Taya nee Saedɛn noko la doale ye. Ɔluakɛ ye nwanwane ninyɛne mɔɔ ɛnee ɔlɛyɛ la anwo adawu ɛdɛlɛ ɛdwu moa na bɛkulo kɛ bɛnwu ɔdaye mumua ne bɛ nye zo. 9 Na ɔzele ye ɛdoavolɛma ne mɔ kɛ bɛkpondɛ ɛlɛne bɛmaa ye bɛmaa ɔgyinla nu amaa menli dɔɔnwo ne ambantietia ɔ nwo zo. 10 Ɔluakɛ, ɛnee yemaa wuliravolɛma dɔɔnwo ne ala anwo ɛza kenle ko zɔhane, na ɔlua zo, bɛ dɔɔnwo ne ala noko ɛrabɔ ɛyia ye na bɛkulo kɛ bɛka ye.

11 Na awie biala mɔɔ bozonle ɛva ye la nwu ye ala a ɛnee yepɛ yefi na ɔlɛteɛdea nu kɛ, "Wɔmɔ a ɛle Nana Nyamenle Ara ne a!" 12 Noko yemɔ ɔbɔle bɛ kɔkɔ ɛsesebɛ ɛsesebɛ ne ala kɛ bɛmmada ye ali bɛkile awie biala.

13 Nzinlii ɔhɔle awoka ne mɔ azo na ɔvɛlɛle bie mɔ mɔɔ ɔkpondɛ bɛ la, na ɔmaanle bɛrale ɔ nwo ɛke ne. 14,15 Na akee ɔyɛle bɛ nuhua bulu nee nwiɔ, mɔɔ ɔdonle bɛ duma ɛdoavolɛma la, kɛ bɛraboka ɔ nwo, na ɔzoa bɛ ɔmaa bɛhɔha edwɛkpa ne, na bɛva ye tumi bɛdu awozonle. 16-19 Bulu nee nwiɔ ne mɔɔ ɔyele bɛ la anluma a le ɛhye mɔ: Saemɔn, mɔɔ ɔdonle ye duma Pita la, Gyemise nee Dwɔn, mɔɔ bɛ ze a le Zɛbɛdi, na Gyisɛse yemɔ ɔvɛlɛle bɛ "Ezule ɛhululɛ amra la," Andelu, Felepe, Baatɔlomiyu, Mateyu, Tɔmase, Gyemise, mɔɔ ɔ ze a le Alefiyɛse la, Tadease, Saemɔn, maanlebulɛ eku ne mɔ ko anu sonla mɔɔ ɛnee ɔlɛbɔ mɔdenle kɛ bɛkɛdu Wulome Arane ne bɛkɛgua la, ɔ nee Dwudase Yesekaleɔto, mɔɔ nzinlii ɔyele ye ɔmaanle la.

20 Na ɔziale ɔhɔle sua nu la menli dɔɔnwo ne bɔle ɔ bo kɛ bɛyia ɛkɛ ne bieko, na yeangyɛ biala nyɛvolɛ yile ɛkɛ ne fetee zɛhae, mɔɔ ɔlua zo yeannyia adenle yeamkpula ɔ sa bɔbɔ a. 21 Na mɔɔ ɔ gɔnwo mɔ dele ɛhye la, bɛrale kɛ bɛbɔ mɔdenle bɛahye ye bɛ nee ye ahɔ sua nu. Bɛzele kɛ, "Kabezɛ ɔlɛbɔ ɛlane."

22 Na Dwuuma ahilehilevolɛ mɔɔ ka Nyamedwɛkɛ ne mɔɔ ɛnee vi Gyɛlusalɛm ɛra ɛkɛ ne la zele kɛ, "Yɛ amaneɛ a le kɛ Abɔnsam ɛwolo ye nu. Yemɔti a awozonle bɔbɔ tie ye la."

23 Gyisɛse vɛlɛle menli ɛhye mɔ maanle bɛrale ɔ nwo ɛkɛ, na ɔbule bɛ ɛrɛlɛ kɛ, "Kɛ Abɔnsam si kola tu Abɔnsam ɛ? 24 Belemgbunli maanle mɔɔ kpakye ye nu nwiɔ tia ɔ nwo la golo gua. 25 Yɛɛ aako noko mɔɔ foa ko kɛho kɛtia foa ko la ɔdaye ɔbɔ. 26 Na saa Abɔnsam dwazo ko tia ɔ nwo a kɛ ɔkɛzi ɔkɛyɛ na yeanyia debie ɛ? Saa ɔba ye zɔ a ɔnrɛli agyinla. 27 Awie biala ɛngola ɛngɔ sonla anwosesebɛvolɛ sua nu ɛngɔnzɛkye ye ninyɛne, kyesɛ ɔdumua ɔkyekye ahenle ne kolaa na yeahola yeawua ye ninyɛne ne.

28 "Nɔhalɛ nu mese bɛ kɛ, saa bɛkɛva ɛtane biala bɛkɛhyɛ dasanli bɔbɔ a, ɛnee tɛ mɔɔ bɛyɛ bɛtia Sunsum, Nwuanzanwuanza ne la ɔ! 29 Awie biala mɔɔ kɛdendɛ ɛtane kɛtia Sunsum Nwuanzanwuanza ne la, yemɔ bɛnrɛva ye ɛtane bɛnrɛhyɛ ye ɛlɛ, ɔluakɛ, ɔle ɛtane mɔɔ ɔnlɛ awieleɛ a."

30 Ɔhanle ɛhye ɔhilele bɛ, ɔboalekɛ ɛnee bɛlɛkeha kɛ, ɔfa Abɔnsam tumi a ɔyɛ ye nwanwanendeɛ ne mɔ a, na tɛ Sunsum Nwuanzanwuanza ne tumi ne ɔ.

31,32 Na ɔ nli nee ɔ mediema ne mɔ rale ɛleka mɔɔ ɛnee ɔlɛkile debie mɔɔ menli dɔɔnwo ɛyi ɛkɛ ne la, na bɛzoanle kɛ, bɛhɔvɛlɛ ye bɛmaa ɔvinde alie nwo na bɛ nee ye ɛdendɛ. Menli dɔɔnwo ne noko dɛnlanle ɔ nwo ɛkɛ ne, na bɛzele ye kɛ, "Nea, ɛ nli nee ɛ mediema mrenyia ne mɔ kulo kɛ bɛnwu wɔ wɔ alie nwo nehane."

33 Ɔbuale bɛ kɛ, "Ɔmɔ a le nwane? Yɛɛ me mediema ne mɔ noko a le nwane mɔ?" 34 Akee ɔdole ɔ nye ɔnleanle menli mɔɔ ɛbɔ ɛyia ye la, na ɔzele kɛ, "Me nli nee me mediema mrenyia ne mɔ a le ɛhye mɔ! 35 Awie biala mɔɔ yɛ Nana Nyamenle ɛhulolɛdeɛ la yemɔ a le me diema nrenyia, nee me diema raalɛ nee me nli a."