1 Ɔziale ɔrale ɛnwea ne azo kɛ ɔbahilehile bieko. Na menli dɔɔnwo bie eza dule twi rayiale ɛkɛ ne. Ɛhye ati ɔvole ɛlɛne nu na ɔdɛnlanle aze na akee ɔdendɛle ɔhilele bɛ. 2 Na ɔbule mrɛlɛ dɔɔnwo ɔvale ɔhilehilele bɛ ɔzele kɛ:

3 "Bɛdie! Ɛyazonlɛnli bie hɔle kɛ ɔkagua ye awule wɔ ye ɛya nu. Na mɔɔ ɔgua la, 4 bie mɔ guale adehanle ne, na nloma rale rasusole. 5,6 Bie mɔ noko guale awozaka nu. Bɛfifile ndɛndɛ ɛdeɛ, noko akee kɛmɔ ɛnwea ne le ekyi la ati ewia ne yelale bɛ. 7 Bie mɔ noko guale mbowule nu. Na mbowule ne wowɔle bɛ ɔlua zo bɛangola ma so. 8 Na ma ne mɔ bie guale azɛlɛ kpalɛ zo na bɛzole ma dɔɔnwo: bie deɛ mɔnwo abulasa, bie deɛ mɔnwo abulasia; yɛɛ bie deɛ mɔnwo ɛya. 9 Akee ɔzele bɛ kɛ, ‘Mɔɔ lɛ ɛnzolɛ tie la, bɛmaa ɔdie!’ "

10 Nzinlii mɔɔ ɔhale ɔ ngome nee Bulu Nee Nwiɔ ne nee ye ɛdoavolɛma mɔɔ ɛha la bɛbizale ye kɛ, "Na wɔ adawu ne abo a le duzu?"

11,12 Na ɔbuale bɛ kɛ, "Bɛmɛ bɛlɛ adenle kɛ bɛkɛnwu Anwuma belemgbunli maanle ne anwo nɔhalɛ ne mɔɔ bɛye bɛvea bɛdabɛ mɔɔ bɛnle Belemgbunli maanle ne anu la bie. Kɛmɔ kapezonli Ayezaya hanle la: ‘Bɛkɛde na eza bɛkɛnwu ye ɛdeɛ, noko akee bɛnrɛde ɔ bo anzɛɛ bɛnrɛra Awulae Nyamenle ɛkɛ, anzɛɛ bɛnrɛva bɛ ɛtane bɛnrɛhyɛ bɛ.’ 13 Na saa bɛnde ɛrɛlɛ ɛhye bɔbɔ abo a, ɛnee akee ɛrɛlɛ ne boni a bɛbade ɔ bo a?

14 "Ɛyasovonli ne mɔɔ menganle ye edwɛkɛ la yemɔ a le awie biala mɔɔ ɔka Awulae Nyamenle Edwɛkpa ne ɔkile awie mɔ, na ɔbɔ mɔdenle kɛ ɔkɛlua ma kpalɛ wɔ bɛ ɛbɛlabɔlɛ nu la. 15 Adehanle ketekete ne mɔɔ ma ne mɔ bie guale la, gyi ɛkɛ maa bɛdabɛ mɔɔ bɛ ahonle ne mɔ yɛ se la, ɔluakɛ bɛte Edwɛkpa ne ala a ɛnee Abɔnsam ɛrabɛlɛbɛla bɛ ndɛndɛ ne ala ɛmaa bɛ rɛle ɛvi ye bɔkɔɔ. 16,17 Awozaka ɛnwea ne kile bɛdabɛ mɔɔ bɛ ahonle ne mɔ yɛse, na bɛfa fɛlɛko bɛtie Edwɛkpa ne, na ɔluakɛ, bɛle kɛ mbaka mralɛ mɔɔ bɛlua bɛ wɔ zɛhae ɛnwea nu la ati, bɛ ndinli ne mɔ ɛngɔ moa la; kɛ bɛtwi bɛ nyunlu ekyi la ɛnee bɛhwe bɛ nzi.

18 "Mbowule azɛlɛ ne gyi ɛkɛ maa bɛdabɛ mɔɔ bɛdie Edwɛkpa ne bɛsie bɛ ahonle nu, 19 noko akee ɔlua ewiade ɛhye anu fɛlɛkolilɛ, nee ye anyiabɛnwo ɛhulolɛ, nee menli nyunlu ngɔzo ti, Edwɛkpa ne ɛnnyia adenle ɛmboa bɛ ahonle ne mɔ anu la.

20 "Azɛlɛ kpalɛ ne gyi ɛkɛ maa bɛdabɛ mɔɔ bɛfa Edwɛkpa ne bɛsie bɛ ahonle nu nɔhalɛ nu na bɛso nwolɛ ma mɔnwo mɔnwo bɛmaa Nyamenle, bie abulasa, bie abulasia, anzɛɛ ɛya bɔbɔ la." 21 Akee ɔbizale bɛ kɛ, "Asoo awie sɔ kɛnlaneɛ a, ɔfa ɛlɛka ɔbutu zo ɔmaa ɔsi wienyi ne adenle ɔ? Ɛhye yemɔ Kyɛkyɛ! Bɛfa kɛnlaneɛ bɛsie debie zo wɔ anwuma amaa yeada na eza nwolɛ ara nvasoɛ.

22 "Debie biala mɔɔ wɔ fealera nu ɛnɛ la bala ali kenle bie. 23 Saa bɛlɛ ɛnzolɛ a ɛnee bɛdie. 24 Na bɛva mɔɔ bɛte noko la bɛbɔ bɛ ɛbɛla. Bɛyɛ ɛhye dɔɔnwo dɔɔnwo a yɛɛ bɛkɛde mɔɔ meka mekile bɛ la abo a. 25 Mɔɔ lɛ bie la bɛbazɔ ye zo; na mɔɔ ɛnlɛ bie la, bɛbaza ye bɛalie ye deɛ ekyi ne bɔbɔ mɔɔ ɔlɛ la bɛavi ɔ sa nu.

26 "Eza ɔbule Anwuma belemgbunli maanle ne anwo ɛrɛlɛ bieko ɔzele kɛ:

"Ɛyasovonli bie guale ma wɔ ye ɛya nu, 27 na ɔhɔle. Nzinlii, ma ne nyinle mɔɔ ɛnee ɔnze nwolɛ edwɛkɛ biala a. 28 Ɔluakɛ azɛlɛ ne azo ɛva ne a maanle ma ne mɔ fifile a. Alumua ne nya vindele, nzinlii akee ɔbɔle ndotolo, ma noko rale; na amozi ye ɔbolole sɔɔnwo zɛ. 29 Akee ɛyasovonli ne vale ye nrɛlande na ɔrabule."

30 Na Gyisɛse bizale bɛ kɛ, "Kɛ menzi menga Anwuma belemgbunli maanle ne anwo edwɛkɛ ɛ? Duzu ɛrɛlɛ anzɛɛ adawu a menva mendo nwo a? 31,32 Ɔle kɛ dubinli ma la! Yemɔ a le ma ne mɔ anu nretee kpalɛ a, noko ɔnyi ɔbayɛ mbaka mgbole ne mɔ anu ko, na ɔyɛ ngane ndendenle dɔɔnwo mɔɔ nloma yɛ bɛ sane wɔ nu na bɛanyia ɛleka bɛala la."

33 Ɔvale zɛhae mrɛlɛ dɔɔnwo ɔhilehilele menli ne mekɛ dɔɔnwo ne ala kɛmɔ bɛkɛhola ɔ bo te la. 34 Nɔhalɛ, ɔvale mrɛlɛbulɛ ngome ala a ɔhilehilele bɛdabɛ menli dɔɔnwo ne a, na nzinlii, saa ɔka ɔ ngome nee ye ɛdoavolɛma ne mɔ a, yɛɛ akee ɔkile mrɛlɛ ne mɔ abo ɔkile bɛ a.

35 Na mɔɔ ɛnee maanle nu ɛlɛba aramua la, Gyisɛse zele ye ɛdoavolɛma ne mɔ kɛ, "Bɛmaa yɛpɛ azule tandane ne yɛhɔ ɔ nzi lɔ noko." 36 Ɔti bɛvale ye wɔ ɛlɛne nu, na bɛgyakyile menli dɔɔnwo ne mɔ wɔ ɛkɛ, noko akee menli ne bie mɔ doale bɛ wɔ nlɛne nu. 37 Na yeangyɛ biala ahumu ɛzulolɛ bie dule. Azɛlɛkye mgbole mgbole bie bɔle bɛ bo kɛ bɛkɔ ɛlɛne ne anu, mɔɔ anrɛɛ bɛyi ye a, na ɔlua zo anrɛɛ ɛlɛne ne noma bɔbɔ! 38 Mekɛ ɛhye anu, ɛnee Gyisɛse ɛva esumi ɛzɔ ɔ ti na yela wɔ ɛlɛne ne ako abo nehane. Bɛvale ɛzulolɛ bɛdunwuele ye, na bɛdeɛdeanle nu bɛzele ye kɛ, "Awulae, na asoo ɔnvale ɛ nwo bɔbɔ kɛ asɛɛ yɛ muala yɛkpondɛ yɛanloma ɔ?"

39 Akee ɔdeanle ahumu ne nu na ɔzele nyevile ne kɛ, "Gyinla dii!" Na anwoma ne anloa bɔle aze, na ɛkɛ ne yɛle kɛnlanana zɛhae!

40 Akee ɔbizale ye ɛdoavolɛma ne mɔ kɛ, "Duzu ati a bɛ ahonle dule zɛ a? Yemɔti bɛnlɛ diedi biala wɔ me nu ɔ?"

41 Na azibɛnwo hanle bɛ muala na akee bɛzele bɛ nwo ngoko ngoko kɛ, "Duzu sonla a le ɛhye, mɔɔ ahumu nee nyevile bɔbɔ tie ye a?"