Marcos 7

Asɔne mgbanyima ne mɔ vunvuanle Gyisɛse anwo edwɛkɛ nu

1 Kenle ko bie Dwuuma azɛlɛvolɛ mgbanyima ne mɔ bie vi Gyɛlusalɛm rale kɛ bɛbavunvua Gyisɛse anwo edwɛkɛ nu. 2 Na bɛnwunle kɛ ye ɛdoavolɛma ne mɔ bie ɛnli Dwuuma aleɛlilɛ nwo mɛla ne azo. 3 Ɔluakɛ, Dwuuma, bɔbɔ Falasiima ne mɔ, ɛnli aleɛ wɔ mekɛ mɔɔ bɛtɛwowole bɛ sa anwo too mɔɔ kɔ bɛ awane zo la, kɛmɔ bɛ mɛla dɛba ne se la. 4 Yemɔti saa bɛvi gua zo bɛba na bɛtɛyɛle ɛhye a, bɛnzɔ aleɛ nu. Ɛhye le bɛ tete amaamuo ne mɔ anu ndonwo ko ala, mɔɔ bɛyɛ ye nzonlɛ mekɛ tendenle ne ala na bɛtedi zolɛ noko a, yɛɛ bie noko a le mbuakɛ, ahyɛnze nee pɛlɛte pɛlɛte mɔ ɛkpudalɛ ɛvoyia ne.

5 Ɛhye ati Dwuuma azɛlɛvolɛ mgbanyima ne mɔ bizale ye kɛ, "Duzu ati a wɔ ɛdoavolɛma ne mɔ ɛnli yɛ tete mɛla ne mɔ azo a? Ɔluakɛ bɛnwowo bɛ sa anwo kolaa na bɛali aleɛ."

6,7 Gyisɛse buale bɛ kɛ, "Bɛmɛ adalɛ nabalabama! Kapezonli Ayezaya hanle bɛ nwo edwɛkɛ nɔhalɛ ne bɔkɔɔ kɛ, ‘Menli ɛhye mɔ fa bɛ nloa kanvo Awulae, noko akee bɛnlɛ ɔ nwo ɛhulolɛ fee zɛ. Bɛ ɛzonlenlɛ ne le gyɛne, ɔluakɛ bɛka bɛtu bɛ nwo kɛ Nana Nyamenle a yele menli ne mɔ ketee maa bɛdi bɛ mɛla ngyikyi ngyikyi ɛhye mɔ azo a.’ Ayezaya amgba hanle nɔhalɛ ne bɔkɔɔ! 8 Ɔboalekɛ, bɛbu bɛ nye bɛgua Nana Nyamenle mɛla titili ne mɔ azo, na bɛfa bɛdabɛ bɛ ti anwo amaamuo bɛsie ɔ bo zo. 9 Bɛtietia Nyamenle mɛla ne mɔ azo na bɛkpo kɛ bɛkɛli zo ɔlua tete amaamuo ti.

10 "Bɛnlea ɛhye bɔbɔ: Mosisi vale Nyamenle mɛla ɛhye maanle bɛ kɛ, ‘Di ɛ ze nee ɛ nli eni’ Na ɔzele kɛ awie biala mɔɔ kɛdendɛ kɛtia ɔ ze anzɛɛ ɔ nli la ɔwɔ kɛ ɔwu. 11 Noko bɛmɛ bɛse, saa awie se ɔnrɛnlea ye awovolɛma na ɔka kɛ, ‘Mɔɔ anrɛɛ menwɔva menwɔmaa bɛ la a meva memaa Nyamenle la’ a, ɛnee bɛse ɔfa mɛla nu. 12,13 Ɔba ye zɔ noko a, ɛnee ɔkile kɛ bɛlɛbu Nyamenle mɛla ne azo wɔ bɛdabɛ bɛ-sa anloa amaamuo ngyehyɛleɛ ti. Na ɛhye le ndonwo ko ala. Dɔɔnwo ne ala wɔ ɛkɛ."

14 Akee Gyisɛse vɛlɛle menli dɔɔnwo ne zele bɛ kɛ, "Bɛ muala bɛdie, na bɛnyia ndelebɛbo. 15,16 Tɛ debie mɔɔ bɛdi la a gua bɛ nwo evinli a, na emomu mɔɔ bɛdwenle nwo nee mɔɔ bɛka la ɔ!"

17 Na ɔvile menli dɔɔnwo ne anye zo ɔhɔle sua nu la, ye ɛdoavolɛma ne mɔ bizale ye edwɛkɛ ne mɔɔ ɔhanle la abo.

18 Na ɔbizale bɛ kɛ, "Ɔti bɛdabɛ noko bɛnde ɔ bo ɔ? Bɛngola bɛnnwu kɛ mɔɔ bɛdi la ɛnrɛhola ɛnrɛgyegye bɛ ɛkɛla ne mɔ ɔ? 19 Ɔluakɛ aleɛ mɔɔ bɛdi la nee bɛ ahonle ne ɛnyia nu, na emomu, ɔdua ɛkolɛ nee anyanlɛ ne anu dedee yɛɛ ɔfinde wɔ bakazohɔlɛ nu a."

20 Na ɔhanle ɔzɔle zo kɛ, "Mɔɔ vi adwenle nu ba la a gua sonla nwo evinli a. 21 Ɔluakɛ menli ahonle ne mɔ anu a ɛtane ɛhye mɔ: ɛhulolɛ funli, awuleyɛlɛ, sonlahunlɛ, awuvolɛvalɛ, 22 awie mɔ debie mɔɔ tɛ wɔ deɛ la ɛkpondɛlɛ, adwenle nzuzulɛ ɛtane, ɛbɛlɛbɛlalɛ, ɛkpɔlɛ mgbane mgbane, anyeboloyɛlɛ, ndɛneyelɛ, mgbanyizonleyɛlɛ, nee ngoaseade anzɛɛ ɛdindanlɛ muala vi ba a. 23 Ninyɛne evinli evinli ɛhye mɔ amuala vi sonla ahonle ne anu a ba a; na bɛmɛ noko a bɛgua sonla nwo evinli wɔ Nana Nyamenle anyunlu a."

Ye nyɛleɛ biala yɛ azibɛnwo

24 Akee Gyisɛse vile Galeli na ɔhɔle Taya nee Saedɛn maanzinli ne anu; na ɔbɔle mɔdenle biala kɛ ɔfea ɔ nwo, noko akee yeanyɛ boɛ. Na kɛmɔ ɔde ye dɛba ne ala la, ye ɛralɛ ne anwo edwɛkɛ zandele ndɛndɛ ne ala.

25 Na ɛkɛ ne ala raalɛ bie vale ɔ ra raalɛ mɔɔ bozonle ɛwolo ye nu la rɛlɛle ye. Ɛnee yede Gyisɛse nganeɛ, ɔti ɔrapɛle ɔfinle ɔ nyunlu ɛkɛ, 26 na ɔbodole ye kɛ ɔmaa bozonle ne ɛvi ɔ ra ne nu. (Na raalɛ ɛhye noko "ɛnle Dwuunli" ɔle ɛyɛvolɛ bie mɔɔ, ɔvi Fonehyea wɔ Selea maanle nu a).

27 Ɛhye ati Gyisɛse zele ye kɛ, "Ɔwɔ kɛ medumua meboa me abusua, Dwuuma ne mɔ. Ɔnva mɛla nu kɛ menwɔva ngakula aleɛ mɔnwɔmaa ndwea a."

28 Raalɛ ne buale ye kɛ, "Yɛmenle, ɛhye le nɔhalɛ, noko akee ndwea mralɛ ne mɔ bɔbɔ mɔɔ gua ɛkponle ne abo la, ɔyɛ a bɛfa mgbokpoleka ne mɔɔ vi ngakula ne mɔ pɛlɛte ne anu bɔbɔ la bɛmaa bɛdabɛ noko."

29 Gyisɛse zele ye kɛ, "Mo! Wɔbua ye boɛ somaa, ɛhye ati kɔ, na ɛ ra ne anwo ɛza, ɔluakɛ bozonle ne ɛvi ye nu!"

30 Na mɔɔ ɔdwule sua nu la, ɛnee amgba kakula raalɛ ne la ɛkpa nu koonwu, na bozonle ne ɛvi ye nu bɔkɔɔ.

31 Ɔvile Taya la ɔhɔle Saedɛn, na akee ɔvale Azua Bulu ne (Dɛkapɔlese) adenle ne azo ɔziale ɔrale Galeli Nyevile ne ɛnweazo. 32 Bɛvale nrenyia bie mɔɔ anzo ɛdi na ɔle mumule la bɛrɛlɛle ye, na awie biala bodole Gyisɛse kɛ ɔva ɔ sa ɔgua ɔ nwo zo ɔmaa ɔ nwo ɛza.

33 Ɔti Gyisɛse hwenle ye vile menli dɔɔnwo ne anu hɔle ahanle, na ɔvale ɔ sa mrɛlɛsɛka ɔwulale ɔ nzo nu; akee ɔdole nyɛlɛ na ɔvale ɔhanle nrenyia ne atafinlima. 34 Na ɔdole ɔ nye ɔnleanle anwuma, na ɔgule ɛnwomenle, na wɔ tumi nu ala, ɔzele kɛ, "Buke!" 35 Ɛkɛ ne ala nrenyia ne dele edwɛkɛ kpalɛ kpalɛ na eza ɔholale tendɛ kpalɛ bɔkɔɔ!

36 Gyisɛse zele menli dɔɔnwo ne kɛ bɛmmaka bɛkile awie biala, noko akee mɔɔ ɔka la ɛnee bɔ zo mɔɔ bɛlɛfa bɛakponde kpalɛ a, 37 ɔluakɛ, ɔyɛle awie biala azibɛnwo totohyia. Na bɛhanle bɛfunlanle nu kɛ, "Debie biala mɔɔ ɔyɛ la yɛ nwanwane; ɔmaa anzodiliravolɛ ɔ nee mumule bɔbɔ te edwɛkɛ, na eza noko bɛkola tendɛ kpalɛ!"