1 Gyisɛse vɛlɛle ye ɛdoavolɛma bulu nee nwiɔ ne ɔ nwo ɛkɛ, na ɔmaanle bɛ tumi kɛ bɛva bɛdu sunsum evinli evinli, na eza bɛyɛ anwodolɛ nee ewule biala ayile.

2 Gyisɛse ɛdoavolɛma bulu nee nwiɔ ne mɔ anluma ɛne: Saemɔn mɔɔ ɔdaye ko ye ala bɛfɛlɛ ye Pita la, Andelu mɔɔ le Pita adiema nrenyia ne la, Gyemise mɔɔ le Zɛbɛdi ara nrenyia ne la.

3 Felepe, Baatɔlomiyu, Tɔmase, Mateyu adwuledievolɛ ne, Gyemise mɔɔ le Alefiyɛse ara nrenyia ne la, Tadease, 4 Saemɔn mɔɔ boka Dwuuma maamɔvo maanyɛlɛ fane ne anwo la, yɛɛ Dwudase Yesekaleɔto mɔɔ ɔyele ye ɔmaanle la.

5 Gyisɛse zoanle bɛ na ɔhyɛle bɛ kɛ, "Bɛmmakɔ maanle gyɛne nu amra anzɛɛ Samɛleama ne mɔ lɔ, 6 na emomu, bɛhɔ Nyamenle mboane ne mɔɔ bɛminli la, Yizilayɛma ne mɔ angomekye anwo zo. 7 Bɛhɔ bɛhɔbɔ ye nolo bɛhile bɛ kɛ Anwuma Belemgbunli maanle ne ɛralɛ ne ɛbikye. 8 Bɛyɛ wuliravolɛma ayile, bɛdunwue mɔwuamra anzɛɛ avunli, bɛyɛ kokobɛvolɛma ayile, na bɛdu sunsum evinli evinli noko. Kɛmɔ bɛanva ezukoa bɛandɔ tumi ne la, zɔhane ala noko a saa bɛyɛ awie ayile a bɛmmadie ye ezukoa a.

9 "Bɛmmafa ezukoa biala bɛsie bɛ nwo; 10 bɛmmafa bɔlɛ biala mɔɔ bɛbava ɛdanlɛ bieko nee mgbɔlaboa bɛagua nu la bɛdɛ bɛ sa nu, anzɛɛ kpɔma bɔbɔ bɛdɛ bɛ sa nu; ɔluakɛ, menli mɔɔ bɛbaboa bɛ la bamaa bɛ aleɛ na bɛanlea bɛ gyɛlɛɛnye. 11 Mekɛ biala mɔɔ bɛkɛdwu sua koatee zo anzɛɛ namule zo la bɛkpondɛ sonla mɔɔ Nyamezonlenlɛ wɔ ye nu la sua nu bɛdɛnla kɔkpula mekɛ mɔɔ bɛkɛvi ɛkɛ ne bɛkɛhɔ sua gyɛne zo la. 12 Saa bɛsɛlɛ adenle kɛ bɛ nee ahenle ne tɛnla a bɛyɛ agɔnwolɛ, 13 na saa bɛnwu kɛ aako ne le aako mɔɔ Nyamezulolɛ wɔ nu a, bɛyila ye; na saa tɛ ye zɔhane ɛdeɛ a, yemɔ bɛmmafa bɛ nyilalɛ ne bɛmaa ye; bɛye bɛzie. 14 Sua koatee biala anzɛɛ aako biala mɔɔ anlie bɛ awawatuu la, bɛkpokpo ɛkɛ ne munlutu ne bɛvi bɛ gyakɛ anwo kolaa na bɛavi ɛkɛ. 15 Nɔhalɛ, amumuyɛ azua mgbole ɛhye mɔ, Sodɔm nee Gomɔla banyia ye boɛ wɔ Ndɛnebualɛ Mekɛ ne anu adɛla bɛ bɔbɔ.

16 "Melɛsoa bɛ kɛ mboane mɔɔ wɔ mbedi avinli la. Bɛyɛ bɛ nye gyɛlɛmgbɛɛnye kɛ nwɔlɛ la, bɛmmayɛ gyegyeravoma, na bɛyɛ kɛ abubule la. 17 Emomu bɛnlea bɛ nwo boɛ! Ɔluakɛ bɛbahye bɛ na bɛali bɛ edwɛkɛ, na bɛabila bɛ empele wɔ ayialeka ne mɔ. 18 Ɛhɛe, ɔlua me ti bɛbali bɛ edwɛkɛ wɔ amɛnladoma nee arelemgbunli anyunlu. Na ɛhye a bamaa bɛanyia adenle bɛaha me nwo edwɛkɛ bɛahile bɛ a, ɛhɛe, bɛbali daselɛ bɛahile ewiade amra.

19 "Saa bɛkye bɛ a bɛmmadwenle edwɛkɛ mɔɔ bɛbaha ye wɔ bɛ edwɛkɛlilɛ ne anu la, ɔluakɛ, mekɛ kpalɛ mumua ne dwu a bɛbava edwɛkɛ tagyee ne bɛamaa bɛ. 20 Ɔluakɛ tɛ bɛmɛ yɛɛ bɛbadendɛ a, bɛ Ze ne mɔɔ wɔ anwuma la Ye Sunsum ne a balua bɛ nwo zo adendɛ a!

21 "Adiema baye adiema amaa yeahɔ ewule nu, na selɛma baye bɛdabɛ bɛ kunlu mralɛ bɛamaa. Na mbɛda badwazo bɛ awovolɛma anwo zo na bɛanlea bɛamaa bɛahu bɛ. 22 Awie biala bakpɔ bɛ wɔ me duma ti. Na bɛdabɛ mɔɔ bɛkɛhola Sɔnea ɛhye mɔ anloa gyinla kpundii too kɔkpula awieleɛ mekɛ ne la bɛbalie bɛ ngoane.

23 "Saa bɛyɛ bɛ ayɛkayɛkadeɛ wɔ sua ko azo a, bɛvi ɛke ne bɛhɔ fofolɛ zo! Mebazia meara kolaa na bɛadwu bɛ kosooti bɛ nwo zo! 24 Sukoavo ɛndɛla ye kilehilevolɛ ne. Akɛlɛ noko ɛndɛla ɔ menle kpole. 25 Akɛlɛ ne ɔdaye ɔnyia ɔ menle deɛ ne bie. Na saa bɛvɛlɛ medame mumua ne Gyisɛse mɔɔ mele aako menle ne la ‘Abɔnsam’ a, ɛnee akee bɛmɛ bɔbɔ ɛ? 26 Noko akee bɛmmasulo menli mɔɔ bɛnwunlowunla bɛ na bɛbɔ bɛ apo la. Ɔluakɛ mekɛ ne ɛlɛba mɔɔ nɔhalɛ ne bala ali a, na bɛ fealera nu maamɔvo ɛbɛla ne mɔ bala ali wɔ bagua nu.

27 "Mɔɔ meka mekile bɛ wɔ awozinli nu la, bɛbɔ ye nolo wɔ alehyenlɛ anzɛɛ wienyi nu. Yɛɛ mɔɔ bɛte ye bɛ nzo nu noko la, bɛbɔ ye nolo bɛvi azua ti zo!

28 "Bɛmmasulo menli mɔɔ kola ku bɛ sonla baka ne mɔ, na bɛngola bɛnva bɛ sa bɛnga bɛ ɛkɛla ne mɔ la. Sulo Nana Nyamenle angomekye, mɔɔ yemɔ a ɔkola ɔsɛkye ɛkɛla ne nee sonla baka ne wɔ abɔnsam senle ne anu la. 29 Kɛsanloma ko bɔbɔ ɛnrɛhola ɛnrɛdɔ aze wɔ mekɛ mɔɔ ɛ Ze ne ɛnze nwolɛ bie la. Na bɛto bolɛ ɛzɛ? Tɛ nwiɔ kapɛle ɔ? 30 Na bɛ ti enrinli ne mɔ bɔbɔ bɛdia ɔ muala. 31 Ɛhye ati bɛmmasulo! Ɔluakɛ, bɛsonle bolɛ kpole kpalɛ bɛmaa ye bɛtɛla kɛsanloma dɔɔnwo ne ala.

32 "Saa awie biala kile ye bagua nu kɛ ɔ gɔnwo a le me a, medame noko wienyi nu ala a mebahile kɛ ɔle me gɔnwo wɔ Egya anyunlu wɔ Anwuma belemgbunli maanle ne anu a. 33 Na saa awie bagua nu ala se kɛ ɔnze me a, medame noko mebaze kɛ menze ye wɔ Egya anyunlu wɔ Anwuma belemgbunli maanle ne anu.

34 "Bɛmmasuzu kɛ membale kɛ mebava anzondwolɛ meara azɛlɛ ye azo! Kyɛkyɛ, na emomu, adabɛlaka ɔ. 35 Mera kɛ mebamaa ralɛ nrenyia adwazo atia ɔ ze, na ralɛ raalɛ adwazo atia ɔ nli, na ralɛ nrenyia aye adwazo atia ɔ zebɛla. 36 Sonla ye kpɔvolɛma titili bayɛ ye aako nu amra. 37 Saa bɛkulo bɛ ze nee bɛ nli bɛtɛla me ɛhulolɛ deɛ a, ɛnee bɛmfɛta kɛ bɛkɛyɛ me deɛ; anzɛɛ saa ɛkulo ɛ ra nrenyia anzɛɛ ɛ ra raalɛ ɛtɛla me a ɛnee ɛmfɛta kɛ ɛkɛyɛ me deɛ a. 38 Saa bɛkpo kɛ bɛkɛva bɛ meanubaka ne na bɛkɛdoa me a, ɛnee bɛmfɛta kɛ bɛkɛyɛ me deɛ.

39 "Saa ɛpele kɛ ɛkɛlie wɔ ngoane a ɛbaminli ye; na saa ɛfa ɛwula me sa a, ɛ sa kɛha wɔ ngoane ne.

40 "Mɔɔ die bɛ awawatuu la die medame noko. Yɛɛ saa bɛdie me a ɛnee bɛdie Nana Nyamenle mɔɔ zoanle me la. 41 Saa bɛdie kapezonli kɛmɔ ɔle Nana Nyamenle sonla la ati a, bɛbanyia ahatualɛ ko ne ala mɔɔ kapezonli ne banyia ye la bie. Yɛɛ saa ɛdie atiakunlukɛnlɛmayɛvoma nee tenlenema ɔlua bɛ atiakunlukɛnlɛmayɛlɛ ne nee bɛ tenleneyɛlɛ ti a, ɛbanyia bɛ ahatualɛ ko ne ala bie.

42 "Yɛɛ saa biala mɔɔ kɛmaa ngakula ngyikyi ngyikyi ɛhye mɔ anu ko nzule weɛlɛkɔkɔ kɔpo ko bɔbɔ wɔ sukoavo duma nu la, nɔhalɛ nu mese bɛ kɛ, ɔnreminli ye ahatualɛ."