Mateus 13

36 Akee ɔgyakyile menli dɔɔnwo ne alie ne anwo, na ɔhɔle sua ne anu. Na ye ɛdoavolɛma ne mɔ zele ye kɛ ɔhile ɛrɛlɛ ne mɔɔ ɔbule mɔɔ fale adua ne nee abɛlɛ ne anwo la abo ɔhile bɛ.

37 Ɔliele ɔdole nu na ɔzele bɛ kɛ, "Wioo, mede! Mame yɛɛ mele ɛyazonlɛnli ne mɔɔ dua ma kpalɛ ne la a. 38 Ɛya ne a le ewiade ne, yɛɛ ma ne mɔ gyi ɛkɛ ne maa belemgbunli maanle ne anu menli ne; adua ne a le menli ne mɔɔ le Abɔnsam ɛdeɛ la. 39 Kpɔvolɛ ne mɔɔ luale adua ne wɔ abɛlɛ ne avinli la a le abɔnsam ne; aleɛbulɛ ne a le ewiade ne awieleɛ ne; yɛɛ aleɛbuvoma ne mɔ noko a le anwumabɔvolɛma ne mɔ.

40 "Kɛmɔ wɔ adawu ɛhye anu bɛkpale adua ne mɔ angome bɛyelale bɛ la, zɔhane ala noko yɛɛ bɛbayɛ ye wɔ awieleɛ mekɛ ne anu a: 41 Mebazoa me anwumabɔvolɛma ne mɔ meamaa bɛakpa gyegyeravoma nee ɛtaneyɛvoma amuala bɛavi belemgbunli maanle ne anu, 42 na bɛagua bɛ sendɔlera kpole ne anu bɛayela bɛ. Ɛzunlɛ nee egyelehwinlɛ bara. 43 Na akee tenlenema bada kɛ sɛnzɛne ne wɔ bɛ Ze belemgbunli maanle ne anu. Bɛmaa bɛdabɛ mɔɔ bɛlɛ ɛnzolɛ la ɛdie!