1 Kenle ko bie Falasiima nee Sadusiima ne mɔ rale kɛ bɛbazɔ Gyisɛse bɛanlea kɛ amgba ala yemɔ a le Ngoanedievolɛ ne a. Na bɛzele ye kɛ ɔhile sɛkɛlɛneɛ kpole wɔ anwomanyunlu ɔhile bɛ.

2,3 Ɔbuale bɛ kɛ, "Bɛbɔ mɔdenle wɔ anwomanyunlu mɔɔ bɛnea bɛka maanle nu edwɛkɛ la anwo. Saa anwomanyunlu yɛ kɔkɔlɛ nɔsolɛ nu a, ɛnee ɔkile kɛ aleɛ kye a maanle nu bade; na saa anwomanyunlu yɛ kɔkɔlɛ nwonlomɔ mangyee a, ɔdaye noko ɔkile kɛ maanle nu bayɛ kusuu kenle ko ne; noko akee bɛngola bɛnnwu edwɛkɛ mɔɔ bazi mekɛ ne anu a! 4 Menli ɛtane ɛhye mɔ mɔɔ ɛnlɛ diedi la ɛlɛbiza sɛkɛlɛneɛ ɛzulolɛ bie bɛavi anwomanyunlu, na bɛ sa ɛnrɛha sɛkɛlɛneɛ biala bieko ɛlɛ, kyesɛ nwanwanedeɛ ne mɔɔ bɛyɛle bɛhilele Dwona la." Akee Gyisɛse gyakyile bɛ na ɔhɔle.

5 Mɔɔ bɛpɛle azule tandane ne la, ɛdoavolɛma ne mɔ hakyele kɛ bɛ rɛle ɛvi kɛ bɛkɛva aleɛ wɔ bɛ nwo.

6 Gyisɛse hakyele bɛ kɛ; "Bɛnlea Falasiima ne nee Sadusiima ne mɔ boɛ! Ɔluakɛ bɛle mgbɔvonle."

7 Bɛdwenlenle kɛ kɛmɔ bɛ rɛle ɛvi kɛ bɛanva kpanwo la ati yɛɛ ɔleka ɛhye a.

8 Ɛnee Gyisɛse noko ze deɛ mɔɔ bɛlɛdwenle nwolɛ a, ɔti ɔzele bɛ kɛ, "O bɛmɛ mɔɔ bɛ diedi le ekyi a! Duzu ati a bɛ rɛle ɛbɔ bɛ nwo wɔ aleɛ mɔɔ bɛanva la anwo a? Bɛnrɛnyia ndelebɛbo ɛlɛ ɔ? 9 Saa bɛngakye kpanwo dolɔfo nnu ne mɔɔ menli apenle nnu ne lile ɔ nee mgbokpoleka ne mɔɔ hale ɔ bo la a, 10 eza bɛngakye dolɔfo nsuu ne mɔɔ menli apenle nna ne lile ɔ nee ɔ nzi mgbokpoleka ne mɔɔ hale la ɔ? 11 Duzu ati a bɛkɛdwenle kɛ aleɛ nwo edwɛkɛ a ɛnee melɛka la ɛ? Na mesi zo bieko kɛ, ‘Bɛnlea bɛ nwo boɛ wɔ Falasiima ne nee Sadusiima ne mɔ anwo, ɔluakɛ bɛle mgbɔvonle.’"

12 Akee nzinlii bɛdele ɔ bo na bɛnwunle kɛ "mgbɔvonle" ne mɔɔ ɔhanle nwolɛ edwɛkɛ la kile Falasiima ne nee Sadusiima ne mɔ bɛ adalɛ ngilehile ne mɔ.

13 Mɔɔ Gyisɛse rale Felepe Sizalia la, ɔbizale ye ɛdoavolɛma ne mɔ kɛ, "Duzu edwɛkɛ a menli ka ye wɔ me nwo a?"

14 Bɛbuale ye kɛ, "Bie mɔ se ɛle Dwɔn Sɔnevolɛ ne; bie mɔ se ɛle Yilaegya, yɛɛ bie mɔ noko se ɛle Gyɛlɛmaya anzɛɛ ngapezoma ne mɔ anu ko."

15 Akee ɔbizale bɛ kɛ, "Na bɛmɛ noko bɛdwenle kɛ mele nwane?"

16 Saemɔn Pita buale ye kɛ, "Kelaese ne, Ngoanedievolɛ ne, damɛnlangoate Nyamenle ne Ara ne ɔ."

17 Gyisɛse zele kɛ, "Nana Nyamenle ɛyila wɔ, Saemɔn, Dwona ara, ɔluakɛ, me Ze ne mɔɔ wɔ Anwuma belemgbunli maanle ne anu la mumua ne yɛɛ ɛye ɛhye ɛhile wɔ a, ɛhye ɛnvi sonla dasanli biala lɔ. 18 Na medame noko mese wɔ kɛ: Wɔmɔ a le Pita, bolɛ ne; na bolɛ ɛhye azo yɛɛ mebazi me asɔne sua ne a; na abɔnsam tumi kosooti ɛnrɛli zolɛ konim ɛlɛ. 19 Na mebava Anwuma belemgbunli maanle ne Anlenkɛ ne azanvɛ ne meamaa wɔ; na anlenkɛ biala mɔɔ ɛkɛdo nu wɔ azɛlɛ ye azo la, bɛbado nu zɔhane ala wɔ anwuma; anlenkɛ biala mɔɔ ɛkɛbuke ye wɔ azɛlɛ ye azo ɛke la, bɛbabuke ye zɔhane ala wɔ anwuma noko!"

20 Akee ɔbɔle ɛdoavolɛma ne mɔ kɔkɔ kɛ bɛmmaka bɛkile awie biala kɛ yemɔ yɛɛ ɔle Ngoanedievolɛ ne a.

21 Ɔvi zɔhane mekɛ ne anu Gyisɛse bɔle ɔ bo kɛ ɔka ye edwɛkɛ ne mɔ kofee, mɔɔ fale Gyɛlusalɛm ɛhɔlɛ nwo, nee mɔɔ bazi ɔ nwo zo wɔ ɛkɛ ne la, kɛ ɔbanwu amaneɛ wɔ Dwuuma mgbanyima ne asa nu, na bɛahu ye, na ye kenle nsa ne azo bɛbadunwue ye bɛavi ewule nu maa yeara ngoane nu bieko.

22 Akee Pita vale ye hɔle ahanle ɔhɔdeanle ye. Ɔzele kɛ, "Anwuma ɛdua ɛhye. Ɛhye ɛnrɛzi ɛ nwo zo ɛlɛ!"

23 Gyisɛse hakyile ɔ nwo wɔ Pita anwo ɛkɛ na ɔzele ye kɛ, "Wɔmɔ Abɔnsam, ɛvi me nwo ɛke kɔ! Ɛle ɛhane ɛzulole ɛmaa me. Wɔ adwenle ne le sonla ye nzuzuleɛ na ɔnvi Nana Nyamenle ɔdaye mumua ne Ye ɛkɛ."

24 Akee Gyisɛse zele ye ɛdoavolɛma ne mɔ kɛ "Saa awie biala kulo kɛ ɔtoa me bo zo a, maa ɔkpo ɔdaye mumua ne ɔ nwo na ɔva ye meanubaka ne na ɔdoa me. 25 Ɔluakɛ awie biala mɔɔ kulo kɛ ɔdie ɔdaye mumua ne ye ngoane la ɔbaminli ye; na awie biala mɔɔ ɔlua me ti ɔkɛminli ye ngoane la, ɔ sa baha ye bieko. 26 Duzu nvasoɛ a wɔ zo a, kɛ ɛkɛnyia ewiade anu agyapadeɛ kosooti, na ɛkɛminli wɔ damɛnlangoate ngoane a? Duzu debie a sonle bolɛ mɔɔ nee damɛnlangoate ngoane sɛ a? 27 Ɔluakɛ Mame Sonla Ra ne, nee me anwumabɔvolɛma ne mɔ bara wɔ Egya anyunlunyia nu na yɛarabua sonla ko biala ndɛne mɔɔ fɛta ye gyima mɔɔ ɔlile la. 28 Nɔhalɛ nu mese bɛ kɛ, bɛdabɛ mɔɔ bɛgyi ɛke la, bie mɔ wɔ ɛke mɔɔ bɛnrɛzɔ ewule bɛnrɛnlea kolaa na bɛanwu Sonla Ra ne kɛ ɔlɛba wɔ ye Belemgbunlililɛ ne anu a."