Mateus 2

Bɛwo kakula Gyisɛse

1 Bɛwole Gyisɛse wɔ Bɛtelɛhɛm mɔɔ wɔ Dwudiya la, wɔ Belemgbunli Hɛlɔdo mekɛ zo. Melɛ zɔhane anu menli bie mɔɔ bɛnea nwɔlɛra nee anwomanyunlu bɛka edwɛkɛ mɔɔ bazi la vi sɛnzɛnduduleɛ maanle ne anu rale Gyɛlusalɛm na bɛbizale kɛ, 2 "Nienwu a Dwuuma Belemgbunli fofolɛ ne mɔɔ bɛwo ye la wɔ a? Ɔluakɛ yɛnwu ye ɛwɔlɛra ne wɔ sɛnzɛnduduleɛ maanle ne anu moamoa nehane, na yɛra kɛ yɛbayeyɛ ye."

3 Na Belemgbunli Hɛlɔdo dele ɛhye la ye adwenle yɛle ye tendaanwo somaa ne ala wɔ bɛ kpuyia ne anwo, na Gyɛlusalɛm amuala yɛle huhuhuhu zɛhae. 4 Ɛhye maanle Belemgbunli Hɛlɔdo vɛlɛle Dwuuma azɛlɛvolɛ mgbanyima ne mɔ ayia. Na ɔbizale bɛ kɛ, "Ngapezoma ne mɔ hilele yɛ ɛleka mɔɔ bɛbawo Ngoanedievolɛ ne la ɔ?" 5 Na bɛbuale ye kɛ "Ɛhɛe, wɔ Bɛtelɛhɛm, ɔluakɛ kapezonli Maeka hɛlɛle kɛ:

6 "‘O Bɛtelɛhɛm sua ekyi, ɛnle Dwudiya maanle nu namule mɔɔ nvasoɛ biala ɛnle ɛ nwo zo a, ɔluakɛ Amɛnlado ko vi wɔ nu bavinde na yeazie me menli Yizilayɛma.’"

7 Na akee Hɛlɔdo dole nwɔlɛra nwo deɛsukoavoma ne mɔ nrɛlaleɛ kɛ bɛrɛla bɛranwu ye; na wɔ zɛhae ayia ne anu a ɔnwunle mekɛ fɔɔnwo ne mɔɔ nwɔlɛra nwo deɛsukoavoma ne mɔ lumuale nwunle ɛwɔlɛra ne la. Akee ɔhanle ɔhilele bɛ kɛ, 8 "Bɛhɔ Bɛtelɛhɛm na bɛhɔkpondɛ kakula ne. Na saa bɛnwu ye a, bɛzia bɛrɛla na bɛraha bɛhile me amaa medame noko meahɔ meahɔyeyɛ ye bie!" 9 Belemgbunli ne dendɛle wiele la nwɔlɛra nwo deɛsukoavoma ne mɔ zile nu hɔle bieko. Na nea! Ɛwɔlɛra ne yele ɔ nwo hilele bɛ bieko, na eza ɔlile bɛ nyunlu ɔ nee bɛ hɔle Bɛtelɛhɛm hɔgyinlanle ɛleka kpɔkyee ne mɔɔ kakula ne wɔ la. 10 Bɛ fɛlɛkolilɛ ne yɛle totohyia kpole mɔɔ ɔnle ye nzuzulɛ a.

11 Bɛdwule sua ne mɔɔ Male nee adɔma ne wɔ nu la anu la, bɛ muala bɛhotohotole na bɛyeyɛle ye. Akee bɛtulutulule bɛ awɔlɛ ne mɔ anu na bɛhyɛle ye nvutuke, ɛyɛlɛ nee alufuanlɛ. 12 Na mɔɔ bɛsia bɛahɔ bɛ sua zo la, bɛampe Gyɛlusalɛm bɛangɔmbɔ Hɛlɔdo amaneɛ, ɔluakɛ ɛnee Nana Nyamenle ɛbɔ bɛ kɔkɔ wɔ ɛlalɛ nu kɛ bɛva adenle gyɛne zo bɛhɔ sua nu.

13 Na nzinlii mɔɔ ɛnee bɛhɔ la, Nana Nyamenle anwumabɔvolɛ ko yele ɔ nwo hilele Dwosefi wɔ ɛlalɛ nu, na ɔzele ye kɛ, "Dwazo na fa kakula ne nee ɔ nli nriandi kɔ Yigyibiti, na tɛnla ɛkɛ ne kɔkpula mekɛ mɔɔ menwɔze wɔ kɛ ɛzia ɛ nzi la ɔluakɛ, Belemgbunli Hɛlɔdo bakpondɛ adenle bie yealua zo yeahu kakula ne." 14 Nɔe ko ne ala ɔ nee Male nee kakula ne bɛdule bɛ bo bɛhɔle Yigyibiti, 15 na bɛdɛnlanle Yigyibiti dedee ɔhɔkpulale mekɛ mɔɔ Belemgbunli Hɛlɔdo wule la. Na ɛhye noko maanle edwɛkɛ ne mɔɔ Awulae lua ngapezoma ne mɔ anwo zo hanle la rayɛle Zɔ bɔkɔɔ kɛ, "Mevɛlɛ me Ra ne mevi Yigyibiti."

16 Mɔɔ Hɛlɔdo nwunle kɛ nwɔlɛra nwo deɛsukoavoma ne mɔ ɛdu ɔ nloa ɛdo la ɔnyianle ɛya kpole. Ɔzoanle azogya wɔ Bɛtelɛhɛm, na ɔmaanle bɛ tumi kɛ bɛhu ralɛ nrenyia biala mɔɔ ɛli ɛvolɛ nwiɔ mɔɔ ba aze la wɔ Bɛtelɛhɛm sua ne azo nee namunamu mɔɔ zuozua Bɛtelɛhɛm la, ɔluakɛ nwɔlɛra nwo deɛsukoavoma ne mɔ hanle hilele ye kɛ ɛwɔlɛra ne lumuale yele ɔ nwo hilele bɛ la ye ɛvolɛ nwiɔ ɛne. 17 Zɛhae amumuyɛ nyɛleɛ ne mɔɔ Hɛlɔdo yɛle la maanle kapezonli Gyɛlɛmaya edwɛkɛ ne mɔɔ ɔhanle la lile munli kɛ,

18 "Nyane nee ɛzunlɛ kpole vindele Releema, ɛzunlɛ nee awolɛyelɛ kpole rale; Relahyɛle zunle ɔ mra, na yeangulo kɛ bɛkyekye ɔ rɛle, ɔluakɛ bɛwuwu."

19 Na mɔɔ Hɛlɔdo wule la, Nana Nyamenle anwumabɔvolɛ yele ɔ nwo hilele Dwosefi wɔ ɛlalɛ nu wɔ Yigyibiti, na ɔzele ye kɛ, 20 "Dwazo na fa kakula ne nee ɔ nli sia kɔ Yizilayɛ, ɔluakɛ ahenle mɔɔ ɛnee kpondɛ kakula ne ahu ye la mumua ne ɛwu."

21 Ɔti ndɛndɛ ne ala ɔ nee Gyisɛse nee ɔ nli bɛziale bɛhɔle Yizilayɛ maanle nu. 22 Na mɔɔ bɛlua adenle nu la, ɛzulolɛ hanle ye, ɔluakɛ ɔdele ye kɛ amuanrɛɛ belemgbunli fofolɛ ne le Hɛlɔdo ara nrenyia, Aakɛleeyɛse. Na wɔ ɛlalɛ bieko anu, bɛbɔle ye kɔkɔ kɛ ɔmmakɔ Dwudiya, ɛhye ati bɛhɔle Galeli, 23 na bɛdɛnlanle Nazalɛte. Ɛhye maanle ngapezoma ne mɔ edwɛkɛ ne mɔɔ bɛhanle mɔɔ fale Ngoanedievolɛ ne anwo la lile munli kɛ, "Bɛbavɛlɛ ye Nazalɛtenli."