Mateus 24

Gyisɛse hanle kenle bie edwɛkɛ

1 Mɔɔ Gyisɛse vi Asɔne Sua Kpole ne anu ɔfinde la, ye ɛdoavolɛma ne mɔ rale kɛ bɛbava ye bɛahɔ akpɔsa wɔ Asɔne sua ne anu.

2 Na ɔzele bɛ kɛ, "Azua ɛhye mɔ amuala babubu dwɔkɔdwɔkɔ, mɔɔ bolɛ ko bɔbɔ ɛnrɛla ko bɔbɔ anwo zo a!" Na mɔɔ ɔde Boka Ɔlivi ne ndololeɛ ne anu la ye ɛdoavolɛma ne mɔ nzinlii bizale ye kɛ:

3 "Kenle nzu a ɛhye bazi a? Duzu sɛkɛlɛndeɛ a bahile mekɛ mɔɔ ɛbava wɔazia wɔara bieko nee ewiade awieleɛ a?"

4 Gyisɛse zele bɛ kɛ, "Bɛmmamaa awie biala bɛlɛbɛla bɛ. 5 Ɔluakɛ menli dɔɔnwo badwazo kɛ bɛdabɛ a bɛle Ngoanedievolɛ ne a, na bɛbamaa menli dɔɔnwo aminli nɔhalɛ adenle ne. 6 Saa bɛte kɛ konle konle ɛbɔ ɔ bo a, ɛnee ɛhye ɛngile me ɛzialɛ ne; ɛhye mɔ bazi, noko akee ɛnee awieleɛ mekɛ ne ɛtɛdwule. 7 Maanle maanle badwazo bɛ gɔnwo mɔ akɔme zo, na ɛhɔne nee azɛlɛ ɛkpusulɛ asisi wɔ ɛleka dɔɔnwo. 8 Noko akee ɛhye mɔ amuala bayɛ amaneɛnwunlɛ ne mɔ mɔɔ bara la mɔlebɛbo ala.

9 "Ɔlua me ti, bɛbayɛ bɛ ayɛkayɛkadeɛ na bɛahu bɛ na eza bɛakpɔ bɛ wɔ ewiade anu ɛlɛka biala, 10 na bɛ nuhua bie mɔ dɔɔnwo ne ala bazia ahɔ ɛtane nu na bɛayeye bɛ nwo ngoko bɛamaa na bɛakpɔ bɛ nwo. 11 Na ngapezoma adalɛma dɔɔnwo ne ala bara na bɛamaa menli dɔɔnwo aminli nɔhalɛ adenle ne mɔɔ bɛlua nu la. 12 Ɛtaneyɛlɛ bayɛ dɔɔnwo wɔ ɛleka biala, na yeaha menli dɔɔnwo bɛ ɛhulolɛ mɔɔ bɛlɛ ye la aze. 13 Na bɛdabɛ mɔɔ bɛkɛhɔ zo bɛkɛli nɔhalɛ ne bɛkɛhɔ awieleɛ ne la yɛɛ bɛbalie bɛ ngoane a.

14 "Na bɛbabɔ Belemgbunli maanle ne anwo Edwɛkpa ne nolo bɛahile ewiade amra amuala amaa maanle maanle kosooti ade, na akee nzinlii, awieleɛ mekɛ ne ara.

15 "Ɛhye ati, saa bɛnwu deɛ ɛzulolɛ ne mɔɔ kapezonli Daneɛle hanle nwolɛ edwɛkɛ la kɛ ɔgyi ɛleka ne mɔɔ anwo te la a (kengavolɛ ne ɛde ɔ bo) 16 ɛnee bɛdabɛ mɔɔ bɛwɔ Dwudiya la ɛnriandi ɛhɔ Dwudiya awoka ne mɔ azo. 17 Bɛdabɛ mɔɔ bɛwɔ bɛ abenlana nu la mmaka kɛ bɛkaboɔboa bɛ nwo kolaa na bɛariandi bɛahɔ Dwudiya awoka ne mɔ azo. 18 Bɛdabɛ mɔɔ bɛwɔ ɛbɔ nu la mmaka kɛ bɛsia bɛahɔ bɛ azua nu bɛahɔva bɛ ndanlɛ

19 "Na mraalɛ mɔɔ bɛva ɛkolɛ, nee bɛdabɛ mɔɔ bɛvievia nlɔma na bɛlɛmaa bɛ nyɛfonlɛ wɔ zɔhane kenle ne anu la bɛ gyakɔ. 20 Na bɛzɛlɛ, na bɛ ɛnriandinlɛ ne anyia ɛyɛlɛyɛlɛ mekɛ, anzɛɛ yeanzi wɔ Ɛnwomenlelielɛ Kenle ne anu. 21 Na mekɛ zɔhane, anwongyelelɛ kpole mɔɔ ɔvi ewiade mɔlebɛbo ne bakpula kenle ne bie ɛtɛbale ɛlɛ, na eza ɔnrɛra ɛlɛ la, bara.

22 "Na saa nɔhalɛ nu, bɛampɛ mekɛ ne azo sikalɛ a, yemɔ dasanli biala ɛnrɛnyia ngoane. Na ɔlua menli mɔɔ Nyamenle ɔdaye yekpa bɛ la ati, bɛbapɛ mekɛ ne azo sikalɛ.

23 "Akee saa awie se bɛ kɛ, ‘Ngoanedievolɛ ne ɛra, na ɔwɔ ɛke, anzɛɛ bɛnwu ye wɔ ɛke, anzɛɛ ɔwɔ namule ne mɔɔ wɔ bɛ nyunlu la azo a,’ bɛmmadie bɛdi. 24 Ɔluakɛ, Kelaese adalɛma, nee ngapezoma adalɛma badwazo, na bɛayɛ nwanwane ninyɛne dɔɔnwo, amaa saa ɔkɛyɛ boɛ bɔbɔ a, Nana Nyamenle ye menli mɔɔ yekpa bɛ bɔbɔ la bɛbabɛlɛbɛla bɛ muala. 25 Mekakye bɛ, bɛnlea bɛ nwo boɛ.

26 "Ɛhye ati saa awie se bɛ kɛ Ngoanedievolɛ ne ɛzia ɛra, na ɔwɔ ɛsɛlɛ ne azo a, bɛmmapele kɛ bɛkɔ bɛahɔnlea. Anzɛɛ saa bɛka kɛ ɔvea ɛlɛka bie a bɛmmadie bɛdi! 27 Kɛmɔ maanle nu fedevede memeamemea wɔ anwomanyunlu, na ɛsɛlɛmanye tudu sɛnzɛne aduduleɛ kɔtɔ sɛnzɛne adɔleɛ la, zɔhane noko ala yɛɛ medame Sonla Ra ne, me maleɛ ne noko bayɛ a, 28 Na ɛlɛka biala mɔɔ debie funli la la, ɛkɛ ne yɛɛ mgbɔtɛ ne mɔ bahuohua bɛ nloa a.

29 "Wɔ anwubɛnyunlu ɛhye mɔ kosooti anzi kenle ko demua ne ala, sɛnzɛne ne bayɛ awozinli kabii, na siane ne noko ɛnrɛda, na nwɔlɛra ne mɔ vi anwuma badudu aragua aze, na anwuma tumi kosooti bawozo gyigyi gyigyi zɛhae ala.

30 "Na ɛhye mɔ amuala anzi, amozii, Sonla Ra ne maleɛ ne anwo sɛkɛlɛneɛ bavinde avi anwomanyunlu, na awolɛyelɛ kpole kpalɛ bara wɔ aleɛabo amuala. Na ewiade maanle maanle kosooti banwu kɛ melɛ tumi nee anyunlunyia totohyia mevi anwuma amungu ne anu melɛba. 31 Na mebazoa me anwumabɔvolɛma ne mɔ meamaa bɛabɔ aweɛne totohyia ne anu; na bɛbaboɔboa me menli ne mɔ mɔɔ meyɛ bɛ nzonlɛ la anloa bɛavi maanle ti nee maanle bo nee anwuma anwuma.

32 "Akee bɛva ɛzukoalɛdeɛ bɛvi dɔma baka ne anu. Saa ye ngane ne mɔ wula nya a, ɛnee bɛze kɛ wuluwulu mekɛ anzɛɛ wawaa ɛbikye. 33 Zɔhane ala yɛɛ saa bɛnwu kɛ ninyɛne ɛhye mɔ ɛbɔ ɔ bo kɛ ɔsisi a, ɛnee bɛnwu ye kɛ me maleɛ ne ɛbikye, bɔbɔ, megyi bɛ nlenkɛ ne mɔ anloa a. 34 Na akee amozi ye, mekɛ ɛhye bara ye awieleɛ.

35 "Anwuma belemgbunli maanle ne nee aze bapɛ nu aze, na me nloa edwɛkɛ ɛdeɛ, yemɔ ɔnrɛpɛ nu ɛlɛ. 36 Na awie biala noko ɛnze mekɛ ne nee dɔnehwele holɛ ko ne mɔɔ awieleɛ ne bara a, anwumabɔvolɛma ne mɔ bɔbɔ ɛnze. Kyɛkyɛ, anzɛɛ Nyamenle Ra ne bɔbɔ. Egya angomekye a ze a.

37,38 "Na kɛmɔ Nowa mekɛ zo ɔyɛle la, zɔhane ala a Sonla Ra ne ɛralɛ noko bayɛ a. Kɛmɔ kenle ne mɔɔ li azuyilɛ ne anyunlu, bɛlile aleɛ aleɛ, na bɛnlonle, bɛyɛle agyalɛ nwuanzanwuanza bɛhɔkpulale kenle ne mɔɔ Nowa hɔwolole ɛlɛne-sua ne anu, 39 na bɛannwu ye dedee kɔkpula mekɛ mɔɔ azule ne yile na ɔrapianle bɛ kosooti ɔhɔle la, zɔhane ala noko yɛɛ Sonla Ra ne ɛralɛ ne bayɛ a.

40 "Menli nwiɔ bɔbɔ mɔɔ bɛ mu nwiɔ bɛlɛyɛ gyima wɔ ɛya nu la, bɛbava ko na bɛagyakyi ko ne. 41 Mraalɛ nwiɔ bɔbɔ mɔɔ ɛlɛti ɛdɔkɛ la bɛbava ko, na bɛagyakyi ko ne.

42 "Ɛhye ati bɛnlea boɛ, ɔluakɛ bɛnze kenle ne mɔɔ bɛ Awulae bava ara a.

43 "Bɛnwu ye kɛ saa aako ne amenle ze aledwolɛ nu mekɛ mɔɔ awule kɛva kɛra a anrɛɛ ɔnrɛgyakyi ye sua ɔnrɛmaa bɛnrɛrabu ye bɛnrɛwua ye. 44 Zɔhane ala a ɔwɔ kɛ bɛsiezie bɛ nwo wɔ me arɛlevilɛnu ɛralɛ ne anwo a.

45 "Asoo ɛle Awulae sonvolɛ mɔɔ ɛdi nɔhalɛ na ɛze nrɛlɛbɛ ɔ? Kakye kɛ meva gyima mewula ɛ sa kɛ ɛnlea me aako ne azo, na ɛmaa me ngakula ne mɔ aleɛ alehyenlɛ biala. 46 Saa mesia meba na mebato wɔ kɛ ɛgua gyima ne mɔɔ menvale memaanle wɔ la azo a, nyilalɛ dɔɔnwo ɛha wɔ. 47 Mebava nɔhalɛdivoma ɛhye mɔ meazie me debie biala mɔɔ melɛ bɛ la ati!

48 "Saa ɛdi ɛtane na ɛse ɛ nwo kɛ, ‘Me Awulae ɛtɛnyianle ɛtɛbale’, 49 na ɛbɔ ɔ bo kɛ ɛyɛ ɛ gɔnwo mɔ sonvolɛma ne amumuyɛ, na wɔabɔ wɔ abɔfo wɔanlo wɔ nza wɔabo a, 50 wɔ Awulae bara arɛlevilɛ nu wɔ mekɛ mɔɔ ɛ nye ɛnla, la, 51 na yeabila wɔ mbaka, na yeabua wɔ ndɛne yeaboka adalɛ nabalabama ne mɔ anwo, na ɛkɛ ne a ɛzunlɛ nee egyelehwinlɛ bara a.