Mateus 25

Anwuma Maanle ne anwo adawu ngakyile

1 "Anwuma belemgbunli maanle ne le kɛ avoanlema bulu bie mɔɔ bɛvale bɛ ngɛnlaneɛ kɛ bɛkayia atɔtolɛ nrenyia ne la. 2-4 Na bɛ nuhua nnu ala a nwunle nrɛlɛbɛ na bɛvale nwole bɛguale bɛ ngɛnlaneɛ deɛ ne mɔ anu a, na nnu ne mɔɔ hale la yɛle ahoasea na bɛ rɛle vile bɛ nwo.

5,6 "Ɔti mɔɔ atɔfolɛ nrenyia ne hyɛle wɔ ye ɛralɛ nu la, bɛ kosooti bɛdedale kɛ bɛdie bɛ ɛnwomenle bie kɔkpula alevinli mu nwiɔ avinli; na mɔɔ bɛdele ɛdeanlɛ kɛ, ‘Atɔfolɛ nrenyia ne ɛlɛba! Bɛrɛla na bɛrayɛ ye akoaba! la, bɛ muala bɛ nye dele.’

7,8 "Ngakula mraalɛ ne mɔ amuala dwazole na bɛyɛle bɛ ngɛnlaneɛ ne mɔ boɛ. Na akee ngakula mraalɛ nnu ne mɔ mɔɔ bɛnlɛ nwole ne bie la kpale ɛhendeɛ ne mɔ kyɛlɛ kɛ bɛmaa bɛ bɛ deɛ ne bie, ɔluakɛ bɛ ngɛnlaneɛ ne mɔ ɛnee ɛlɛnu.

9 "Na bɛbuale bɛ kɛ, ‘Yɛnlɛ ye dɔɔnwo. Ɔti bɛhɔ gua ne azo na bɛhɔdɔ bie.’

10 "Na melɛ mɔɔ bɛhɔle la, atɔfolɛ nrenyia ne rale, na bɛdabɛ mɔɔ ɛnee bɛboɔboa bɛ nwo bɛwie la nee ye hɔle atɔfolɛ ɛkponledolɛ ne abo, na akee bɛdole anlenkɛ ne anu.

11 "Nzinlii, mɔɔ avoanle nnu ne ziale rale la, bɛhale anlenkɛ nzi, bɛvɛlɛle na bɛzele atɔfolɛ nrenyia ne kɛ, ‘Yɛmenle, buke ye anlenkɛ ne!’

12 "Na ɔbuale bɛ kɛ, ‘Bɛhɔ nehane! Mekɛ ne ɛkpa nwolɛ! Menze bɛ hweledede!’

13 "Ɔti bɛzinza, na bɛboɔboa bɛ nwo, ɔluakɛ, bɛnze kenle ne nee dɔnehwele holɛ ko ne mɔɔ mebazia meara a.

14 "Bieko, Anwuma belemgbunli maanle ne le kɛ adawu ne mɔɔ fale nrenyia bie mɔɔ ɛlɛtu adenle ahɔ maanle gyɛne bie anu, na ɔvɛlɛle ye sonvolɛma ne mɔ amuala bɛyiale, na ɔbɔle bɛ bosea kɛ bɛva bɛzi kongo wɔ melɛ mɔɔ yemɔ yehɔ la.

15 "Na ɔmaanle bɛ nuhua ko talɛnte nnu, ko noko nwiɔ, yɛɛ ko noko ko, kɛmɔ bɛ muala bɛ anwosesebɛ de la, na akee ɔdule ye adenle ne. 16 Nrenyia ne mɔɔ asa hanle talɛnte nnu ne la ndɛndɛ ne ala hɔle, na ɔvale ɔhɔlile gua, na ɔnyianle nwolɛ nvasoɛ talɛnte nnu bieko. 17 Zɔhane ala noko yɛɛ mɔɔ nyianle talɛnte nwiɔ ne la, noko nyianle nwolɛ nvasoɛ talɛnte nwiɔ a.

18 "Na nrenyia ne mɔɔ nyianle talɛnte ko ne la, yemɔ ɔhɔle na ɔhɔvunvunle azɛlɛ nwo, na ɔvale ɔ menle ne ezukoa ne ɔziele ɛkɛ ne twele.

19 "Nzinlii mɔɔ melɛ ne hɔle bie la, bɛ menle ne ziale rale na ɔvɛlɛvɛlɛle bɛ kɛ bɛrabu ye ezukoa ne anwo mgbonda bɛmaa ye. 20 Nrenyia ne mɔɔ ɔmaanle ye talɛnte nnu ne la yɛle mgbonda talɛnte bulu maanle ye.

21 "Ɔ menle ne yele ye ayɛlɛ kpole wɔ ye gyima kpalɛ ne mɔɔ ɔyɛle la anwo na ɔzele ye kɛ, ‘Sonvolɛ kpalɛ, wɔli nɔhalɛ wɔ ezukoa ekyi ɛhye mɔɔ menvale memaanle wɔ la anwo, ɛhye ati mebava gyima mgbole dɔɔnwo meawula ɛ sa. Yɛ gyima fɛlɛko ɛhye mɔɔ meva mewula ɛ sa nu la.’

22 "Nzinlii nrenyia ne mɔɔ nyianle talɛnte nwiɔ ne la ɔdaye ɔrabule ye mgbonda ɛdeɛ ne, na ɔzele kɛ, ‘Yɛmenle, ɛmaanle me talɛnte nwiɔ kɛ menva menli gua, na menyia ye mɔnwo bɔbɔ.’

23 "Ɔ menle ne yɛle ye mo na ɔzele ye kɛ, ‘Ɛle sonvolɛ kpalɛ na eza ɛdi nɔhalɛ. Wɔli nɔhalɛ wɔ ezukoa ekyi ɛhye mɔɔ menvale memaanle wɔ la anwo, ɛhye ati mebamaa wɔ dɔɔnwo.’

24,25 "Akee nrenyia ne mɔɔ nyianle talɛnte ko ne la rale, na ɔrazele ye kɛ, ‘Yɛmenle, kɛmɔ meze kɛ ɛ ti anu yɛ se la ati, na mesulo kɛ ɛkɛsisi me wɔ me nvasoɛ mɔɔ mebanyia ye la anwo la ati, menvunle kuma na menvale wɔ ezukoa ne menveale nu; ɔti wɔ ezukoa ne ɛne, die!’

26 "Na ɔ menle ne buale ye kɛ, ‘Nrenyia atisesebɛvo! Sonvolɛ mgbovonle! Kɛmɔ ɛze kɛ mebaza wɔ mealie wɔ nvasoɛ ne la, 27 anrɛɛ ɔwɔ kɛ ɛnwu nrɛlɛbɛ ɛfa me ezukoa ne ɛkɔsie ezukoaziele ɛleka ne, amaa meanyia mpaefoa ekyi bɔbɔ wɔ zolɛ. 28 Bɛza nrenyia ɛhye bɛlie ye ezukoa ne na bɛva bɛmaa nrenyia ne mɔɔ lɛ talɛnte bulu ne la. 29 Ɔluakɛ mɔɔ kɛnlea mɔɔ bɛkɛva bɛkɛmaa ye la boɛ la, yemɔ yɛɛ bɛbava dɔɔnwo bɛamaa ye, na yeanyia dɔɔnwo kpalɛ a. Na nrenyia ne mɔɔ ɛnli nɔhalɛ la, yemɔ ekyii ne bɔbɔ mɔɔ ɔnea zo la, bɛbaza ye bɛalie. 30 Akee bɛbavuandi sonvolɛ sonlamgbane ɛhye mɔɔ anwo ɛnlɛ nvasoɛ la bɛado ye awozinli kabikabi ne anu: ɛleka ne mɔɔ ɛzunlɛ nee egyelehwinlɛ wɔ la.’

31 "Na mekɛ mɔɔ mame, Sonla: Ra ne mebara wɔ me anyunlunyia nu, na me anwumabɔvolɛma ne mɔ amuala boka me nwo la, yɛɛ akee mebadɛnla me anyunlunyia belemgbunli ebia ne azo a. 32 Bɛbaboɔboa maanle maanle kosooti anloa wɔ me nyunlu. Mebakpakyekpakye bɛ nu kɛmɔ boaneneavolɛ kpakyekpakye mboane fi mbɔkye nu la; 33 na akee mebava mboane ne mɔ meagua me sa fema zo, na meava mbɔnkye ne mɔ noko meagua me sa bɛne zo.

34 "Akee mame, Belemgbunli ne, mebaze bɛdabɛ mɔɔ bɛwɔ me sa fema zo la kɛ, ‘Bɛmɛ mɔɔ me Ze ɛyila bɛ a, bɛrɛla bɛrava belemgbunli maanle ne mɔɔ bɛzieziele bɛmaanle bɛ ɔvi ewiade mɔlebɛbo ne la na bɛdɛnla nu. 35 Ɔluakɛ ɛhɔne hunle me la bɛmaanle me aleɛ; nzuhɔne hunle me la bɛmaanle me nzule menonle; menyɛle ɛyɛvolɛ la bɛvale me bɛhɔle sua nu; 36 me nwo lale zo la bɛhedale me ɛdanlɛ; me nwo dole me la bɛrakpɔlale me; menlale efiade la bɛrale me nwo ɛkɛ.’

37 "Akee tenlenema ɛhye mɔ babiza kɛ, ‘Awulae, kenle nzu a yɛmaanle wɔ aleɛ a? Anzɛɛ kenle nzu a yɛnwunle kɛ nzuhɔne hunle wɔ mɔɔ yɛmaanle wɔ nzule a? 38 Anzɛɛ kenle nzu a ɛrale ɛyɛvolɛ mɔɔ yɛboale wɔ a? Anzɛɛ kenle nzu a ɛ nwo lale zo mɔɔ yɛhedale wɔ ɛdanlɛ a? 39 Kenle nzu a yɛnwunle kɛ ɛnde kpɔkɛ mɔɔ yɛrakpɔlale wɔ a? Kenle nzu a ɛlale efiade mɔɔ yɛrakpɔlale wɔ a?’

40 "Na Mame, Belemgbunli mumua ne, mebaze bɛ kɛ, ‘Wɔ melɛ ala mɔɔ bɛyɛle ɛhye mɔ bɛmaanle me mediema ɛhye mɔ la, ɛnee bɛlɛyɛ bɛamaa me!’ 41 Akee mebahakyi me nye wɔ bɛdabɛ mɔɔ bɛgua me sa bɛne ne azo la, na meaze bɛ kɛ, ‘Bɛmɛ munzuvoma, bɛhɔ damɛnlangoate senle ne mɔɔ bɛhuanle bɛmaanle abɔnsam nee ye awozonlema ne mɔ la anu. 42 Ɔluakɛ, mɔɔ ɛhɔne hunle me la, bɛammaa me aleɛ; nzuhɔne hunle me, na bɛammaa me nzule meanno; 43 membale ɛyɛvolɛ la, bɛammaa me ɛleka meanla; me nwo lale zolɛ, na bɛangeda me ɛdanlɛ; me nwo dole me, na menlale efiade, noko akee bɛambamkpɔla me na bɛara me nwo ɛkɛ.’

44 "Akee bɛbabua kɛ, ‘Awulae, kenle nzu a yɛnwunle kɛ ɛhɔne hunle wɔ, anzɛɛ nzuhɔne hunle wɔ, anzɛɛ ɛrale ɛyɛvolɛ anzɛɛ ɛ nwo lale zo, anzɛɛ ɛ nwo dole wɔ, anzɛɛ ɛlale efiade, mɔɔ yɛamboa wɔ a?’

45 "Na mebabua bɛ kɛ, ‘Wɔ mekɛ ala mɔɔ bɛdule bɛ gye kɛ bɛkɛboa me mediema ɛhye mɔ la, ɛnee bɛlɛtu bɛ gye kɛ bɛkɛboa me.’

46 "Na ɛhye mɔ bahɔ ɔnlɛ-awieleɛ amaneɛnwunlɛ ne anu; na tenlenema ne mɔ bahɔ ngoane mɔɔ ɔnlɛ awieleɛ la anu."