Mateus 4

1 Sunsum Nwuanzanwuanza ne vale Gyisɛse hɔle fiemgbole ne azo, amaa ɔlua zo Abɔnsam azɔ ye anlea wɔ ɛkɛ ne. 2 Ɔhyele ɛhɔne ewiazo nee nɔɔzo too kenle abulanla, na ɛhye maanle ɛhɔne hunle ye kpole kpalɛ. 3 Na Abɔnsam zɔle ye nleanle kɛ ɔhakyi kpanwo dolɔfo dɔɔnwo na ɔva ɔyɛ ye aleɛ. Na Abɔnsam zele kɛ, "Ɛhye bahile kɛ amgba ɛle Nyamenle Ra ne."

4 Na Gyisɛse zele ye kɛ, "Kyɛkyɛ! Ɔluakɛ Ngɛlɛlera ne ka kile yɛ kɛ kpanwo angomekye ɛnrɛhola ɛnrɛyɛ menli ngɛla aleɛ: na emomu, Nyamenle edwɛkɛ biala azo ɛlilɛ a le debie mɔɔ yɛhyia nwo a."

5 Akee Abɔnsam vale Gyisɛse hɔle Asɔne Sua ne tawa ne azo. 6 Na ɔzele ye kɛ, "Wulu pe, na kile kɛ wɔmɔ a le Nana Nyamenle Ra ne a; ɔluakɛ Ngɛlɛlera ne kile kɛ, ‘Nana Nyamenle bazoa ye anwumabɔvolɛma ne mɔ yeamaa bɛazinza wɔ wɔ munzule biala anu,’ na bɛnrɛmaa ɛnrɛbubu dwɔkɔdwɔkɔ wɔ awolɛ ne mɔɔ gua aze la azo."

7 Gyisɛse buale ye ndɛndɛ ne ala ɔzele kɛ, "Ngɛlɛlera ne noko eza se yɛ kɛ, Mmasɔ wɔ Awulae Nyamenle ne ɛnea wɔ sɔnea mgbane mgbane nu!"

8 Eza Abɔnsam vale ye hɔle boka tendendenlenle bie ati zo na ɔhilele ye ewiade maanle ne amuala nee bɛ anyunlunyia kosooti. 9 Na ɔzele Gyisɛse kɛ. "Saa ɛkɛhoto na ɛkɛzonle me ɛdeɛ a anrɛɛ mebava ɛhye mɔ kosooti meamaa wɔ."

10 Na Gyisɛse zele ye kɛ, "Ɛvi ɛke kɔ, Abɔnsam. Ngɛlɛlera ne se kɛ, ‘Sonle Awulae Nyamenle ne angomekye ala. Tie ɔdaye ɔ ngomekye ala.’"

11 Akee Abɔnsam gyakyile ye ɛkɛ ne hɔle, na anwumabɔvolɛma rale razonlenle Gyisɛse.

Gyisɛse ɛbɔ ye Nyamedwɛkɛ ɛhanlɛ bo

12,13 Mɔɔ Gyisɛse dele kɛ bɛhye Dwɔn la, ɔvile Dwudiya na ɔrale ye sua zo, Nazalɛte, mɔɔ wɔ Galeli la; na yeangyɛ biala ɔdule ɔhɔdɛnlanle Kapɛnayɛm, mɔɔ zua Galeli Tandane ne mɔɔ zua Zɛbulɛn nee Nafetalae la. 14 Ɛhye maanle kapezonli Ayezaya edwɛkɛ ne mɔɔ ɔhanle la lile munli:

15,16 "Zɛbulɛn azɛlɛ nee Nafetalae azɛlɛ ne mɔɔ zua Tandane ne, nee namunamu mɔɔ wɔ Azule Dwɔdan anzi, nee Galeli Sɔlɔ nehane mɔɔ maanle gyɛne zo amra dɔɔnwo de nu la ɛkɛ ne yɛɛ menli mɔɔ dɛnlanle awozinli nu la ɛnwu Kɛnlaneɛ kpole a; bɛdɛnlanle ewule azɛlɛ zo, na Kɛnlaneɛ kpole ne dale bɛ nwo zo." 17 Ɔvi mekɛ ɛhye anu, Gyisɛse bɔle ye Nyamedwɛkɛ ɛhanlɛ ne abo kɛ, "Bɛhwe bɛ nwo bɛvi ɛtane nu, bɛnlu bɛ nwo, na bɛkpo Nana Nyamenle abo zo, ɔluakɛ Anwuma belemgbunli maanle ne ɛbikye."

18 Kenle ko bie ɔlua ɛnweazo wɔ Galeli Tandane ne anloa la ɔnwunle mediema nwiɔ, Saemɔn, mɔɔ ɔdaye ko ye ala bɛfɛlɛ ye Pita, nee Andelu, kɛ bɛwɔ ɛlɛne nu bɛlɛto avonle bɛahye edwɛne, ɔluakɛ bɛle adwɛnekɔvolɛma; yɛɛ bɛ gyima noko mɔɔ bɛyɛ ala ɛne. 19 Gyisɛse vɛlɛle bɛ na ɔzele bɛ kɛ, "Bɛgyakyi bɛ avonle ne mɔ na bɛrali me nzi na mebayɛ bɛ menli mɔɔ kpondɛ ngɛla bo zo la." 20 Ɛkɛ ne ala bɛgyakyile bɛ avonle ne mɔ na bɛdoale ye bɛ nee ye hɔle.

21 Bɛhɔle bɛ nyunlu ekyii wɔ ɛnwea ne azo la ɔnwunle mediema nwiɔ bieko, Gyemise nee Dwɔn, kɛ bɛ nee bɛ ze Zɛbɛdi de ɛlɛne nu bɛlɛsa bɛ avonle ne mɔ; na ɔvɛlɛle bɛdabɛ noko kɛ bɛrɛla. 22 Na ndɛndɛ ne ala, bɛgyakyile bɛ gyima ne nee bɛ ze, na bɛdoale ye bɛ nee ye hɔle.

23 Gyisɛse kpɔsale Galeli amuala na ɔhilele debie wɔ Dwuuma ayiasua ne mɔ anu wɔ ɛleka biala, na ɔhanle Nyamenle Edwɛkpa ne mɔɔ fale Anwuma belemgbunli maanle ne ɛralɛ ne anwo la wɔ ɛleka biala. Na ɔyɛle wuliravolɛma nee ewule ngakyile ngakyile dɔɔnwo ayile. 24 Ye nwanwanendeɛ ne anwo edwɛkɛ zandele hɔle moa ɔdɛlale Galeli ɛweɛne ne. Ɔlua ɛhye ati wuliravolɛma mɔɔ vi Selea moamoa la rale maanle bɛyɛle bɛ ayile. Na bɛ anwodolɛ nee bɛ anwofofolɛ biala, anzɛɛ saa awozonle ɛva bɛ, anzɛɛ bɛbɔ ɛlane, anzɛɛ saa bɛbubu bɛgua bɔbɔ a, ɔyɛle bɛ muala ayile ɔmaanle bɛ nwo zale. 25 Na menli ekpunli ekpunli dɔɔnwo ne ala mɔɔ bɛvi Galeli, nee Azua mgbole Bulu ne azo, nee Gyɛlusalɛm, nee mɔɔ vi Dwudiya ngameɛ ngameɛ la kosooti, nee mɔɔ vi Azule Dwɔdan anzi lɔ bɔbɔ la doale ye.