1 "Mmabua ɛ gɔnwo ndɛne, ammaa bɛambua ɛdawɔ noko ndɛne. 2 Ɔluakɛ kɛ ɛsi ɛbua menli ndɛne la yɛɛ menli babua ɛdawɔ noko ndɛne a. 3 Na duzu ati a ɛdwenle mumunli mɔɔ la ɛ diema bie anye zo la anwo wɔ melɛ mɔɔ dosinli la wɔ deɛ mumua ne azo a? 4 Ɛkɛha kɛ, ‘Agɔnwolɛ, maa memboa wɔ memaa ɛye mumunli ne mɔɔ la ɛ nye ne azo la,’ wɔ mekɛ mɔɔ ɛdawɔ mumua ne ɔlua dosinli ne mɔɔ la ɛ nye zo la ati ɛnnwu aze la ɔ? 5 Wɔmɔ adalɛ nabalabanli! Dumua ye dosinli ne mɔɔ la wɔ deɛ ne azo la kolaa na saa ɛnwu aze a wɔaboa ɛ diema ne.

6 "Bɛmmafa ninyɛne mɔɔ anwo te la bɛmaa ahwea. Bɛmmafuandi bɛ anwonyiandeɛ bɛgua agbolike nyunlu ammaa bɛanva bɛ gyakɛ bɛantietia zolɛ na eza bɛanzia bɛamba bɛ nwo zo.

7 "Bɛbiza, na bɛbava mɔɔ bɛbiza la bɛamaa bɛ. Bɛkpondɛ, na bɛbanwu ye. Bɛbɔ nu, na bɛbabuke bɛ anlenkɛ ne. 8 Ɔluakɛ awie biala mɔɔ biza la, asa ka ye. Awie biala mɔɔ kpondɛ la, nwu ye. Ɔti saa bɛkɛbɔ nu ɛdeɛ a, anlenkɛ ne noko babuke amaa bɛ. 9 Saa kakula biza ɔ ze kpanwo dolɔfo ko a, ɔbava bolɛ yeamaa ye anzɛɛ? 10 Saa ɔbiza fɛlɛ a, ɔbava ɛwɔlɛ ayidane a yeamaa ye anzɛɛ? Kyɛkyɛ! 11 Na saa bɛmɛ menli ahonle ɛsesebɛvoma, ɛtaneyɛvoma bɔbɔ ze kɛ bɛsi bɛfa ahyɛlɛndeɛ kpalɛ bɛmaa bɛ mra a, ɛnee duzu ati a bɛ Ze mɔɔ wɔ Anwuma la amgba ala ɛnrɛva ahyɛlɛndeɛ kpalɛ ne ɛnrɛmaa bɛdabɛ mɔɔ bɛbiza bɛfi ye lɔ la ɛ?

12 "Yɛ mɔɔ ɛkulo kɛ menli yɛ maa wɔ la maa bɛdabɛ noko. Ɛhye a le Mosisi mɛla ne nee ngapezoma ne mɔ ngilehilenu ne sikalɛ a.

13 "Adenle ɛdenraa bie anu a bɛdua nu bɛkɔ Anwuma belemgbunli maanle ne anu a. Adenle ne mɔɔ kɔ Abɔnsam sua zo la le kpolomgbolo zɛhae, yɛɛ ye anlenkɛ ne noko le wanaanwo kpalɛ maa ɛlɔne pemgbenlamgbe ne mɔɔ kɛva zɛhae adenle ne mɔɔ nuhua ɛvalɛ ɛnyɛ se la anu. 14 Emomu Ngoane Adenle anlenkɛ ɛdeɛ ne le ekyi, yɛɛ ye adenle ne le feɔɔ, na menli ekyi bie ala a kola nwu zɛhae adenle ne a.

15 "Bɛnlea bɛ nwo boɛ wɔ ahilehilevolɛ adalɛma mɔɔ bɛfa mboane nwoma bɛkpolo, noko akee bɛle mbedi, na bɛkɛtete bɛ nu nzokɛnzoka la anwo. 16 Bɛbahola bɛava bɛ nyɛleɛ ne mɔ bɛanwu bɛ sonla holɛ, kɛmɔ bɛkola bɛfa baka ma bɛnwu ye baka holɛ ko la pɛ, ɔluakɛ kukue ɛngola ɛnzo amango ma ɛmmaa ɔnyɛ boɛ. 17 Bɛnea ma ne mɔ mɔɔ mbaka ngakyile ne mɔ so la azo a bɛkola bɛnwu bɛ mbaka holɛ ko ndɛndɛ a. 18 Baka mɔɔ so ma menlemenle la ɛnzo ma ɛnwonle ɛlɛ. Yɛɛ baka mɔɔ so ma ɛnwonle la noko ɛngola ɛnzo ma mɔɔ le kpalɛ la.

19 "Ɔti mbaka biala mɔɔ bɛnzo ma kpalɛ la bɛpepɛ bɛ bɛgua, na bɛfuandi bɛ bɛgua senle nu. 20 Ɛhɛe, adenle mɔɔ yɛdua nu yɛnwu baka anzɛɛ sonla ye sonla holɛ la a le ye ma ne mɔɔ ɔkɛzo la.

21 "Tɛ menli ne amuala mɔɔ bɛyɛ bɛ nwo Nyamezonlenlɛma la a amgba kile kɛ bɛle Nyamenle menli a. Bɛbahola bɛavɛlɛ me kɛ ‘Awulae’, noko akee bɛnrɛdwu Anwuma belemgbunli maanle ne anu, kyesɛ bɛdabɛ mɔɔ bɛyɛ Egya mɔɔ wɔ Anwuma la ɛhulolɛdeɛ ne la. 22 Wɔ Ndɛnebualɛ mekɛ ne, menli dɔɔnwo ne ala baze me kɛ ‘Awulae, Awulae, yɛhanle ɛ nwo edwɛkɛ yɛhilele menli ne bie, na yɛluale wɔ duma nu yɛdule sunsum ɛtane na eza yɛyɛle nwanwanendeɛ mgbole dɔɔnwo.’ 23 Na mebaze bɛ kɛ, ‘Menze bɛ bɔbɔ. Bɛvi me nwo ɛke bɛhɔ, ɔluakɛ bɛ nyɛleɛ muala le evinli anzɛɛ ɛtane ngome’.

24 "Bɛdabɛ mɔɔ bɛtie me edwɛkɛ na bɛdi zo na bɛtoa me la ze nrɛlɛbɛ kɛ nrenyia mɔɔ si ye sua wɔ bolɛ ketekete zo la. 25 Ɔle zɔ kɛ ezule ne tɔ bilididi, na azundenle ɛyiyilɛ ba, na ahumu tu bɔ sua ne ɛdeɛ, noko akee ɔmbu ɔngua aze ɛlɛ, ɔluakɛ bɛzile ye wɔ bolɛ ketekete zo.

26 "Na bɛdabɛ mɔɔ bɛte me edwɛkɛ ne na bɛnva la le ahoasea, kɛ nrenyia mɔɔ si ye sua wɔ ɛnwea nu la. 27 Ɔluakɛ saa fɔsɛlɛ ne nee nzuyilɛ ne ba, na ahumu noko tu bɔ sua ne a ɔbabu yeagua aze gulogɔlɔ." 28 Gyisɛse Ye Nyamedwɛkɛ ɛhanlɛ ne yɛle menli dɔɔnwo ne ala azibɛnwo, 29 ɔluakɛ ɔhilehilele kɛ awie bie mɔɔ lɛ tumi kpole bie la, na ɔnle kɛ bɛ Dwuuma mgbanyima ne mɔ la.