36 सह थिई उडै बिधाता लै बल़ीदान करने बेल, एलियाह गूर डेऊअ बेदी सेटा संघा किई बिधाता का एही अरज़, "हे आबराम, इसहाक अर याकबे परमेशर बिधाता! आझ़ लोल़ी अह गल्ल सोभी का शुझुई कि इज़राईलो परमेशर आसा तूह ई अर हुंह आसा तेरअ दास अर सोभी का लोल़ी थोघ लागअ कि ज़ुंण मंऐं किअ, तेता करना लै त मुल्है तंऐं हुकम किअ द। 37 हे बिधाता, तूह शुण मेरी अरज़ संघा दै एतो ज़बाब, ताकि इधी सोभी लोगा का थोघ लागे कि तूह ई आसा परमेशर अर तंऐं शादै ईंयां भिई आप्पू लै बापस।"
38 हेरा-हेरी शोटी बिधाता सरगा का आग अर हूम बल़ीदान किऐ दै मास्सो, झ़ुका अर बेदीए पात्थरा संघी हुअ धरनीं छ़ार अर बेदी फेर पाणीं शुक्कअ पठी। 39 ज़ांऊं तिधी लोगै इहअ च़मत्कार आपणीं आछी भाल़अ, तिन्नैं टेक्कअ धरनीं उटै पल़ी माथअ संघा लागै इहअ बोल्दै, "बिधाता आसा परमेशर, सिधअ बिधाता ई आसा परमेशर!"