1 राज़ै 2

दाबेदै डाही मरनै का आजी सुलैमाना का एही गल्‍ला खोज़ी

1 ऐबै गअ त राज़ै दाबेदा मरनैओ बगत पुजी, तेऊ शादअ आपणअ शोहरू सुलैमान संघा डाही तेऊ का एही गल्‍ला खोज़ी, 2 "ऐबै निं हुंह आजू खास्सअ ज़िऊंदअ आथी हुंह च़ाल्‍लअ तिधा लै डेऊई ज़िधा लै धरतीओ हर मणछ एकी धैल़ी डेऊणअ, तूह निं हैअ चोल़ी नां हिम्मत हारी। 3 तूह करै तिहअ ई ज़िहअ तेरअ परमेशर बिधाता ताल्है हुकम करा अर तेऊए बिधी निं बिस्सरी। मोसा गूरै लिखै दै बधाना दी ज़ेतरै हुकम आसा, तिन्‍नां मनै सोभी तिहै ई। ज़ै तूह इहअ करे, तै हणअ तूह हर ज़ैगा सफल च़ाऐ तूह ज़िधा लै बी डेओए। 4 ज़ै तूह ज़िहअ बिधाता बोला तिहअ ई करे, तै करनीं बिधाता सह करार पूरी ज़ुंण तेऊ मुल्है बोलअ त, ‘ज़ै तेरी आद-लुआद तेही ज़िन्दगी ज़िऊए ज़ेही हुंह च़ाहा, अर ज़ै तिंयां तत्त-दिला का मेरै हुकम मने, तै बेशणअ तिन्‍नां मांझ़ै एक ज़ण्हअ इज़राईला प्रैंदै सदा लै राज़अ।’