1 सिरीया मुल्खे अन्ताकिया नगरीए विश्वासीए टोली दी थिऐ परमेशरे कई गूर अर गूरू, मतलब-बरनबास अर शमौन ज़हा लै निगर बोला, अर लुकियुस कुरेन नगरी का थिअ, गलील मुल्खे राज़ै हेरोदेस राज़ैओ दुधभाई मनहेन अर शाऊल। 2 ज़ांऊं तिंयां ब्रता डाही करै प्रभूए च़ाकरी करदै तै लागै दै, पबित्र आत्मां बोलअ, "मुल्है करा बरनबास अर शाऊला मेरै तेऊ कामां लै ज़ुदै ज़ेता लै मंऐं तिंयां शादै दै आसा।"

3 तेखअ डाहै तिन्‍नैं ब्रत अर प्राथणां करी तिन्‍नां दी हाथ अर तिंयां किऐ बिदा।

4 तिंयां छ़ाडै पबित्र आत्मां सलुकिआ नगरी ज़िधी ज़हाज़ो आडअ थिअ अर तिधा का ज़हाज़ा दी बेशी डेऊऐ तिंयां कुप्रास टापू लै। 5 सालामिस नगरी पुजी खोज़अ परमेशरो बैण यहूदी मणछे सभागृहा अर जोहन्‍ना मार्कुस त तिन्‍नों दास।

6 तेऊ सारै टापू फेर फिरी पुजै तिंयां पाफस नगरी। तिधी भेटअ तिन्‍नां बार ईशू नाओं एक यहूदी ज़ादू करदअ अर सह थिअ झ़ुठै गूर। 7 सह थिअ सिरगिउस पल़सी सुबैदारा संघा, ज़ुंण समझ़कार मणछ त, अर सह च़ाहा त बरनबास अर शाऊला आप्पू सेटा शादी करै परमेशरो बैण शुणनअ। 8 पर इलिमास ज़ादू करनै आल़ै, अह आसा तेऊए नाओं मतलब, तेऊ किअ बरोध अर तेऊ किई खास्सी कोशिश कि राज़पाल ईशू दी विश्वास नां करी सके।

9 तेखअ शाऊलै, ज़सरअ नाअं पल़सी बी आसा, पबित्र आत्मां करै भर्हुई तेऊ लै कोहरअ भाल़ी बोलअ, 10 "तूह आसा राख्सा पिछ़ू डेऊअ द अर तूह आसा हर भली गल्‍लो दुशमण! तूह बोला हर बगत लोगा का झ़ुठअ अर तिन्‍नां लै करा तूह कई कदुष्ट काम। ज़ुंण तूह इहअ बोला कि परमेशर बिधातो बारै ईंयां गल्‍ला निं शुची आथी, एही झ़ुठी गल्‍ला पाआ लोगा का खोज़णें छ़ाड़। 11 परमेशरै लाई ताल्है ऐबै सज़ा दैई! अर तूह रहणअ थोल़ै धैल़ै कांणअ अर ताखा निं सुरज़ शुझणअ।"

तेखअ हुई तेभी तेऊए आछी कांणी अर तेऊ का शुझुअ न्हैरअ अर सह लागअ ओर्ही-पोर्ही ठणाखदअ कि तेऊओ कुंण हाथ ढाके।

12 तेखअ सुबैदार हुअ प्रभूए शिक्षा शूणीं रहैन अर ज़ुंण तिधी हुअ त तेता भाल़ी किअ तेऊ प्रभू दी विश्वास।

13 पल़सी अर तेऊए साथी पाफस नगरी का ज़हाज़ खोल्ही करै पुजै पंफूलिआ मुल्खै पिरगा नगरी अर जोहन्‍ना डेऊअ तिन्‍नां छ़ाडी एरुशलेम नगरी लै बापस फिरी। 14 पिरगा नगरी का आजू डेऊई पुजै तिंयां पिसदिया मुल्खे अन्ताकिया नगरी।

बशैघे धैल़ी बेठै तिंयां सभागृहा डेऊई। 15 परमेशरे बधान अर परमेशरे गूरे कताबा पहल़णैं बाद बोलअ तिधी सभागृहे कारदारै तिन्‍नां लै, "भाईओ, ज़ै तम्हां बोल़णा लै किज़ै इहअ आसा ज़ेता करै तिन्‍नां हैअ एछे, तै एछा संघा खोज़ा तिन्‍नां गल्‍ला।"

16 तेखअ बोलअ पल़सी खल़ै उझ़ुई करै हाथा करै शारअ करी, "हे इज़राईली मणछो अर परमेशरा का डरनै आल़ैओ, शूणां।

17 "इना इज़राईलीए परमेशरै छ़ांटै म्हारै दाद-बाब अर ज़धू ईंयां मिसर देशै परदेसी हई रहा तै, तिन्‍नें किई खास्सी बढोतरी, अर आपणीं महान बाहे बला करै आणै तिधा का छ़ड़ैऊई।✝ 18 च़ाल़्ही साला तैणीं रह सह रेगीस्तानै तिन्‍नां ज़िरदअ लागी।✝

19 "कनान देशै साता ज़ातीओ बरैबाद करी तिन्‍नों देश कोई 450 साला लै दैनअ इना लै रहणा लै।✝

20 "तेखअ बणाऐं परमेशरे शमूएल गूरा तैणीं पांच़।✝

21 "तेखअ मांगअ तिन्‍नैं एक राज़अ। परमेशरै दैनअ च़ाल़्ही साला तैणीं बिन्यामीने गोत्रा का तिन्‍नां लै एक मणछ किशूओ शोहरू शाऊल तिन्‍नां लै राज़अ बणाईं।✝

22 "तेखअ किअ सह दूर अर तेऊ बाद बणाअं दाबेद राज़अ, ज़सरै बारै परमेशरै इहअ बोलअ, ‘ईशैईओ शोहरू दाबेद शुझिआ मुखा राज़अ बणनैं जोगी, सह सोठा तिहअ ई ज़िहअ हुंह सोठा। तेऊ करनी सोभै गल्‍ला तेही ज़िहअ हुंह च़ाहा।’✝

23 "राज़ै दाबेदे ई खिंबा संघै आसा परमेशरै करार किई दी अर तेते साबै छ़ाडअ इज़राईली मणछा सेटा एक उद्धार दैणैं आल़अ, मतलब ईशू मसीहा।✝

24 "मसीहा का आजी दैनअ जोहन्‍ना सोभी इज़राईली लै समाद। तेऊ बोलअ सोभी लै, ‘आपणैं पापो प्राश्त करा, परमेशरा बाखा फिरा, तेखअ दैंऊं हुंह तम्हां लै थारै पाप माफी लै डुबकी।’ 25 ज़ांऊं जोहन्‍ना आपणैं तेऊ कामां पूरै करनै आल़अ त ज़ुंण परमेशरै तेऊ का सभाल़अ त, तेऊ बोलअ इहअ, ‘तम्हैं मुंह किज़ै समझ़ा? हुंह निं मसीहा आथी! हेरा, ज़ुंण मुंह बाद एछणैं आल़अ आसा, सह आसा सोभी का महान अर इधी तैणीं कि हुंह निं तेऊ सेटा एता जोगी बी आथी कि हुंह तेऊए पोलल़ै खोल्हणैं च़ाकरी करनै आल़अ दास बणी सकूं।’

26 "भाईओ, तम्हैं ज़ुंण आजू आबरामे लुआद आसा अर ज़ुंण तम्हैं परमेशरा का डरा, तम्हां सेटा आसा हेरअ द सह उद्धार दैणैं आल़अ बैण पजैल़ी। 27 एरुशलेम नगरी दी रहणैं आल़ै अर सैणैं निं सह बछ़ैणअ, अर परमेशरे गूरै बोली दी गल्‍ला निं समझ़ी ज़ुंण तिंयां हर बशैघे धैल़ै पहल़ा। इहअ करै किई तिंयां गल्‍ला तेऊ लै दोश लाई पूरी। 28 तिन्‍नां निं मारनै जोगी तेऊ दी किछ़ै दोश भेटअ, तैबी किई तिन्‍नैं राज़पाल पिलातुसा का अरज़ कि एऊ पाआ मारी।

29 "ज़ांऊं तिन्‍नैं तेऊए बारै लिखी दी गल्‍ला पूरी किई, सह डाहअ तिन्‍नैं क्रूसा का थुआल़ी घोरी दी बुदरी। 30 पर परमेशरै किअ सह मरी करै भिई ज़िऊंदअ। 31 सह रहअ तिन्‍नां आपणैं च़ेल्‍लै संघै खास्सै धैल़ै तैणीं खांदअ-पिंदअ अर शुझदअ लागी ज़ुंण गलील मुल्खा का तेऊ संघै तै एरुशलेम नगरी आऐ दै, ज़ुंणी ईंयां गल्‍ला आपणीं आछी भाल़ी तिंयां आसा ऐबै लोगा का इना गल्‍ला खोज़दै लागै दै।

32 "हाम्हैं आसा एभै परमेशरे खुशीए समादा खोज़दै लागै दै ज़ेते करार परमेशरै म्हारै दादा-बाबा का थिई किई दी। 33 परमेशरै किई प्रभू ईशू ज़िऊंदै करी सह ई करार म्हारी लुआदा लै पूरी, ज़िहअ भज़ने कताबा दी मसीहे बारै आसा लिखअ द,✝

‘तूह आसा मेरअ पूत

आझ़ दैनअ मंऐं ताल्है ज़ल्म।’

34 "परमेशरै किअ मसीहा मरी करै ज़िऊंदअ अर सह निं तेऊ भिई कधि मरनै दैंदअ। परमेशरै आसा म्हारै दादा-बाबा का इहअ बोलअ द,✝

‘मुंह दैणीं तम्हां लै सोभ भली गल्‍ला अर बर्गत

ज़ुंण मंऐं दाबेद राज़ै संघै करार किई ती।’

35 "तैही आसा तेऊ एकी होरी भज़ना दी बी मसीहे बारै बोलअ द, ‘ताह निं आपणैं पबित्र मणछे देही चिजणैं दैणअ।’✝

36 "दाबेद राज़ै किअ तिहअ ई ज़ेही परमेशरे मरज़ी ती। मरी करै डाही तेऊए देही घोरी दाबी अर ज़िहै तेऊए दाद-बाब दाबै अर तेऊए देही बी चिजी। भज़ना दी ईंयां गल्‍ला दाबेद राज़ै आपणैं बारै ता बोली निं आथी।✝ 37 पर ईशू ज़ुंण परमेशरै मरी करै ज़िऊंदअ किअ तेऊए देही निं चिजी आथी।

38 "तैही बोला हुंह भाईओ, ऐहा गल्‍ला लऐ तम्हैं समझ़ी! एऊ ई करै भेटा तम्हां पाप माफ हणैंओ खुशीओ समाद। 39 ज़हा गल्‍ला करै मोसा गूरे बधाना करै नर्दोश निं हई सकदै तै। तिन्‍नां सोभी का हआ ईशू दी विश्वास करनै आल़अ मणछ धर्मीं।

40 "तैही रहा चतैन, इहअ निं हआ कि ज़ुंण परमेशरे गूरे कताबा दी आसा बोलअ द कि तेऊ तिन्‍नां लै किज़ै करनअ सह तम्हां लै बी होए,✝

41 ‘ओ निंदा करनै आल़ैओ,

भाल़ा, अर झशकिआ अर मरा।

किल्हैकि मुंह करनअ थारै धैल़ै एक काम,

इहअ काम कि, ज़ै तम्हैं तेते च़रच़ा शुणें,

तम्हैं निं कधि तेतो भरोस्सअ करनअ।’"

42 ज़ांऊं पल़सी अर बरनबास यहूदी सभा का बागै निखल़ै, लोग लागै एही अरज़ करदै कि आगलै बशैघे धैल़ै खोज़ै हाम्हां का इना गल्‍ला भिई। 43 ज़ांऊं सभागृहा सभा मुक्‍की, यहूदी अर यहूदी पंथा दी आऐ दै होरी लोगा मांझ़ै हुऐ कई बरनबास अर पल़सी पिछ़ू। पल़सी अर बरनबासै बोलअ तिन्‍नां लै, "तम्हां लै लोल़ी परमेशरो जश हुअ, तेऊ दी डाहा सदा भरोस्सअ।"

44 आगलै हबतै बशैघे धैल़ी हुऐ नगरीए सोभ लोग परमेशरे बैणा शूणैं कठा। 45 पर यहूदी सैणैं मन्‍नैं हुई तिन्‍नां खास्सै मणछे छ़ुंडा भाल़ी ज़ल़ण अर तिंयां लागै निंदा करदै अर पल़सीए खलाफ बोल्दै।

46 तेखअ बोलअ पल़सी अर बरनबासै नडरै हई करै, "अह थिअ ज़रूरी कि परमेशरो समाद खोज़णअ पैहलै तम्हां का। पर ज़ै तम्हैं तेता नांईं मना अर तम्हैं आप्पू सदा रहणैं आल़ी ज़िन्दगी जोगी शुचै नांईं होए, तेखअ डेऊणअ तम्हां यहूदी छ़ाडी होरी ज़ाती बाखा लै। 47 किल्हैकि प्रभू आसा हाम्हां लै अह हुकम दैनअ द,✝

‘मंऐं आसा तूह होरी ज़ाती लै प्रैश्शअ बणाअं द,

ताकि तूह पृथूई दी हर ज़ैगा उद्धार दैणैं आल़अ दुआर होए।’"

48 इहअ शूणीं हुऐ होरी ज़ातीए लोग खुशी ज़ुंण यहूदी नांईं तै आथी, अर तिंयां लागै परमेशरे बैणे बड़ैई करदै अर ज़ेतरै सदा रहणैं आल़ी ज़िन्दगी लै छ़ांटै तै तिन्‍नैं किअ सोभी विश्वास। 49 तेखअ लागअ प्रभूओ बैण सारै देशै कई ज़ैगा पुजदअ।

50 पर यहूदी मणछा मांझ़ै भली भगत बेटल़ी, भगत अर नगरीए बडै लोगा लै दैनी कई एही च़ुघ कि ईंयां लोग निं ठीक आथी अर पल़सी अर बरनबास काढै उपद्रभ करी तेऊ मुल्खा का बागै।

51 तेखअ डेऊऐ तिंयां तिन्‍नें सम्हनै खूरा का धूल़अ ठुल़्हकी करै इकुनिम नगरी लै 52 प्रभूए च़ेल्‍लै रहै नंद अर पबित्र आत्मां करै भरपूर हंदै लागी।