शधाणूं 16

10 तेऊए दर्शणा हेरदी च़ाहअ हाम्हैं तेभी मकिदुनिया लै डेऊणअ, इहअ सोठी करै कि परमेशरै आसा हाम्हैं खुशीए समादा खोज़दै शादै दै।

फलिप्पी गराऊंऐं; लुदिआ नाओंऐं बेटल़ीओ दिल बदल़णअ

11 तैही खोल्हअ हाम्हैं त्रोआस नगरी का ज़हाज़, संघा पुजै कोहरै सामोथ्रेस टापू अर दुजै धैल़ै पुजै नियापोलिस नगरी। 12 तिधा का पुजै हाम्हैं फलिप्पी नगरी ज़ुंण मकिदुनिया मुल्खै बडी नगरी आसा अर रोमी लोगो बसेरअ आसा। हाम्हैं रहै तैहा नगरी थोल़ै धैल़ै।

13 बशैघे धैल़ी डेऊऐ हाम्हैं नगरी बागै नदीए बाढै इहअ सोठी करै कि तिधी भेटणीं प्राथणां करना लै यहूदीए सभागृहा। संघा लागै तिधी नदीए बाढै बेशी तिधी ज़ुंण बेटल़ी कठा ती हुई दी तिन्‍नां संघै गल्‍ला करदै।

14 लुदिआ नाओंए थुआथिरा नगरीए बैंज़णीं रंगे झिकल़ै बेच़णैं आल़ी एक भगत बेटल़ी ती शूणीं लागी दी अर परमेशरै तेसो मन्‍न खोल्हअ ताकि पल़सीए गल्‍ला दी मन्‍न लाए। 15 ज़ांऊं तैहा पूरै टबरा संघी आपणैं पापो प्राश्त करी पाणीं डुबकी लई, तैहा किई अरज़ कि, ज़ै तम्हैं मुंह प्रभूए विश्वासी समझ़ा, तै रहा तम्हैं मेरै घअरै। तैहा निंयैं हाम्हैं मनैऊंईं आपणैं घअरा लै।

पल़सी अर सिलास कैद खानै दी

16 ज़ांऊं हाम्हैं प्राथणां करने ज़ैगा लै तै डेऊंदै लागै दै, तिधी भेटी हाम्हां एक ज़ुआन शोहरी ज़ुंण कसरी दासी थिई, अर तैहा दी ती एही आत्मां बस्सी दी, ज़ुंण तैहा लै आजू हणैं आल़ी गल्‍ला खोज़ा ती। तेता करै दैआ ती सह आपणैं मालका लै खास्सै ढब्बै खटी। 17 सह लागी हाम्हां अर पल़सी पिछ़ू एछी लैल़ा लांदी कि ईंयां मणछ आसा परम प्रधान परमेशरे दास, ज़ुंण हाम्हां का उद्धारे कथ्या खोज़ा।