1 ज़ांऊं तिंयां प्रोहत लोगा का इहअ बोल्दै ई तै लागै दै, भबने पहरीए सरदार अर सदुकी पंथे लोग आऐ तिन्‍नां च़िक्‍कदै ठुर्ही। 2 किल्हैकि तिन्‍नां आई तिन्‍नां लै रोश्शै कि तिंयां थिऐ लागै दै लोगा सखाऊंदै अर प्रभू ईशूए कथ्या खोज़ी-खोज़ी करै मरी करै ज़िऊंदै हणें बारै खोज़दै।

3 तिन्‍नैं ढाकै तिंयां संघा डाहै दुजै धैल़ै तैणीं कैद खानै पाई किल्हैकि तेभै गई ती सान्ह पल़ी। 4 पर परमेशरे बैण शुणनै आल़ै कई लोगै किअ ईशू दी विश्वास अर विश्वास करनै आल़ै रहै बझ़दै लागी अर तिंयां हुऐ कोई पांज़ हज़ारा।

5 दुजै धैल़ै हुअ इहअ कि तिन्‍नें हाकम, सैणैं, शास्त्री, 6 प्रोहत, हन्‍ना, काईफा, जोहन्‍ना, सकंदर अर ज़ेतरै बी माहा प्रोहते घरानै का थिऐ तिंयां हुऐ सोभ एरुशलेम नगरीए कठा। 7 तेखअ किऐ तिंयां दुहै सोभी नदरी खल़ै अर तेखअ लागै तिन्‍नां का पुछ़दै, "अह काम तम्हैं कसरी शगती करै अर कसरै नाओंए किअ?"

8 पबित्र आत्मां दैनी पतरासा लै बोल़णें शगती अर तेऊ तिन्‍नां लोगे सैणैं लै बोलअ, 9 "हे लोगो, सरदारो अर सैणैं लोगो, एऊ दुबल़ै, लाट्टै मणछा संघै ज़ुंण भलाई हुई, ज़ै आझ़ हाम्हां का एते बारै आसा पुछ़-ज़ाच़ लाई दी करी कि अह ऐहा बमारी का किल्है अर किहअ करै बच़अ? 10 तै लआ तम्हैं सोभ अर सारै इज़राईली प्रभू ईशू मसीहा नासरीए नाओंए शूणीं।

"ज़ुंण तम्हैं क्रूसा दी छ़ड़ाऊई करै मारअ सह किअ परमेशरै मरी करै भिई ज़िऊंदअ अर तेऊए शगती करै अर तेऊए नाओंए हुअ अह मणछ राम्बल़अ ज़ुंण तम्हां सम्हनै राज्ज़ी राम्बल़अ आसा खल़्हुअ द। 11 नासरत गराऊंओ ईशू आसा सह ई ज़ान ज़सरै बारै शास्त्रा दी पैहलै ई आसा लिखअ द,✝

‘ज़ुंण पात्थर राज़ मिस्त्री किछ़ू कामों निं समझ़अ

सह बणाईं कूणींए ज़ान।’

12 "ईशू का सुआई निं होर कोहै उद्धार करी सकदअ, किल्हैकि सरगा हेठै निं एऊ संसारै मणछा लै परमेशरै होर कोहै नाअं आथी दैनअ द ज़हा करै हाम्हां उद्धार भेटी सके।"

13 ज़ांऊं तिन्‍नैं पतरास अर जोहन्‍ने हिम्मत भाल़ी, अर इहअ थोघ लागअ कि ईंयां आसा नपहल़ अर आम मणछ, तिंयां हुऐ रहैन, अर तेखअ तिन्‍नैं बछ़ैणैं कि ईंयां आसा ईशू संघै रहै दै। 14 सह मणछ ज़ुंण नरोगअ हुअ त, तेऊ मणछा पतरास अर जोहन्‍ना संघै खल़्हुऐ दै भाल़ी निं तिंयां तिन्‍नें खलाफ किछ़ै करी सकै। 15 पर तिन्‍नां तैहा सभा का बागै डेऊणेओ हुकम दैई लागै तिंयां आप्पू मांझ़ै बच़ार करदै,

16 "इना मणछा संघै कै करनअ? किल्हैकि एरुशलेम नगरीए रहणैं आल़ै का गअ खास्सै मणछा का थोघ लागी कि इना करै हेरअ एक च़मत्कारो नछ़ैण रहैऊई अर हाम्हैं बी निं ऐहा गल्‍ला लै हुधूई सकदै। 17 पर इहअ करा कि अह गल्‍ल निं लोल़ी होरी लोगा मांझ़ै खास्सी छिंघुई। ईंयां डरैऊंणै हाम्हां, ताकि एऊ ईशू नाओंआं कहा होरी मणछा का नां खोज़े।"

18 तेखअ शादै यहूदी सैणैं पतरास अर जोहन्‍ना आप्पू सेटा भितरा लै अर तिन्‍नां दुही लै दैनी चतैनगी कि आझ़ा पोर्ही निं हाम्हां का तम्हैं ईशूए बारै कहा का सखाऊंदै या बोल्दै लोल़ी शुझुऐ।

19 पर पतरास अर जोहन्‍ना दैनअ ज़बाब, "तम्हैं ई करा ऐहा गल्‍लो फैंसलअ कि परमेशरा नेल़ रहणअ आसा भलअ कि परमेशरा का बढी करै हाम्हैं थारी गल्‍ला मनूं। 20 किल्हैकि इहअ, हाम्हां का हई निं सकदअ कि ज़ुंण हाम्हैं भाल़अ अर शूणअ, तेऊ हाम्हैं होरी का नांईं खोज़े।"

21 तेखअ छ़ाडै तिन्‍नैं तिंयां धमकी दैई करै, किल्हैकि लोगे बज़्हा निं तिन्‍नां सज़ा दैणा लै कोई दाअ-पेच़ भेटअ, अर इहअ बी हुअ कि ज़ुंण तिंयां गल्‍ला हुई-बिति ती तेता करै करा तै सोभ लोग परमेशरे बड़ैई। 22 ज़हा मणछा लै अह च़मत्कार हुअ सह थिअ च़ाल़्ही साला का बी खास्सअ प्रोढअ अर तेऊए ज़ांघा ती हुऐ ज़ल्मां ओर्ही मूंईं दी।

23 तिधा का छ़ुटी पुजै तिंयां आपणैं साथी सेटा बापस अर ज़ुंण बी बडै प्रोहत अर सैणैं तिन्‍नां का बोलअ सह खोज़अ तिन्‍नैं तिन्‍नां का। 24 इहअ शूणीं तिन्‍नैं सोभी एक मन्‍न हई परमेशरा लै ज़ोरै-ज़ोरै बोलअ, "हे मालक, तूह आसा सह ई ज़ुंणी सरग, पृथूई, समुंदर अर ज़ुंण बी तेथ दी आसा, तिंयां सोभै गल्‍ला बणाईं।✝ 25 तंऐं बोलअ पबित्र आत्मां करै आपणैं दास म्हारै दाद-बाब राज़ै दाबेदे खाखा का,✝

‘देशा-देशे लोग किल्है आसा रोश्शै लाल-पिंऊंल़ै हुऐ दै?

तिन्‍नैं किल्है लाअ फज़ूल गल्‍ला सोठणा लै आपणअ बगत ज़ांऐं करी?

26 धरतीए सोभी राज़ै किअ बिधाता

अर तेऊ राज़ै लै एक्‍कअ ज़ुंण परमेशरै आप्पै आसा छ़ांटअ द।’

27 "किल्हैकि सच्च़ी तेरै पबित्र दास ईशूए खलाफ ज़सरअ तंऐं अभिषेक किअ, हेरोदेस अर पुंतिउस पिलातुस बी हुऐ होरी ज़ाती अर इज़राईली संघै ऐहा नगरी कठा कि✝ 28 ज़ुंण किछ़ पैहलै ई का तेरी शगती अर अक्ल करै सोठअ त तिहअ ई करे।

29 "ऐबै हे प्रभू, तिन्‍नें धमकी शुण कि तिंयां आसा लागै दै बोल्दै कि तिन्‍नां हाम्हैं किहअ करै मारनै, अर हाम्हां तेरै दासा लै दै इहअ बरदान कि हाम्हां तेरै बारै सोभी का खोज़णें हिम्मत होए। 30 हे परमेशर आपणअ हाथ कर शगती संघै आजू ताकि हाम्हैं तेरै पबित्र दास ईशूए नाओंऐं लोगे हर रोगा का नरोगै हणें नछ़ैण अर च़मत्कार करी सके।"

31 ज़ांऊं तिंयां प्राथणां करी मुक्‍कै, सह ज़ैगा ज़िधी तिंयां कठा तै हुऐ दै तिधी हुई ज़ेही ज़ाज़री अर तिंयां सोभ भर्हुऐ पबित्र आत्मां करै अर परमेशरे बैणा रहै हैअ संघै खोज़दै लागी।

32 विश्वास करनै आल़ी टोली ती तत्त-दिला का एक हुई दी। इधी तैणीं कि कोहै निं आपणीं ज़ैदाता लै बी आपणीं बोल्दअ त। पर तिन्‍नें ती सोभै गल्‍ला एकी-दुजै लै कठा।

33 शधाणूं रहै प्रभू ईशूए ज़िऊंदै हणें बारै खास्सै बला संघै खुशीओ समाद खोज़दै लागी अर तिन्‍नां लै दैआ त परमेशर महान जश। 34 तिन्‍नां मांझ़ै नांईं तै कोहै विश्वासी गरीब आथी, किल्हैकि ज़हा का बी घअर अर ज़ैदात हआ ती, तेता पाआ तै तिंयां बेच़ी। ज़ैदात बेच़ी करा तै तिंयां सारै ढब्बै-धेल्‍लै शधाणूं सेटा कठा। 35 शधाणूं करा तै तिन्‍नां ढब्बै-धेल्‍लै करै हर विश्वासी लै तेऊए गरज़े साबै बांडी। इहअ करै हआ ती हर विश्वासीए गरज़ा पूरी।

36 कुप्रास टापू का थिअ एक युसुफ नाओं मणछ, ज़ुंण लेबी गोत्रा मांझ़ै आसा त। शधाणूं डाहअ तेऊओ नाअं बरनबास मतलब इहअ मणछ ज़ुंण हर बगत होरी लै हैअ दैआ। 37 तेऊ का थिई धख ज़िम्मीं-ज़ैगा अर तेऊ सह बेच़ी अर तेते किम्मत ज़ुंण भेटी सह आणी तेऊ शधाणूं सेटा लै।