1 एकी धैल़ै खोज़ी ईशू आपणैं च़ेल्‍लै का कथ्या इहअ समझ़ाऊंणा लै कि धैल़ करनी प्राथणां अर हैअ निं छ़ाडणअ, 2 "एकी नगरी रहा त एक पांच़। सह नां परमेशरा का डरदअ त अर नां कहा मणछे परबाह करदअ त।

3 "तैहा ई नगरी रहा ती एक बिधबा बी। सह बोला ती तेऊ सेटा एछी, ‘मेरअ नसाफ करी मुंह बच़ाऊ मेरै दुशमणा का।’ 4 कई धैल़ै तैणीं किई तेऊ तेसे गल्‍ला शूणीं नां शूणीं। पर खिरी किअ तेऊ आपणैं मन्‍नैं बच़ार, ‘एही ता निं हुंह परमेशरा का डरदअ अर नां हुंह मणछे परबाह करदअ। 5 तैबी आणी ऐहा बिधबा बेटल़ी मुल्है घाटी, एसो नसाफ हुअ मुंह ऐबै करनअ, इहअ निं हआ कि अह घल़ी-घल़ी एछी डाहे धैल़ कांग लाई।’"

6 प्रभू ईशू बोलअ, "शूणां, अह बेईमान पांच़ किज़ै बोला? 7 परमेशर कै आपणैं छ़ांटै दै मणछो नसाफ करी निं सकदअ? ज़ुंण राची धैल़ी तेऊ सेटा अरज़ करदै हआ लागै दै, तेऊ कै तिन्‍नें बारै बल़ैग पाणीं? 8 हुंह बोला भाल़ तम्हां का, तेऊ करनअ तेभी तिन्‍नों नसाफ, तैबी ज़ेभै हुंह मणछो पूत एछणअ, तेभै कै तेऊ पृथूई दी विश्वास भेटणअ?"