1 एकी धैल़ै खोज़ी ईशू आपणैं च़ेल्‍लै का कथ्या इहअ समझ़ाऊंणा लै कि धैल़ करनी प्राथणां अर हैअ निं छ़ाडणअ, 2 "एकी नगरी रहा त एक पांच़। सह नां परमेशरा का डरदअ त अर नां कहा मणछे परबाह करदअ त।

3 "तैहा ई नगरी रहा ती एक बिधबा बी। सह बोला ती तेऊ सेटा एछी, ‘मेरअ नसाफ करी मुंह बच़ाऊ मेरै दुशमणा का।’ 4 कई धैल़ै तैणीं किई तेऊ तेसे गल्‍ला शूणीं नां शूणीं। पर खिरी किअ तेऊ आपणैं मन्‍नैं बच़ार, ‘एही ता निं हुंह परमेशरा का डरदअ अर नां हुंह मणछे परबाह करदअ। 5 तैबी आणी ऐहा बिधबा बेटल़ी मुल्है घाटी, एसो नसाफ हुअ मुंह ऐबै करनअ, इहअ निं हआ कि अह घल़ी-घल़ी एछी डाहे धैल़ कांग लाई।’"

6 प्रभू ईशू बोलअ, "शूणां, अह बेईमान पांच़ किज़ै बोला? 7 परमेशर कै आपणैं छ़ांटै दै मणछो नसाफ करी निं सकदअ? ज़ुंण राची धैल़ी तेऊ सेटा अरज़ करदै हआ लागै दै, तेऊ कै तिन्‍नें बारै बल़ैग पाणीं? 8 हुंह बोला भाल़ तम्हां का, तेऊ करनअ तेभी तिन्‍नों नसाफ, तैबी ज़ेभै हुंह मणछो पूत एछणअ, तेभै कै तेऊ पृथूई दी विश्वास भेटणअ?"

9 तेखअ खोज़ी ईशू कई लोगा का कथ्या ज़ुंण आप्पू दी इहअ भरोस्सअ करा तै, कि हाम्हैं तिंयां आसा धर्मीं, अर होरी समझ़ा तै तिंयां बृथा, 10 "एकी बारी थिऐ दूई मणछ, तिंयां डेऊऐ भबनै प्राथणां करदै। एक त फरीसी अर दुजअ त कारै गराहणै आल़अ। 11 फरीसी लागअ खल़अ उझ़ुई आपणैं मन्‍नैं एही प्राथणां करदअ, ‘हे परमेशर, हुंह करा तेरअ शूकर कि हुंह निं इना होरी मणछा ज़िहअ बूरअ आथी, नां इना च़ोरी अर घात करनै आल़अ आथी, नां हुंह इना कंज़रै लोगा ज़िहअ आथी। नां हुंह एऊ कारै गराहणै आल़अ आथी ज़ुंण लोगा का च़लाकी करै लुटा। 12 हुंह करा हबते दूई बारी ब्रत अर आपणीं सारी कमाईओ दसुअ हेस्सअ बी दैआ हुंह तेरै भबनै।’

13 "पर तेऊ कारै गराहणै आल़ै निं दूर खल़्हुई करै स्वर्गा बाखा भाल़णअ बी च़ाहअ, तेऊ बोलअ आपणीं हिक्‍का पटाक्‍की प्राश्त करी, ‘हे परमेशर हुंह आसा पापी मुल्है कर झींण।’ ✝

14 "हुंह बोला तम्हां लै इहअ कि सह दुजअ निं पर अह ई कारै गराहणै आल़अ मणछ डेऊअ धर्मीं बणी करै आपणैं घअरा लै। किल्हैकि ज़ुंण बी आप्पू बडअ समझ़े, सह करनअ होछ़अ अर ज़ुंण आप्पू होछ़अ समझ़े, सह करनअ बडअ।"

15 तेखअ लागै लोग आपणैं लान्हैं बी ईशू सेटा लै आणदै कि ईशू तिन्‍नां दी आपणअ हाथ डाही करै बर्गत दैऐ, अर च़ेल्‍लै लागै तिन्‍नां नैरदै कि इहअ निं करा।

16 ईशू बोलअ तिंयां शोहरू आप्पू सेटा शादी करै, "इना दैआ मुंह सेटा लै एछणैं, इना निं रोक्‍का आथी। किल्हैकि परमेशरो राज़ आसा इना लान्हैं ज़िहै मणछो ई। 17 हुंह खोज़ा तम्हां का सत्त कि ज़ुंण बी परमेशरे राज़ा इना शोहरू ज़िहअ निं मने, सह निं तेथ कधि डेऊई सकदअ।"

18 एकी यहूदी सैणैं पुछ़अ ईशू का इहअ, "हे भलै गूरू, सदा रहणैं आल़ी ज़िन्दगी पाणा लै मुंह किज़ै लागणअ करनअ?"

19 ईशू बोलअ तेऊ लै, "तूह मुल्है भलअ किल्है बोला? परमेशरा सुआई निं होर कोहै बी भलअ आथी। 20 तूह इना हुकमा ता ज़ाणा होए कि हत्या निं करनी, कंज़रै निं हणअ, च़ोरी निं करनी, झ़ुठी शाजत निं दैणीं अर आपणैं ईजा-बाबे करनी च़ाकरी।"

21 तेऊ मणछै बोलअ ईशू लै, "इना गल्‍ला मना हुंह होछ़ी उझै!" 22 इहअ शूणीं बोलअ ईशू तेऊ लै, "ताह दी आसा अज़ी बी एकी गल्‍ले कामीं! आपणअ सोभ किछ़ बेच़ी दै रैनै-गरीबा लै बांडी अर ताह भेटणअ एते बदल़ै स्वर्गे धन, अर आप्पू एछ मुंह पिछ़ू।" 23 सह सरदार हुअ इहअ शूणीं खास्सअ दुखी, किल्हैकि सह थिअ खास्सअ सेठ।

24 ईशू बोलअ तेऊ भाल़ी करै, "सेठा मणछो आसा परमेशरे राज़ा दी डेऊणअ कठण। 25 परमेशरे राज़ा दी सेठा मणछो डेऊणैं का आसा ऊँटो सिऊंणीए पाशी बाती डेऊणअ सान।"

26 तेखअ बोलअ तिन्‍नैं होरी ज़ुंण तिधी शूणैं तै लागै, "एऊ साबै निं च़ाल्‍लअ कोहिओ उद्धार हई या तै कुंण सका स्वर्गै डेऊई?"

27 ईशू बोलअ तिन्‍नां लै, "ज़ुंण मणछे भलै नांईं हई सकदअ, सह सका परमेशरे भलै हई।"

28 तेखअ बोलअ पतरासै ईशू लै, "भाल़, हाम्हैं आसा गऐ दै आपणअ घअर बण छ़ाडी ताह पिछ़ू एछी।"

29 ईशू बोलअ तिन्‍नां लै इहअ, "हुंह खोज़ा तम्हां का सत्त कि ज़ुंण परमेशरे राज़ा लै आपणअ घअर-बण, भाई-बैहण, ईज-बाब या बेटल़ी-माठै छ़ाडे, 30 तिन्‍नां भेटणअ ऐहा ज़िन्दगी दी तेता का बी खास्सअ फल ज़ुंण तिन्‍नां का पिछ़ू छ़ुटअ अर आजू एछणैं आल़ै जुगै भेटणीं सदा रहणैं आल़ी ज़िन्दगी।"

31 तेखअ निंयैं तेऊ आपणैं बारा च़ेल्‍लै आप्पू संघा अर तेखअ लागअ तिन्‍नां लै बोल्दअ, "भाल़ा, हाम्हैं च़ाल्‍लै एरुशलेम नगरी लै अर मुंह मणछे पूता लै हणीं परमेशरे गूरै बोली दी सारी गल्‍ला पूरी। 32 किल्हैकि हुंह दैणअ होरी ज़ातीए हाथै। तिन्‍नां करनअ मेरअ सुहांग मखौल करी बेइज़ती अर मुल्है पाणअ तिन्‍नां थुक्‍की। 33 हुंह च़िक्‍कणअ तिन्‍नां कोल़ै करै अर खिरी पाणअ मारी। पर हुंह हणअ चिऊथै धैल़ै ज़िऊंदअ।"

34 पर तिन्‍नैं निं इना गल्‍ला मांझ़ै एक गल्‍ल बी समझ़ी अर अह गल्‍ल रही तिन्‍नां का गुप्त। ज़िहअ ईशू बोलअ, सह निं तिन्‍नें समझ़ा दी आअ।

35 ज़ांऊं ईशू जेरिहो नगरी नेल़ पुजअ, एक कांणअ त बाते बाढै भिख मांगदअ बेठअ द। 36 सह लागअ लोगे हांढणे छ़ेल़ा शूणीं पुछ़दअ, "एथ किज़ै हुअ?" 37 तिन्‍नैं खोज़अ, "नासरत नगरीओ ईशू आसा लागअ द ऐहा बाता डेऊंदअ।" 38 तेखअ तेऊ कांणै मणछै पाई हाक, "हे ईशू, राज़ै दाबेदे लुआद, मुल्है कर झींण।"

39 ज़ुंण आजू तै हांढदै लागै दै तिंयां लागै तेऊ नैरदै कि च़ुप्पी रह।

पर सह लागअ होर बी ज़ोरै-ज़ोरै लैल़ा लांदअ, "हे राज़ै दाबेदे लुआद ईशू, मुल्है कर झींण।"

40 तेखअ दैनअ ईशू खल़ै उझ़ुई करै हुकम, "एऊ कांणै मणछा आणा ओर्ही मुंह सेटा लै।" ज़ांऊं सह कांणअ नेल़ आअ, ईशू पुछ़अ तेऊ का, 41 "तूह किज़ै च़ाहा कि हुंह ताल्है करूं?"

तेऊ बोलअ, "हे प्रभू, मुखा लोल़ी आछी का शुझुअ।"

42 ईशू बोलअ तेऊ लै, "भाल़अ लाग, तेरै विश्वासै हेरअ तूह बच़ाऊई।" 43 तेऊ मणछा का लागअ तेभी शुझदअ अर परमेशरो शूकर करदी डेऊअ सह ईशू संघा अर सोभी लोगै बी किई एता भाल़ी परमेशरे ज़ै-ज़ैकार।