1 Mamimɛ suɔli, wa hɛ nɛ ko je nɔ́ nɛ ba wa tsɛ ɔmɛ a nɔ blema ko ngɛ nga a nɔ ɔ nɔ; bɔ nɛ Mawu ha nɛ bɔ kuu nyɛɛ a hɛ mi kɛ po Wo Tsutsu ɔ kɛ manye ɔ. 2 Enɛ ɔ ngɛ kaa nɔ́ nɛ a baptisi mɛ ngɛ wo ɔ kɛ bɔ kuu ɔ mi kaa Mose se nyɛɛli, nɔ nɛ a ngɔ a he kɛ ha kaa a kpakalɔ ɔ. 3 Nɛ Mawu gu nyakpɛ blɔ nɔ kɛ ha mɛ niye ni ngɛ nga a nɔ nɛ a ye. 4 Nɛ e ha mɛ nyu hu nɛ a nu. A nu nyu nɛ Kristo ha mɛ ɔ. Lɛ nitsɛ e ngɛ a kpɛti ngɛ mɛ he wami woe kaa Mumi mi tɛ sa ngua ko. 5 Se ngɛ ni nɛ ɔmɛ kulaa se ɔ, a ti nihi fuu bui Mawu tue, nɛ lɔ ɔ he je ɔ, e kpata a hɛ mi ngɛ nga a nɔ.

6 A kɛ ni nɛ ɔmɛ to wɔ okadi konɛ wa ko dí ni yayahi a se kaa mɛ; 7 nɛ wa ko ja wɔ kaa bɔ nɛ a pee ɔ. Ngmami ɔ deɔ wɔ ke, "Ni ɔmɛ ho hi si nɛ a ye ni nɛ a nu da nɛ a bɔni do fiɛmi" kɛ ngɛ na bi sika tsu ɔ jae.

8 Jehanɛ ɔ hu a ngɛ wɔ dee ke, wa ko bɔ ajuama kaa bɔ nɛ a ti nihi kɛ ni kpahi a yihi pee, nɛ mɛ nihi akpe gbo ligbi kake ɔ. 9 Nɛ wa ko ka Nutsɔ ɔ kaa bɔ nɛ a ti ni komɛ ka lɛ hyɛ ha nɛ sinɔhi kɔ mɛ nɛ a gbo ɔ. 10 Nɛ nyɛ ko huhuɛ kɛ si Mawu kaa bɔ nɛ a ti ni komɛ pee nɛ lɔ ɔ he je Mawu ha e bɔfo ɔ ba kpata a hɛ mi ɔ.

11 Ní nɛ ɔmɛ kulaa ba a nɔ nɛ a kɛ to wɔ okadi. A ngma mɛ kɛ to nɛ a kɛ bɔ wɔ kɔkɔ konɛ wɔ nihi nɛ je ɔ nyagbe ɔ na wɔ ta a, waa kase ni kɛ je mi.

12 Ja a he je ɔ, mo nɔ nɛ o ngɛ susue kaa o be nɔ́ nɛ ɔmɛ pee ɔ, o hyɛ o he nɛ hi saminya nɛ enɛ ɔmɛ nɛ pee kɔkɔ bɔmi nɔ ha mo, ejakaa yayami ma nyɛ ba o nɔ. 13 Kami ko be nɛ bɛ Nɔmlɔ nɔ hyɛ. Kamihi ba nihi fuu a nɔ hyɛ, nɛ kami ko be nɛ nya hí dami. Nyɛɛ ngɔ nyɛ he ngɔ fɔ Mawu nɔ nɛ e maa gbe kami tsuaa kami nya la bɔ nɛ nyɛ ma nyɛ nya maa da. E wo he si nɛ e maa pee ngɛ e si womi ɔ nya. E maa tsɔɔ nyɛ bɔ nɛ nyɛ maa pee kɛ je kami he wami ɔ mi konɛ nyɛ nyɛ nya nɛ nyɛɛ da. 14 Lɔ ɔ he je ɔ, mamimɛ suɔli, nyɛɛ hiɔ wɔ jami tsuaa wɔ jami.

15 Juɛmitsɛmɛ ji nyɛ, ja a he je ɔ, nyɛ nitsɛmɛ nyɛ kɔ nɔ́ nɛ ma de nɛ ɔ se kaa e ji anɔkuale sane lo. 16 Ke wa bi Nutsɔ ɔ nɛ e gbaa wai kplu ɔ nɔ ngɛ Nutsɔ ɔ okplɔɔ ɔ he ɔ, anɛ tsa pi Kristo muɔ ɔ e jɔɔmi ɔ nɛ wa pee kake kɛ ngɛ dlae ɔ lo? Nɛ ke wa ku abolo ɔ mi tsɔwitsɔwi nɛ wa pee kake kɛ ngɛ yee ɔ, e tsɔɔ we kaa wa pee kake kɛ ngɛ se nami nɛ ngɛ e nɔmlɔ tso ɔ he ɔ dlae lo? 17 Nimli abɔ nɛ ye ɔ he hia we. Si abɔ nɛ wɔ tsuo wa ye abolo kake ɔ, e tsɔɔ kaa wɔ tsuo ɔ Kristo nɔmlɔ tso ɔ he níhi ji wɔ. 18 Yuda bi ɔmɛ nɛ yeɔ bɔ sami ni ɔmɛ ɔ, a guɔ nɔ kɛ peeɔ kake.

19 Kɛ i ngɛ tsɔɔe kɛɛ ɔ? Pe i ngɛ dee ke wɔ ɔmɛ nɛ a saa bɔ kɛ haa a, a ngɛ wami, nɛ bɔ sami ɔ he ngɛ se nami lo? Dabi! 20 Nɔ́ nɛ i ngɛ dee ji kaa bɔ nɛ wɔ jali ɔmɛ saa a, mumi yayamihi a saa kɛ haa, se pi Mawu; lɔ ɔ he je ɔ, i be suɔe kaa nyɛɛ bɔ huɛ kɛ gu bɔ sami niye ni nɔ.

21 Nyɛ be Nutsɔ ɔ kplu ɔ kɛ Abosiami kplu ɔ nya nyu nyɛe maa nu si kake. Ja a nɔuu kɛ nyɛ be Nutsɔ ɔ okplɔɔ ɔ nɔ abolo kɛ Abosiami nɔ́ ɔ nɔ ni nyɛe maa ye si kake. 22 Mɛni sane? Anɛ Nutsɔ ɔ mi mi la nɛ nyɛ ngɛ woe lo? Anɛ nyɛ he wa pe lɛ lo? 23 Nyɛ ngɛ he blɔ, ke nyɛ suɔ kaa nyɛ maa ye wɔ nya niye ni. Nyɛ tɔ we Mawu mlaa a nɔ ke nyɛ ye wɔ nya lo, se lɔ ɔ tsɔɔ we hu kaa nyɛɛ ye. E da ngɛ mlaa nya mohu, se e pi nɔ́ nɛ hi, nɛ e be yemi kɛ buami nɔ́ pee kɛ ha nyɛ. 24 Nyɛ ko susu nyɛ nitsɛmɛ kɛkɛ nyɛ he, se mohu nɔ tsuaa nɔ nɛ e susu e nyɛmi he kɛ nɔ́ nɛ maa hi ha lɛ.

25 Nyɛ he de lo tsuaa de lo nɛ a ngɛ juae ngɛ jua a nɔ ɔ nɛ nyɛɛ ye. Nyɛ ko bi si kaa wɔ nya lo i lo, bɔ nɛ pee nɛ nyɛ he nile nɛ ko kojo nyɛ. 26 Ejakaa zugba a kɛ e nɔ ni kpakpa amɛ kulaa a, Nutsɔ ɔ nɔ́ i, nɛ a ngɛ kɛ ha nyɛ nɛ nyɛɛ ye.

27 Ke nɔ ko nɛ pi Kristo se nyɛɛlɔ tsɛ nyɛ ni yemi nɛ nyɛ suɔ ɔ, nyɛɛ ya; nɛ nyɛɛ ye nɔ́ tsuaa nɔ nɛ a kɛ maa ma okplɔɔ ɔ nɔ ɔ, nɛ nyɛ ko bi he sane ko. Kɛkɛ ɔ, nyɛ be lee ke ji a kɛ sã bɔ kɛ ha wɔhi, konɛ nyɛ he nile nɛ ko kojo nyɛ kaa nyɛ ye wɔhi a nya niye ni. 28 Se ke nɔ ko wo nyɛ tue nɔ kaa wɔ nya bɔ sami niye ni i ɔ, lɛɛ nyɛ ko ye ngɛ nɔ́ nɛ de nyɛ ɔ he. 29 Tsa pi ngɛ nyɛ he, se ngɛ he numi nɛ nɔ nɛ wo nyɛ tue nɔ́ ɔ ma na ngɛ he ɔ he je.

Se nyɛ ma bi ke, Mɛni he je nɛ nɔ́ nɛ nɔ́ ko ma susu ɔ peeɔ ye kɔmɔ? 30 Ke ji i bi Mawu nɛ e gbaa niye ni ɔ nɔ ha mi nɛ ma ye ɔ, mɛni he je nɛ nɔ ko susumi nɛ e ma na kaa e sɛ nɛ ma ye ɔ tsiɔ ye niye ni ɔ nya. 31 E nya tsɔɔmi ji nɔ́ tsuaa nɔ́ nɛ nyɛ ngɛ pee ɔ, ni nɛ nyɛ ngɛ yee jio, ni nɛ nyɛ ngɛ nue jio, aloo nɔ́ kpa ko nɛ nyɛ ngɛ pee jio, nyɛɛ pee kulaa kɛ wo Mawu hɛ mi nyami.

32 Lɔ ɔ he je ɔ, nyɛ ko pee blɔ mi tso kɛ ha nɔ ko, Yuda bi jio, Hela bi jio, Kristo se nyɛɛli jio. 33 Ami hu i yeɔ blɔ nya tomi nɛ ɔ nɔ. Ngɛ nɔ́ tsuaa nɔ mi ɔ, i bɔɔ mɔde kaa ma sa nɔ fɛɛ nɔ hɛ mi. I pee we nɔ́ nɛ i suɔ aloo nɔ́ nɛ hi ha ami pɛ, se mohu nɔ́ nɛ hi ha mɛ, bɔ nɛ pee nɛ a he a yi wami.