1 E sa kaa wɔ ni nɛmɛ nɛ wa hemi kɛ yemi pi si ɔ, waa ye kɛ bua ni nɛmɛ nɛ a gbɔjɔ ngɛ hemi kɛ yemi mi ɔ, nɛ wa ko susu wɔ nitsɛmɛ wa bua jɔmi nami he tsɔ. 2 Wa ti nɔ tsuaa nɔ nɛ di e nyɛmi kpakpa peemi se, konɛ e ye ke bua lɛ nɛ e pi si ngɛ hemi kɛ yemi ɔ mi ngɛ Nutsɔ ɔ mi. 3 Ejakaa Kristo susuu we lɛ nitsɛ e he kaa bɔ nɛ Latsɛ ɔ de ke, "E ba kɛ ha nɔ́ nami, nɛ ni nɛmɛ nɛ sume Nutsɔ ɔ bɔ lɛ ahlua." 4 A ngma ni nɛ ɔmɛ ngɛ Ngmami Klɔuklɔu ɔ mi kɛ je blema kɛ fɔ si nɛ a kɛ tsɔɔ wɔ ni bɔ nɛ pee nɛ wa na tsui si tomi kɛ bua womi kɛ hyɛ be nɛ Mawu maa ye yayami kɛ gbenɔ nɔ kunimi ɔ blɔ.

5 Mawu nɔ nɛ haa nɔ tsui si tomi kɛ bua womi kɛ he wami womi ɔ nɛ ye kɛ bua nyɛ nɛ kake peemi nɛ hi nyɛ kpɛti kaa Kristo se nyɛɛli. 6 Kɛkɛ ɔ, wɔ tsuo wa ma nyɛ ma wo gbi kake kɛ je Nutsɔ ɔ yi kɛ wo Mawu nɛ ji wa Nutsɔ Yesu Kristo Tsɛ ɔ hɛ mi nyami. Ma je li ɔmɛ hu ma nya

7 Ja a he je ɔ, nyɛ he nyɛ he atuu kaa nyɛmimɛ kɛ wo asafo ɔ mi, kaa bɔ nɛ Kristo hu he nyɛ atuu ɔ, konɛ nyɛ kɛ wo Mawu hɛ mi nyami. 8 Nyɛ kai kaa Yesu Kristo ba nɛ e ba ye kɛ bua Yuda bi ɔmɛ nɛ e kɛ tsɔɔ kaa si nɛ Mawu wo wa tsɛ ɔmɛ ɔ anɔkuale i. 9 Nɛ nyɛ kai hu kaa Yesu Kristo ba, bɔ nɛ pee nɛ a he ma je li ɔmɛ a yi wami konɛ a wo Mawu hɛ mi nyami ngɛ e mɔbɔ nami ɔ he. Nɛ enɛ ɔ ji nɔ́ nɛ La polɔ ɔ ngɛ tsɔɔe be nɛ e de ke, "Ma je o yi ngɛ ma je li ɔmɛ a kpɛti, nɛ ma la kɛ je o biɛ ɔ yi."

10 Nɛ e de ngɛ he kpa ko hu ke, "Nyɛ ma je li ɔmɛ nyɛ bua nɛ jɔ nɛ nyɛɛ kɛ lɛ nitsɛ e ni ɔmɛ nɛ ji Yuda bi ɔmɛ nɛ nya."

11 E de ekohu ke, "Nyɛ je Nutsɔ ɔ yi, nyɛ ma je li ɔmɛ, nyɛ ti nɔ tsuaa nɔ nɛ je e yi."

12 Nɛ Gbalɔ Yesaia de ke, "Matsɛ bi ko maa je Isai weku ɔ mi kɛ ba, nɛ e ma ba ye ma je li ɔmɛ tsuo a nɔ matsɛ, nɛ a maa ngɔ a hɛ kɛ fɔ lɛ pɛ e nɔ."

13 Lɔ ɔ he je ɔ, i ngɛ sɔlee ha nyɛ ma je li ɔmɛ kaa Mawu nɔ nɛ haa nɔ hɛ nɔ kami ɔ, e ha nyɛ bua jɔmi kɛ he jɔmi babauu nɛ nyɛ he e nɔ nɛ nyɛɛ ye. Nɛ i ngɛ sɔlee hu kaa Mawu nɛ ye ke bua nyɛ nɛ nyɛ na hemi kɛ yemi babauu ngɛ e mi kɛ gu Mumi Klɔuklɔu ɔ nɛ ngɛ nyɛ mi ɔ he wami nɔ.

14 Mamimɛ, i le kaa kpakpa peemi hyi nyɛ tɔ, nɛ nyɛ le ni nɛ ɔmɛ a mi fitsofitso, nɛ nyɛ tsɔɔ ni kpahi hulɔ.

15 Se kɛ ɔ, i wo ka kɛ ti nɔ́ nɛ ɔmɛ a mi kɛ ha nyɛ, ejakaa i he ye kaa ni nɛ ɔmɛ ji kaimi nihi nɛ he hia nyɛ, ngɛ dloomi nɛ Mawu kɛ dloo mi ɔ he; 16 kaa imi ji tsɔlɔ pɔtɛɛ nɛ Yesu Kristo tsɔ ma jeli ɔmɛ a ngɔ kɛ Manye Munyu ɔ, bɔ nɛ pee nɛ nyɛɛ pee bɔ sami nɔ́ nɛ sa Mawu hɛ mi. Ejakaa a tsukɔ nyɛ he kɛ Mumi Klɔuklɔu ɔ. 17 Enɛ ɔ he je ɔ, e sa kaa i fiaa ngɛ nɔ́ nɛ ɔmɛ nɛ Yesu Kristo tsu kɛ gu ye nɔ ɔ he. 18 I be he blɔ nɛ i kojoɔ ni tsumi nɛ e tsu kɛ gu ni kpahi a nɔ ɔ, se i ngɛ nɔ mi mami kaa e gu ye nɔ kɛ kpɔ ma je li ɔmɛ kɛ ba Mawu ngɔ. 19 I kpɔ mɛ kɛ gu ye fiɛmi kɛ si himi kpakpa nɛ i hi ngɛ a kpɛti nɔ, kɛ nyakpɛ níhi nɛ a tsu kɛ gu ye nɔ, kaa okadihi nɛ je Mawu ngɔ ngɛ Mumi Klɔuklɔu ɔ he wami nya. Kɛ gu blɔ nɛ ɔ nɔ ɔ, i fiɛ Kristo Manye Munyu ɔ kɛ bɔle si, kɛ je Yerusalem nɛ i ya gbe nya ngɛ Ilirikum.

20 Se ngɛ enɛ ɔmɛ tsuo a mi ɔ, ye suɔmi ji kaa ma tsa nɔ nɛ ma fiɛ Manye Munyu ɔ kɛ ya he nɛ a wui Kristo biɛ ɔ ta ngɛ, se pi he nɛ nɔ ko je asafo ɔ sisi ngɛ momo. 21 I kɛ nɔ́ nɛ Gbalɔ Yesaia de ɔ to ye hɛ mi, kaa nihi nɛ a jaje we Kristo he munyu kɛ tsɔɔ we mɛ ɔ, a maa na, nɛ a maa nu sisi. 22 Enɛ ɔ nɛ tsi mi blɔ nɛ i ba slaa we nyɛ ɔ nɛ.

23 Se amlɔ nɛ ɔ, i gbe ye ni tsumi ɔ nya ngɛ hiɛ ɔ, nɛ kaa bɔ nɛ i pee ye juɛmi jeha babauu ji nɛ ɔ, i dla ye he nɛ ma ba nyɛ ngɔ. 24 Ejakaa i to nɛ ma hia blɔ kɛ ya Spania; nɛ i ma suɔ nɛ ma gu nyɛ ngɔ ngɛ Roma, nɛ i kɛ nyɛ nɛ ba na bua jɔmi bɔɔ loko nyɛ ya je mi blɔ.

25 Se loko ma ba nyɛ ngɔ ɔ, i kɛ nike ni ko yaa ha Yudea Kristo se nyɛɛli ɔmɛ ngɛ Yerusalem lolo. 26 Ejakaa Makedonia kɛ Akaia asafo ɔmɛ tsu onia kɛ yaa ha Kristo se nyɛɛli ɔmɛ nɛ ngɛ fimi mi ngɛ Yerusalem ɔ. 27 A pee enɛ ɔ kɛ bua jɔmi, ejakaa mɛ nitsɛmɛ a na kaa a hɛɛ Yerusalem asafo ɔ hiɔ. Ejakaa Yerusalem asafo ɔ mi nɛ Kristo Manye Munyu ɔ je kɛ ba su mɛ ma je li ɔmɛ. Akɛnɛ a nine su kikɛmɛ a Manye Munyu ɔ nike ni nɛ ɔ nɔ kɛ je a ngɔ he je ɔ, a na kaa e sa nɛ mɛ hu a yeɔ kɛ buaa mɛ kɛ he lo nya nike ni. 28 Ja a he je ɔ, ke i kɛ a sika a ya ha mɛ nɛ i gbe kikɛmɛ a ni tsumi kpakpa nɛ ɔ nya a, i ma ba gu nyɛ ngɔ kɛ ho Spania ya. 29 Nɛ i le kaa ke i ba nyɛ ngɔ ɔ, Nutsɔ ɔ maa jɔɔ nyɛ babauu kɛ gu ye nɔ.

30 I ngɛ nyɛ bie ngɛ Nutsɔ Yesu Kristo he je, ke suɔmi nɛ Mumi Klɔuklɔu ɔ kɛ ha nyɛ nɛ nyɛ kɛ suɔ mi ɔ he, kaa nyɛɛ piɛ ye he kɛ sɔle ha Mawu nɛ e ye kɛ bua mi ngɛ ye ni tsumi ɔ mi. 31 Nyɛɛ sɔle konɛ a bu ye he ngɛ nihi nɛ he we Kristo yi ngɛ Yerusalem ɔ a he. Nɛ nyɛɛ sɔle hu kaa Yerusalem asafo ɔ nɛ he sika a nɛ i kɛ yaa ha mɛ ɔ. 32 Konɛ ke Mawu maa suɔ ɔ, ma ba nyɛ ngɔ kɛ bua jɔmi, nɛ waa wo wa bi a bua.

33 He jɔmi Mawu ɔ kɛ nyɛ nɛ hi si saminya. Amen.