1 Anyɛmimɛ suɔli, benɛ i ba nyɛ ngɔ ɔ, tsa pi nya mi tsɔmi fitsofitso loo juɛmi ni lemi nya nɛ i kɛ ba fiɛ Mawu Munyu ɔ ngɔ tsɔɔ nyɛ. 2 Ejakaa ye yi mi tomi kɛkɛ ji kaa ma jaje Yesu Kristo kɛ e sɛumi tso nɔ gbenɔ ɔ ngɔ tsɔɔ nyɛ. 3 Nɛ i ba nyɛ ngɔ ngɛ gbɔjɔmi kɛ gbeye yemi kɛ he kpokpomi mi. 4 Nɛ ye fiɛmi ɔ mi tsɔ paa, tsa pi ngɛ nya mi tsɔmi fitsofitso kɛ nɔmlɔ adesa ni lemi munyu tumi mi, se mohu Mumi Klɔuklɔu he wami ɔ ji nɔ́ nɛ ngɛ ye munyu ɔmɛ a mi, konɛ nihi nɛ nu ɔ, a yo kaa Mawu ngɔ nɛ e je. 5 I pee enɛ ɔ, ejakaa i ngɛ hlae nɛ nyɛ hemi kɛ yemi nɛ pi si ngɛ Mawu mi, se pi nɔmlɔ adesa ni lemi nɔ.

6 Se kɛ ɔ, i tuɔ ni lemi munyuhi ngɛ nihi nɛ a hemi kɛ yemi ɔ pi si ngɛ Kristo mi momo ɔmɛ a kpɛti, se pi je nɛ ɔ mi ni lemi aloo je ɔ mi nimli nguahi nɛ be yi wami nami ɔ a munyu ɔmɛ. 7 Nyasa ngɛ wa munyu ɔmɛ ami, ejakaa a je Mawu ngɔ, nɛ a tsɔɔ wɔ Mawu blɔ nya tomi nɛ e kɛ wɔ maa ya anunyami mi ngɛ hiɔwe ɔ. A to blɔ nya nɛ ɔ loko a bɔ je ɔ mohu, se a ngɔ kɛ laa wɔ. 8 Se je nɛ ɔ mi nimli ngua amɛ nui sisi, ejakaa e ji a nu sisi jinɛ a be Anunyami Nutsɔ ɔ sɛue.

9 Ja a ji bɔ nɛ Ngmami ɔ ngɛ tsɔɔe kaa nɔmlɔ adesa ko hɛ ngmɛ nɛ, nɛ tue ko hu nui, nɛ nɔ́ ko hu be nyɛe maa kale nyakpɛ níhi nɛ Mawu dla kɛ to nihi nɛ suɔ Nutsɔ ɔ. 10 Se wɔɔ lɛɛ wa le ni nɛ ɔmɛ, ejakaa Mawu je mɛ kpo kɛ tsɔɔ wɔ kɛ gu e Mumi ɔ nɔ; nɛ e Mumi ɔ hlaa nɔ́ tsuaa nɔ mi, nɛ e tsɔɔ wɔ Mawu laami nihi kulaa nɛ mi kuɔ. 11 Nɔ ko li nɔ́ nɛ e nyɛmi susuu aloo bɔ nɛ e nyɛmi ngɛ ha pɔtɛɛ, kaa ja jamɛ a nɔ ɔ nitsɛ kɛkɛ. Ja a nɔuu kɛ nɔ ko li Mawu susumi ɔmɛ kaa ja Mawu nitsɛ e Mumi ɔ. 12 Mawu ngɔ lɛ nitsɛ e Mumi ha wɔ. Tsa pi je nɛ ɔ mi mumi ɔ, konɛ e tsɔɔ wɔ nyakpɛ dloomi nike nihi kɛ jɔɔmi nɛ Mawu kɛ ke wɔ ɔ. 13 Mumi ɔ nitsɛ munyuhi nɛ e tu wɔ ngɛ nike ni nɛ ɔmɛ a he ɔ, lɔ ɔ nɔuu wa ngɛ nyɛ dee nɛ ɔ nɛ, se pi munyuhi nɛ wɔ kaa nimli adesahi wa susu. Lɔ ɔ he je ɔ, waa kɛ Mumi Klɔuklɔu ɔ munyuhi tsɔɔ Mumi Klɔuklɔu anɔkuale munyuhi a mi. 14 Se nɔ ko nɛ pi Kristo se nyɛɛlɔ ɔ, e be nɔ́ nɛ ɔmɛ a sisi nue, nɛ e be Mawu susumi nɛ ɔmɛ nɛ Mumi ɔ je kpo ngɔ tsɔɔ wɔ ɔ ngɔe. Ejakaa a ji kuasia níhi ngɛ e tue mi; se ni nɛmɛ nɛ Mumi Klɔuklɔu ɔ ngɛ a mi ji nihi nɛ naa nɔ́ nɛ Mumi ɔ ngɛ tsɔɔe ɔ nya. Nɛ ni komɛ hu pe a be nyɛe maa ngɔ. 15 Se nɔ nɛ Mumi Klɔuklɔu ɔ ngɛ e mi ɔ naa nɔ́ tsuaa nɔ; nɛ je mi no ɔ nya kpɛɔ e he nɛ e haoɔ, ejakaa e nui lɛ sisi. 16 Se Niinɛ, kɛ e maa pee kɛ nu sisi kɛɛ? Ejakaa e pi nɔ ko nɛ maa le Nutsɔ ɔ juɛmi, aloo e kɛ lɛ ma susu nɔ́ he, aloo nɔ ko nɛ maa gu sɔlemi nɔ kɛ ha Nutsɔ ɔ maa pee nɔ́ ko. Se e ji nyakpɛ nɔ́ ko kaa wɔ Kristo se nyɛɛli lɛɛ wa hɛɛ Kristo juɛmi kɛ e nile ɔ e mi eko.