1 Jehanɛ ɔ, ngɛ níhi nɛ nyɛ ngma kɛ mane mi ɔmɛ a he ɔ, i ngɛ nyɛ dee ke, ke nɔ ko ngɔɛ yo ɔ, e hi. 2 Se ngɛ ajuama bɔmi he ɔ, e sa kaa nyumu tsuaa nyumu nɛ e hi lɛ nitsɛ e yo, nɛ yo tsuaa yo nɛ e hi lɛ nitsɛ e huno.

3 Yotsɛ nɛ pee e yo ɔ blɔ nya níhi tsuo ngɔ ha lɛ, nɛ hunotsɛ ɔ hu e pee e huno ɔ blɔ nya nihi tsuo ngɔ ha lɛ. 4 Ejakaa ke yo gba a, e nɔmlɔ tso ɔ nɔ he wami ɔ kulaa pi e nɔ́ hu, ejakaa e huno ɔ hu ngɛ e nɔ́ he wami. Ja a nɔuu kɛ huno ɔ hu e nɔmlɔ tso ɔ nɔ he wami ɔ kulaa pi e nɔ, ejakaa e yo ɔ hu nɔ́ i. 5 Lɔ ɔ he je ɔ, nyɛ ko nyɛ nyɛ bi he blɔ nɛ ɔmɛ a he. Ja nyumu kɛ e yo ɔ tsuo a to kaa a ma kua a bi gba si himi he blɔ nya amɛ hami kɛ ya si be ko, bɔ nɛ pee nɛ a na deka kɛ sɔle. Se enɛ ɔ se ɔ, a pee kake ekohu kaa bɔ nɛ a ngɛ kekle ɔ, bɔ nɛ pee nɛ Abosiami nɛ ko na he blɔ nɛ e ka mɛ ngɛ a he nɔ nɛ a nyɛ we nɛ a ye ɔ he.

6 I be nyɛ nɔ nyɛe ke nyɛɛ ngɔ yo, se e sa kaa nyɛɛ ngɔ yo ke nyɛ suɔ. 7 Se e je ye he ɔ, jinɛ ma suɔ kaa nyɛ ko ngɔ yo nɛ nyɛɛ hi si kaa bɔ nɛ i ngɛ nɛ ɔ. Se wɔ tsuo wa sɔɛ. Mawu ha ni komɛ huno loo yo kɛ si himi kaa a dloomi nike ni, nɛ e dloo ni komɛ hu kaa a hi si gu nɛ a na bua jɔmi. 8 Lɔ ɔ he je ɔ, i ngɛ nihi nɛ ngɔɛ yo kɛ ahoyihi dee ke a hi si kaa bɔ nɛ i ngɛ ɔ, a ko ngɔ yo nɛ a ko gba ke ji a ma nyɛ. 9 Se ke a be a he nɔ nyɛe maa ye ɔ, lɛɛ a sɛ gba si himi mi. Ejakaa gba si himi hi pe akɔnɔ se dimi.

10 Jehanɛ ɔ, nyɛ ni nɛmɛ nɛ nyɛ sɛ gba si himi mi ɔ, i ngɛ nyɛ kita nɛ je Mawu ngɔ woe kaa, yo nɛ ko si e huno. 11 Se ke yo kua gba a, e hi si nɛ e ko gba hu, aloo e kpale kɛ ho nɛ e kɛ e huno ɔ nɛ a ya dla. Nɛ huno hu nɛ e ko ngmɛɛ e yo he.

12 Ma suɔ nɛ ma wo nyɛ ga kɛ piɛ Mawu kita amɛ a he kaa, ke nyɛmi ko ngɛ asafo ɔ mi nɛ e ngɛ yo nɛ pi Kristo se nyɛɛlɔ, se yo ɔ suɔ kaa e kɛ lɛ maa hi si ɔ, e ko ngmɛɛ e he. 13 Ja a nɔuu kɛ ke yo ko hu ngɛ asafo ɔ mi nɛ e ngɛ huno nɛ pi Kristo se nyɛɛlɔ, se nyumu ɔ suɔ kaa e kɛ lɛ maa hi si ɔ, e ko kua lɛ gbami. 14 Ejakaa, eko ɔ, nyumu nɛ he we yi nɛ ɔ maa gu yo nɛ he ye ɔ nɔ kɛ plɛ Kristo se nyɛɛlɔ. Nɛ yo nɛ he we yi ɔ hu maa gu e huno nɛ ji Kristo se nyɛɛlɔ ɔ nɔ kɛ sɛ asafo ɔ mi. Ke pi ja a, ke gba a puɛ ɔ, bi ɔmɛ be Nutsɔ ɔ lee. Se jinɛ ngɛ Mawu blɔ nya tomi nya a, a maa gu yo kɛ e huno a kake peemi kɛ si himi ɔ nɔ kɛ he bi ɔmɛ a yi wami.

15 Se ke huno loo yo nɛ pi Kristo se nyɛɛlɔ ɔ suɔ kaa e ma kua gba a, e ya. Ngɛ enɛ ɔ mi ɔ, huno loo yo nɔ nɛ ji Kristo se nyɛɛlɔ ɔ, e ko tsi e nya, ejakaa Mawu suɔ nɛ e bi ɔmɛ a hi si ngɛ he jɔmi kɛ kake peemi mi. 16 Ejakaa a be nɔ mi mami kɛ ha nyɛ yi ɔmɛ kaa nyɛ huno ɔmɛ ma tsake, ke a kɛ nyɛ ma tsa nɔ kɛ hi si; nɛ ja a nɔuu a ngɛ nyumu ɔmɛ hu dee ngɛ a yi ɔmɛ a he.

17 Nɛ loko ji nɔ ko maa ma e juɛmi nya si ngɛ munyu nɛ ɔmɛ eko mi ɔ, e hyɛ ha kaa e si himi ɔ ngɛ kaa bɔ nɛ Mawu ngɛ hlae ɔ lo, kaa o ngɔ yo aloo o ko ngɔ yo ngɛ e blɔ tsɔɔmi kɛ e yemi kɛ buami nya a. Nɛ si himi tsuaa si himi nɛ e ma ha mo ɔ, o ngɔ nɔ. Enɛ ɔ ji mlaa nɛ i wo ngɛ asafo ɔmɛ kulaa a mi.

18 Ke a wo nɔ ko nyumu mi loko ji e plɛ Kristo se nyɛɛlɔ ɔ, e ko hao lɛ; nɛ nɔ nɛ a wui lɛ nyumu mi loko ji e plɛ Kristo se nyɛɛlɔ ɔ, e ko ha nɛ a wo lɛ nyumu mi hu. 19 Ejakaa slɔɔto ko be nyɛmi nɛ a wo lɛ nyumu mi kɛ nɔ nɛ a wui lɛ nyumu mi ɔ a kpɛti. Se mohu, nɔ́ nɛ he hia ji Mawu kita amɛ a nɔ yemi.

20 Nɔ tsuaa nɔ nɛ tsa ni tsumi nɛ e ngɛ tsue loko ji Mawu tsɛ lɛ ɔ nɔ. 21 Ke nyɔguɛ ji mo ɔ, e ko hao mo, se ke o ma nyɛ o he ma je kɛ je nyɔguɛ yemi ɔ sisi ɔ, moo pee ja. 22 Ke Nutsɔ ɔ tsɛ mo nɛ o ji nyɔguɛ ɔ, mo na nɛ o le kaa Kristo kpɔ mo kɛ je yayami he wami ɔ mi; nɛ ke Mawu tsɛ mo nɛ odehe ji mo ɔ, o peeɔ Kristo nyɔguɛ jehanɛ. 23 Kristo he nyɛ kɛ jua nɛ wa nɛ e wo nyɛ yi hiɔ. Lɔ ɔ he je ɔ, nyɛ pee e nihi. Nyɛ ko pee nyɛ he nimli a nyɔguɛhi hu. 24 Ja a he je ɔ, mamimɛ suɔli, si himi mi nɛ nɔ tsuaa nɔ ngɛ loko ji a tsɛ lɛ ɔ, e hi jamɛ a si himi ɔ nɔuu mi, ejakaa jehanɛ ɔ Nutsɔ ɔ maa ye kɛ bua lɛ ngɛ jamɛ a si himi ɔ mi.

25 Jehanɛ ɔ, ngɛ yiwi nɛ gbɛ lolo a he ɔ, i be kita womi pɔtɛɛ ko kɛ je Nutsɔ ɔ dɛ kɛ ha mɛ kaa a gba aloo a ko gba. Se ngɛ Nutsɔ ɔ e mi mi jɔmi he je ɔ, e dloo mi nile nɛ ma nyɛ ma da nɔ, nɛ ma de nyɛ nɔ́ nɛ i susu.

26 Amlɔ nɛ ɔ, wɔ Kristo se nyɛɛli wa ngɛ he hiami be mi, nɛ ja a he je ɔ, e peeɔ mi kaa ngɛ kikɛmɛ a be nɛ ɔmɛ a mi ɔ, e maa hi ha nɔ ko kaa e ko gba aloo e ko ngɔ yo. 27 Se nɔ nɛ ngɔ yo momo ɔ, e ko puɛ gba ngɛ enɛ ɔ he. Se ke nɔ ko be yo ɔ, e ko ngɔ eko ngɛ be nɛ ɔ mi. 28 Nɛ ke nyɛ nyumu ɔmɛ nyɛ pee nyɛ juɛmi kaa nyɛ maa ngɔ yo hu ɔ, nyɛɛ ya nyɛ hɛ mi. Nɛ ke yiheyo hu ke e maa gba ngɛ be nɛ ɔmɛ a mi ɔ, e pee we yayami. Se mohu gba si himi kɛ haomi maa ba, nɛ i be suɔe nɛ ni nɛ ɔmɛ nɛ ba nyɛ nɔ.

29 Nɔ́ kake nɛ sa nɛ nyɛɛ le ji kaa be nɛ piɛ ha wɔ ɔ pi, nɛ e ji be nɛ sa kaa wa kɛ tsu wa Nutsɔ ɔ ni tsumi ɔ. Ja a he je ɔ, yitsɛmɛ tete a pee a he kaa ni nɛmɛ nɛ be eko nɛ a hi si kɛ ha Nutsɔ ɔ. 30 Nyami loo kɔmɔ yemi loo ni nami nɛ ko tsi nɔ ko blɔ ngɛ Mawu ni tsumi mi. 31 Nɛ ni nɛmɛ nɛ tsuɔ je nɛ ɔ mi he ni ɔ, a ya nɔ nɛ a ye e mi ngɔɔmi níhi nɛ a na he blɔ ɔ, ejakaa e be kɛe nɛ je ɔ maa be kɛ ho.

32 Nɛ i ngɛ dee ke, nyɛ ko hao ngɛ nɔ́ tsuaa nɔ nɛ nyɛ ngɛ tsue mi. Nɔ nɛ ngɔɛ yo ɔ, e ngɔ e be ɔ kɛ tsu Nutsɔ ɔ ni tsumi ɔ, nɛ e susu bɔ nɛ e maa pee kɛ sa Nutsɔ ɔ hɛ mi. 33 Se yo ngɔlɔ be enɛ ɔ nyɛe peemi bɔ nɛ sa, ejakaa e susuu e blɔ nya ni tsumihi ngɛ je nɛ ɔ mi kɛ bɔ nɛ e ma ha e yo bua jɔmi he. 34 Ja a he je ɔ, e juɛmi peeɔ enyɔ. Kikɛ ɔ nɔuu yoyo nɛ gba a hu e baami haa lɛ. E naa kikɛmɛ a nyagba nɛ ɔ nɔuu. Se zangmayo lɛɛ e kɛ e he tsuo haa Nutsɔ ɔ ngɛ ni tsumi tsuaa ni tsumi mi konɛ e wo e hɛ mi nyami.Yogbayo haoɔ e he ngɛ ni kpahi a he, kaa we mi ni tsumihi kɛ bɔ nɛ e maa pee kɛ jɔɔ e huno bua.

35 Tsa pi yo ngɔmi nya nɛ i ngɛ tsie ha nyɛ, se mohu ga i ngɛ nyɛ woe bɔ nɛ pee nɛ nyɛ sɔmɔ Nutsɔ ɔ bɔ nɛ sa, nɛ ní komɛ nɛ ko tsi nyɛ blɔ.

36 Se ke nɔ ko susu kaa e sa nɛ e ngɔ yo, ejakaa e be e he nɔ nyɛe maa ye ɔ, e pi yayami ke e ngɔ yo. 37 Se ke nɔ ko ma nyɛ ye e he nɔ aloo e nu e he lo sisi kaa e sɛ nɛ e ngɔ yo ɔ, lɛɛ e ji juɛmi kpakpa. 38 Lɔ ɔ he je ɔ, nɔ nɛ ngɔ yo ɔ, e pee saminya. Se nɔ nɛ ngɔɛ yo ɔ, e pee saminya pe yo ngɔlɔ ɔ.

39 Yo ɔ, be abɔ nɛ e huno ɔ ngɛ je mi ɔ, mlaa fi lɛ ngɔ pɛtɛ e huno ɔ he. Ke e huno ɔ gbo ɔ lɛɛ e ngɛ he blɔ nɛ e gbaa nɔ nɛ e suɔ ekohu, se ja e gba ngɛ Kristo mi. 40 Se ngɛ ye juɛmi nya a, e ma na bua jɔmi babauu ke e gbɛ hu; nɛ e peeɔ mi kaa i ngɛ nyɛ slɔe ngɛ Mawu Mumi ɔ blɔ tsɔɔmi nya.