1 Anyɛmimɛ Suɔli, Ami Paulo, Yesu Kristo tsɔlɔ nɛ Mawu hla, kɛ wa suɔlɔ nyɛmi Timoteo nɛ ngɛ womi nɛ ɔ ngmae kɛ mane nyɛ Kristo asafo ɔmɛ kulaa nɛ ngɛ Korinto kɛ Akaia tsuo. 2 Jɔɔmi kɛ he jɔmi nɛ je wa Tsɛ Mawu kɛ Nutsɔ Yesu Kristo dɛ mi ɔ ha nyɛ.

3 Yi jemi ha wa Nutsɔ Yesu Kristo Tsɛ ɔ, nɛ ji mɔbɔ nami kɛ bua womi Tsɛ ɔ; 4 nɔ nɛ jɔɔ wa bua, nɛ e haa wɔ tsui ngɛ wa nɔ́ namihi kɛ wa kahi a mi, konɛ wɔ hu wa nyɛ nɛ waa wo nihi nɛ ngɛ nɔ́ nae ɔ bua kaa bɔ nɛ Mawu woɔ wɔ hu wa bua a. 5 Ejakaa bɔ nɛ nɔ́ nami aloo amanehlu baa wa nɔ ngɛ Kristo he ɔ, ja a nɔuu kɛ e jɔɔ wa bua nɛ e toɔ wa tsui nɔ nine. 6 Wa ngɛ amanehlu agbo mi ngɛ Mawu bua womi kɛ yi wami hemi nɛ wa ngɔ kɛ ba ha nyɛ ɔ he. Se Mawu wo wɔ bua ngɛ wa nɔ́ nami ɔmɛ a mi, nɛ enɛ ɔ yeɔ kɛ buaa nyɛ konɛ nyɛɛ na bɔ nɛ Mawu maa wo nyɛ hu bua ha ke nyɛ na amanehlu nɛ ɔmɛ nɛ wa na a eko. 7 E ma ha nyɛ he wami nɛ nyɛ kɛ da a nya.

8 Anyɛmimɛ, e sa nɛ nyɛɛ le bɔ nɛ wa na nɔ́ ngɛ Asia ha. Wa na nɔ́ pe nine nɛ wa hɛ be nɔ kaa wa maa hi je mi tete po. 9 Wa nu he ngɛ wa mi kaa wa ma gbo, nɛ wa be he wami ko nɛ wa ma kɛ ye kɛ bua wɔ nitsɛmɛ wa he; se mohu wa ngɔ wa hɛ ngɔ fɔ Mawu nɛ tleɔ ni gbogboehi si, nɛ lɛ pɛ e ma nyɛ he wa yi wami ɔ nɔ. 10 E ye kɛ bua wɔ nɛ e je wɔ kɛ je gbenɔ nɛ ngɛ gbeye mi. Niinɛ, wa he ngɛ nɔ kaa e ma je wɔ ekohu. 11 Se nyɛ hu nyɛɛ piɛɛ wa he kɛ sɔlemi kɛ pɛɛ kpami. Ejakaa nyɛ nɛ nyɛ na wa yiwa nami he ni kpakpa nɛ Mawu tsu kɛ gu nyɛ sɔlemi kɛ pɛɛ kpami ɔ nɔ ɔ, e sa nɛ nyɛɛ na lɛ si nɛ nyɛ je e yi babauu.

12 Nɔ́ kake nɛ wa fĩaa kɛ fɔɔ nɔ nɛ wa he nile yeɔ he odase ji kaa wa baa wa he si ngɛ nyɛ kpɛti ngɛ anɔkuale yemi kɛ klɔuklɔu peemi mi, pi ngɛ wɔ nitsɛmɛ wa he ni lemi nya, se mohu wa ngɔɔ wa hɛ kɛ fɔɔ Mawu yemi kɛ buami nɔ. 13 Munyuhi nɛ i ngmaa kɛ maneɔ nyɛ ɔ a mi tsɔ. 14 Nɛ e ngɛ mi kaa nyɛ li mi saminya mohu, se ma suɔ nɛ nyɛɛ fĩa ngɔ to ye nɔ kaa bɔ nɛ ami hu i ma fĩa kaa ye nihi ji nyɛ ngɛ Nutsɔ Yesu bami ligbi ɔ nɔ ɔ.

15 Ngɛ nyɛ nihi a sisi numi kɛ hɛ kɛ nɔ fɔmi ɔ he je ɔ, i to ye yi mi kaa, 16 ke i yaa Makedonia a, i ma ba gu nyɛ ngɔ, nɛ jehanɛ ɔ ke i kpale ye se kɛ je Makedonia kɛ ba hu i ma ba nyɛ ngɔ konɛ nyɛ na jɔɔmi si enyɔ, konɛ nyɛ ya je mi blɔ kɛ ya Yudea.

17 Nyɛ ma bi nɔ́ he je nɛ i tsake ye juɛmi ngɛ. Anɛ i to we ye yi mi tutuutu kaa ma ba nyɛ ngɔ lo? Aloo i ngɛ kaa je mi no nɛ e deɔ ke "ee" be mi nɛ tsa pi ja a nɛ e susu lo? 18 Dabi! Mawu yeɔ ye he odase kaa tsa pi jamɛ a nɔmlɔ ji mi, ejakaa ke i de ke "ee" ɔ, ja a ji bɔ nɛ i susu.

19 Yesu Kristo, Mawu Biɔ, he munyu nɛ i kɛ Timoteo kɛ Silvano fiɛ ngɔ tsɔɔ nyɛ ɔ, ke e de ke "ee" ɔ, ja a pɛ e ngɛ tsɔɔe, ejakaa e yeɔ nɔ́ nɛ e de ɔ nɔ. 20 Ejakaa e yeɔ Mawu si womi ɔmɛ kulaa nɔ bɔ nɛ wa de nyɛ ɔ. E ji anɔkualetsɛ nɛ woɔ Mawu hɛ mi nyami. 21 Mawu nɛ ɔ nɔuu nɛ pee ami kɛ nyɛ kulaa anɔkualetsɛmɛ ngɛ Kristo mi nɛ e hla wɔ kaa bɔfohi nɛ waa fiɛ Manye Munyu ɔ. 22 Nɛ e kadi wɔ kaa e nihi, nɛ e kɛ e Mumi Klɔuklɔu ɔ nɛ ji e kekle nike ni ɔ wo wa mi kaa e bimɛ.

23 Mawu nɛ bu mi fɔ ke lakpa nɛ i ngɛ yee; nɛ nɔ nɛ he je nɛ i bɛ nyɛ ngɔ lolo ngɛ ji kaa i be suɔe nɛ ma ka nyɛ hɛ mi nɛ nyɛ ni nɛ pee mɔbɔmɔbɔ. 24 Akɛnɛ nyɛ nane pi si ngɛ hemi kɛ yemi ɔ mi momo he je ɔ, ke i ba nyɛ ngɔ ɔ, i be nɔ́ ko tsɔ nɛ ma pee, lɔ ɔ he je ɔ, ye suɔmi kɛkɛ ji kaa nyɛ na bua jɔmi.