1 Anɛ pe wa ngɛ wa yi jee kaa bɔ nɛ nyɛ lakpa tsɔɔli ɔmɛ nɛ hɛɛ mɛ nitsɛmɛ a yi jemi womi gagahi kɛ baa nyɛ ngɔ ɔ peeɔ lo? E pee we mi kaa nɔ ko yi jemi womi nɛ tsɔɔ nihi nɛ wa ji he hia nyɛ. Nɛ nyɛ hu nyɛ yi jemi he hia we wɔ. 2 Nyɛ nitsɛmɛ ji yi jemi womi nɛ i ngɛ hlae, ejakaa ke a na tsakemi kpakpa nɛ ba nyɛ mi ɔ, a maa na kaa wa tsu ni tsumi kpakpa ngɛ nyɛ kpɛti. 3 A maa na nyɛ paa kaa womi nɛ wa ngma kɛ je Kristo ngɔ; nɛ tsa pi ningma nyu kɛ ningma tso nɛ a kɛ ngma, se mohu Mawu hɛ kalɔ ɔ Mumi ɔ nɛ a kɛ ngma; nɛ tsa pi tɛ mi nɛ a kpɛ ngɔ wo hulɔ, se mohu adesahi a tsui mi nɛ a ngma ngɛ.

4 Wa tuɔ kikɛmɛ a ni nɛ ɔmɛ a he munyu, ejakaa kɛ gu Kristo nɔ ɔ, wa ngɛ hɛ nɔ kami ngɛ Mawu mi kaa e maa ye kɛ bua wɔ nɛ nɔ nɛ wa de ɔ, e maa ba mi; 5 se pi nɛ wa susuu kaa wa ma nyɛ pee nɔ́ ko ngɛ wɔ nitsɛmɛ wa he wami nya, ejakaa wa he wami kɛ kunimi yemi ɔ, Mawu ngɔ nɛ e jee. 6 Lɛ nɛ e ye kɛ bua wɔ nɛ wa jaje e blɔ nya tomi he nɛ e ma kɛ he nihi a yi wami ɔ ngɔ tsɔɔ mɛ. Wa de we mɛ ke a ma gbo ke ji kaa a yi Mawu mlaa amɛ a nɔ, se mohu, wa ha nɛ a nu sisi kaa a ma na wami ngɛ Mumi Klɔuklɔu ɔ mi, ejakaa ngɛ be nɛ be ɔ mi ɔ, yi wami hemi kɛ gu Kita Nyɔngma amɛ a nɔ yemi ɔ kɛ gbenɔ baa, se ngɛ blɔ nya tomi he ɔ mi ɔ, Mumi Klɔuklɔu ɔ nɛ haa nɔ yi naa wami.

7 Benɛ Mose ngɔ blema mlaa amɛ nɛ kɛ gbenɔ ba a kɛ ma a, e hɛ mi kpɛ kɛ anunyami bɔ nɛ Israel bi ɔmɛ nyɛ we e hɛ mi nɛ a hyɛ; ejakaa benɛ e kɛ Mawu mlaa a ha mɛ kaa a ye nɔ ɔ, kɛkɛ nɛ Mawu anunyami ɔ kpɛ ngɛ e hɛ mi. Se jamɛ a hɛ mi kpɛmi ɔ se kɛ we. 8 Anɛ be nɛ ɔ mi nɛ Mumi Klɔuklɔu ɔ ji nɔ́ nɛ haa wɔ wami ɔ, e sɛ kaa waa hyɛ anunyami nɛ kle pe lɔ ɔ blɔ lo? 9 Ke blɔ nya tomi nɛ woɔ nɔ kɛ yaa gbenɔ mi ɔ he ngɛ anunyami ɔ, anɛ blɔ nya tomi nɛ dlaa nimli kɛ Mawu a kpɛti ɔ he be anunyami nɛ kle pe lɔ ɔ lo? 10 Niinɛ, wa mwɔnɛ ɔ anunyami ɔ pe sa nɔ́ ɔ kulaa, nɛ a be nyɛe ma kɛ to Mose anunyami ɔ he. 11 Ke kekle blɔ nya tomi nɛ se po ɔ hɛɛ hiɔwe anunyami fuu ɔ, lɛɛ anunyami nɛ Mawu kɛ ha blɔ nya tomi he, kɛ ha wa yi wami hemi mwɔnɛ ɔ hiɛ hluu kɛ be nɔ, ejakaa e ngɛ kɛ yaa neneene.

12 Nɛ akɛnɛ wa ngɛ hɛ nɔ kami kaa kikɛmɛ a anunyami he nɛ ɔ se be poe ɔ, waa fiɛ Mawu Munyu ɔ kɛ kã, 13 nɛ wa ko pee kaa Mose nɛ e kɛ hɛ mi hami nɔ́ ha e hɛ mi konɛ Israel bi ɔmɛ nɛ a ko na e hɛ mi nyami nɛ se maa po ɔ.

14 Tsa pi Mose kɛkɛ nɛ a ha e hɛ mi, se e we bi ɔmɛ hu a nga a juɛmi nya, nɛ a nui nɔ́ sisi nɛ a hyɛ we nɔ́ hulɔ. Nɛ kɛ ba si amlɔ nɛ ɔ, a naa ngɛ Ngmami ɔmɛ a kanemi mi kaa a ha Yuda bi ɔmɛ a tsui kɛ a juɛmi nɔ kɛ hɛ mi hami nɔ́ nɛ mi ti; ejakaa a nɛ, nɛ a nui Ngmami ɔ sisi tutuutu. Nɛ ja Kristo nɔ hemi kɛ yemi mi pɛ nɛ a ma nyɛ je hɛ mi hami nɔ́ nɛ ɔ ngɛ. 15 Kɛ ba si mwɔnɛ ɔ ligbi nɛ ɔ nɔ́ ɔ, a ha a tsui nɔ, nɛ ke a ngɛ Mose womi ɔmɛ kanee ɔ, nɔ́ nɛ a susuu ji kaa a ma he a yi wami kɛ gu Kita Nyɔngma amɛ a nɔ yemi nɔ.

16 Se be fɛɛ be nɛ nɔ ko kpale ngɛ e he yayami ɔmɛ a se kɛ ba Nutsɔ ɔ ngɔ ɔ, a jeɔ hɛ mi hami nɔ́ ɔ ngɛ e hɛ mi. 17 Nutsɔ ɔ ji Mumi nɛ haa mɛ wami ɔ nɛ, nɛ he nɛ Mumi ɔ ngɛ ɔ, lejɛ ɔ he yemi ngɛ. 18 Se wɔ Kristo we bi ɔmɛ lɛɛ wa be hɛ mi hami nɔ́ ngɛ wa hɛ mi; wa nyɛɔ plɛɔ ahuhuɛ nɛ jeɔ Mawu anunyami kpo ngɔ tsɔɔ. Nɛ si abɔ nɛ Nutsɔ ɔ Mumi ɔ ngɛ ni tsue ngɛ wa mi ɔ, wa plɛɔ kaa lɛ nitsɛ.