Apocalipse 13

Nyakpe níhi nɛ Gbeye Lohwe ɔ pee

1 Nɛ jehanɛ ɔ, ngɛ ye ni nami ɔ mi ɔ, i na nyakpɛ lohwe ko nɛ e je kpo kɛ je wo ɔ mi kɛ ma. E ngɛ yihi kpaago kɛ kolihi nyɔngma, nɛ matsɛ pɛɛhi nyɔngma ngɛ koli ɔmɛ a nɔ. A ngma musu bɔmi biɛhi ngɛ e yi ɔmɛ eko fɛɛ eko nɔ. 2 Lohwe nɛ ɔ ngɛ kaa ngatsɛ se e ngɛ osisibliisii nanehi, nɛ e nya ngɛ kaa jata nya. Gbeye Lohwe ɔ ngɔ lɛ nitsɛ e he wami kɛ e matsɛ sɛ kɛ nɔ yemi he blɔ agbo kɛ ha lɛ.

3 I na e yi ɔmɛ a kpɛti kake kaa nɔ nɛ a plaa lɛ wawɛɛ nɛ e be hie tsami, se pa nɛ e ko gbe lɛ ɔ gbo. Nɔ fɛɛ nɔ nya kpɛ e he nɛ e nyɛɛ Lohwe ɔ se. 4 Nɔ tsuaa nɔ ja Gbeye Lohwe ɔ, ejakaa e ngɔ e nɔ yemi he wami kɛ ha Lohwe ɔ nɛ je wo ɔ mi ɔ. Nɛ a ja Lohwe ɔ hulɔ, nɛ a de ke, "Mɛnɔ kle kaa lɛ? Mɛnɔ ma nyɛ nɛ e kɛ lɛ maa hwu ta?"

5 Kɛkɛ nɛ Gbeye Lohwe ɔ wo Lohwe ɔ kã nɛ e de musu bɔmi ni nguahi kɛ si Nutsɔ ɔ. Nɛ e ha lɛ nɔ yemi he wami nɛ e ye zugba a nɔ kɛ ya si hlami nyingmi eywiɛ kɛ enyɔ. 6 Jamɛ a be ɔ mi ɔ, e pee musu bɔmi níhi kɛ si Mawu biɛ kɛ e Sɔlemi We ɔ, kɛ níhi kulaa nɛ ngɛ hiɔwe ɔ. 7 Gbeye Lohwe ɔ ha lɛ he wami nɛ e kɛ Mawu nimli ɔmɛ nɛ hwu ta nɛ e ye a nɔ, nɛ e ye ma amɛ kulaa kɛ gbi slɔɔto tuli ɔmɛ tsuo a nɔ matsɛ. 8 Nɛ adesahi tsuo nɛ a ngmɛ a biɛ ngɛ Tobi ɔ nɛ a gbe ɔ Wami Womi ɔ mi loko ji a bɔ je ɔ, a ja musu Lohwe ɔ.

9 "Nɔ fɛɛ nɔ nɛ nuɔ nɔ́ ɔ, e bu tue saminya! 10 Mawu nimli ɔmɛ nɛ a ngma kɛ fɔ si ha mɛ kaa a wo mɛ tsu ɔ, a maa nuu mɛ nɛ a maa ngɔ mɛ kɛ ho. Ni nɛmɛ nɛ a ngma kɛ fɔ si ha mɛ kaa a gbe mɛ ɔ, a maa gbe mɛ. Se nyɛ ko hao, ejakaa enɛ ɔ ji he blɔ kɛ ha nyɛ nɛ nyɛ ma kɛ na tsui si tomi kɛ hemi kɛ yemi."

11 Jehanɛ ɔ, i na nyakpɛ lohwe kpa ko nɛ je zu mi kɛ ma. E ngɛ koli tsɔwi enyɔ nɛ a ngɛ kaa jijɔ kolihi. Se e pɛmi ngɛ gbeye. E ngɛ kaa Gbeye Lohwe ɔ pɛmi. 12 Kekle Lohwe ɔ nɛ jinɛ e pa a ko gbe lɛ ɔ, e tsuɔ e nɔ yemi he wami ɔmɛ kulaa a he ni; nɛ e ha nɛ je ɔ tsuo jaa lɛ. 13 E pee nyakpɛ ni nguahi, nɛ eko ji kaa e ha nɛ la je hiɔwe kɛ ba ngɛ nihi a hɛ mi. 14 Nɛ e gu nyakpɛ okadi peemi nɛ ɔmɛ a nɔ kɛ ngɛ nihi mlɔɔe ngɛ je ɔ mi he fɛɛ he. E peeɔ nyakpɛ ni nɛ ɔmɛ benɛ kekle Lohwe ɔ ngɛ lejɛ ɔ nɛ e ngɛ lɛ hyɛe. Nɛ e ha nɛ je mi bi ɔmɛ puɛ amaga agbo ko nɛ je kekle Lohwe ɔ nɛ a plaa lɛ wawɛɛ se e yi na wami ɔ. 15 A ha lɛ he blɔ nɛ e ngɔ mumi kɛ wo amaga nɛ ɔ mi konɛ e ha nɛ e tu munyu tete. Kɛkɛ nɛ amaga a fa kaa nɔ tsuaa nɔ nɛ kua ke e be lɛ jae ɔ, e sa gbenɔ!

16 E bi nɛ nɔmlɔ ngua kɛ nɔmlɔ wayo, sikatsɛ kɛ ohiafo, nyɔguɛ kɛ odehe tsuo ɔ, a kadi a ti nɔ fɛɛ nɔ ngɛ a hiɔ nine nɔ loo a hɛ nya. 17 Nɛ nɔ ko be nɛ e ma na ni tsumi aloo e ma he nɔ ko ngɛ tsuapo ko mi ke jamɛ a so ɔ loo yi bɔ nɛ daa si kɛ ha Lohwe ɔ biɛ ɔ be ehe. 18 Nɔ́ ko nɛ e nya nami hia susumi saminya ji enɛ ɔ nɛ. Nihi nɛ ma nyɛ ɔ, a tsɔɔ nɔ́ nɛ ɔ nya. Moo ngɔ yi bɔ lafa ekpa kɛ nyingmi ekpa kɛ ekpa kɛ piɛ ningma okadihi abɔ nɛ peeɔ e biɛ ɔ he.