Apocalipse 4

Hiɔwe sinya nɛ a bli ɔ

1 Enɛ ɔ se ɔ, i hyɛ nɛ i na sinya ko nɛ a bli ngɛ hiɔwe. Nɛ gbi ko pɛ kaa tɛtlɛmatlɛ nɛ e kɛ mi tu munyu kekle ɔ de mi ke, "Moo kuɔ kɛ ba hiɛ ɔ nɛ ma tsɔɔ mo nɔ́ nɛ maa ba ngɛ enɛ ɔ se."

2 Amlɔ ɔ nɔuu ɔ, Mumi ɔ ba ye nɔ, nɛ i na matsɛ sɛ ko ngɛ hiɔwe nɛ nɔ ko hii si ngɛ nɔ. 3 Nɔ nɛ hii si ngɛ sɛ ɔ nɔ ɔ ngɛ kpɛe kaa sika tsu mimi ko. Alale bɔle matsɛ sɛ ɔ nɛ e ngɛ kpɛe kaa tɛ nɛ hɛɛ ba mumu su.

4 Matsɛ sɛhi nyingmi enyɔ kɛ eywiɛ kpahi nɛ nikɔtɔmahi nyingmi enyɔ kɛ eywiɛ hii si ngɛ a nɔ ɔ bɔle matsɛ sɛ ɔ kɛ kpe. A wo tade hiɔhi nɛ a ngɔ sika tsu jlasi kɛ bu a yi. 5 I na oslabai gbami, nɛ i nu hiɔwe simi he kɛ je matsɛ sɛ ɔ mi, nɛ kanehi kpaago nɛ daa si kɛ ha Mawu Mumihi kpaago ɔ ngɛ tsoe ngɛ matsɛ sɛ ɔ hɛ mi. 6 Nɛ nɔ́ ko kaa wo ngɛ kpɛe kaa ahuhuɛ ngɛ matsɛ sɛ ɔ hɛ mi. Nɛ nihi eywiɛ komɛ nɛ ngɛ he ngmlɛ, nɛ a ngɛ hɛ ngmɛhi babauu ɔ, a bɔle matsɛ sɛ ɔ. 7 Ni nɛ ɔmɛ a kpɛti kekle nɔ ɔ ngɛ kaa jata. Nɛ nɔ nɛ ji enyɔ ɔ ngɛ kaa na. Etɛne ɔ hɛ mi ngɛ kaa nɔmlɔ. Nɔ nɛ ji eywiɛ ɔ ngɛ kaa kɔle nɛ ngɛ tee. 8 Ni nɛ ɔmɛ a ti eko fɛɛ eko ngɛ pɛli ekpa. Hɛ ngme ngɛ a pɛli ɔmɛ a he fɛɛ he, nɛ a ngɛ lae nyɔ kɛ pia ke, "Klɔuklɔu, klɔuklɔu, klɔuklɔu ji Nutsɔ Mawu Ope, nɔ nɛ ngɛ sa a, kɛ nɔ nɛ ngɛ piɔ ɔ, kɛ nɔ nɛ maa ba a."

9 Nɛ benɛ hɛ kali eywiɛ ɔmɛ ngɔ anunyami kɛ agbo jemi kɛ sina kɛ ngɛ nɔ nɛ hii si ngɛ matsɛ sɛ ɔ nɔ, nɛ ngɛ kɛ je neneene kɛ yaa neneene ɔ hae ɔ, 10 nikɔtɔmahi nyingmi enyɔ kɛ eywiɛ ɔ kpla si ngɛ e hɛ mi nɛ a ja lɛ. A ngɔ a jlasi ɔmɛ ngɔ pue matsɛ sɛ ɔ hɛ mi nɛ a ngɛ lae ke, 11 "Wa Nutsɔ kɛ wa Mawu, mo ji nɔ nɛ e sa nɛ a ngɔ anunyami kɛ agbo jemi kɛ he wami kɛ ha. Ejakaa mo nɛ o bɔ nihi kulaa, nɛ o suɔmi nya nɛ o bɔ mɛ ngɛ nɛ a ngɛ."