1,2 Paulo nɛ ji Yesu Kristo tsɔlɔ nɛ Mawu hla a, kɛ wa nyɛmi Timoteo nɛ ngma womi nɛ ɔ ya ha Mawu nimli nɛ ji nyɛmimɛ Kristo se nyɛɛli anɔkualetsɛmɛ ngɛ Kolose ke:

Dloomi kɛ he jɔmi nɛ je wa Tsɛ Mawu ɔ dɛ mi ɔ ha nyɛ. 3 Wa naa Mawu, wa Mawetsɛ Yesu Kristo Tsɛ ɔ si daa kɛ haa nyɛ ngɛ wa sɔlemi mi, 4 ejakaa wa nu hemi kɛ yemi nɛ nyɛ ngɛ ngɛ Nutsɔ ɔ mi kɛ suɔmi nɛ nyɛɛ kɛ suɔ e nimli ɔmɛ ɔ he. 5 Nɛ nyɛ ngɛ bua jɔmi nɛ ngɛ Hiɔwe ɔ blɔ hyɛe kɛ je benɛ a fiɛ Manye Munyu ɔ kɛ tsɔɔ nyɛ ɔ. 6 Manye Munyu nɛ ɔ nɔuu nɛ su nyɛ ngɔ ɔ, nɛ ngɛ gbɛe kɛ ngɛ fiae ngɛ je ɔ tsuo, nɛ e ngɛ klaahi tsakee ngɛ he tsuaa he kaa bɔ nɛ e tsake nyɛ hu ngɛ ligbi nɔ nɔuu nɛ nyɛ nu, nɛ nyɛ na le Mawu mi mi jɔmi agbo nɛ e ngɛ kɛ ha yayami peeli ɔ.

7 Epafra, wa huɛ kɛ ni tsulɔ nɛ ji Yesu Kristo sɔmɔlɔ anɔkualetsɛ nɛ kɛ Manye Munyu ɔ ba ha nyɛ ɔ, e ngɛ hiɛ ɔ nɛ e maa ye kɛ bua wɔ ngɛ nyɛ nane mi. 8 Lɛ ji nɔ nɛ ba bɔ wɔ suɔmi agbo nɛ Mumi Klɔuklɔu ɔ ha nyɛ kɛ ha ni kpahi ɔ. 9 Enɛ ɔ he je ɔ, kɛ je ligbi nɛ wa nu nyɛ he ɔ, wa jɔɔ we sɔlemi kɛ pɛɛ kpami kɛ nyɛ hami, kaa Mawu nɛ ye kɛ bua nyɛ nɛ nyɛɛ nu nɔ́ nɛ e ngɛ hlae nɛ nyɛɛ pee ɔ sisi. Nɛ wa biɔ lɛ nɛ e pee nyɛ mumi mi ni leli, 10 konɛ nyɛɛ ba nyɛ je mi bɔ nɛ maa sa Nutsɔ ɔ hɛ mi, nɛ nyɛɛ pee nihi kpakpa be fɛɛ be, nɛ nyɛɛ kase Mawu he ni be fɛɛ be nɛ nyɛɛ le lɛ saminya.

11 Wa sɔlemi kɛ pɛɛ kpami hu ji kaa nyɛ hyi tɔ kɛ e agbo jemi he wami kɛ e hɛ mi nyami ɔ, bɔ nɛ pee nɛ nyɛɛ ya nyɛ hɛ mi kɛ bua jɔmi ngɛ Nutsɔ ɔ mi bɔ fɛɛ bɔ nɛ e ma ji ha, 12 nɛ nyɛɛ na Tsɛ ɔ si, nɔ nɛ ha nɛ wa sa nihi nɛ yeɔ Mawu bimɛ a gbosi ni ɔ eko ngɛ e matsɛ yemi nɛ ji la a mi. 13 Ejakaa e kpɔ wɔ kɛ je diblii kɛ abosiami matsɛ yemi ɔ mi, nɛ e kɛ wɔ ba e suɔmi Bi ɔ matsɛ yemi ɔ mi, 14 nɔ nɛ kɛ e muɔ kpɔ wɔ nɛ e kɛ wa he yayami ɔmɛ tsuo ke wɔ ɔ.

15 Kristo hɛɛ Mawu nɛ a nɛ ɔ subai pɛpɛɛpɛ, nɛ lɛ ji bɔ nihi tsuo a Tɛte; 16 nɛ anɔkuale ɔ ji kaa Kristo nitsɛ ji nɔ nɛ bɔ nɔ tsuaa nɔ nɛ ngɛ hiɔwe kɛ zugba a nɔ, níhi nɛ a naa kɛ nihi nɛ a nɛ, mumi je ɔ kɛ e mi matsɛ yemihi, nɔ yemihi kɛ he blɔhi; Kristo nɛ bɔ ni nɛ ɔmɛ kulaa kɛ ha lɛ nitsɛ e he kɛ e hɛ mi nyami womi. 17 E ngɛ loko ji níhi kulaa ba, nɛ e he wami nya nɛ a ngɛ ngɛ. 18 Lɛ ji nɔmlɔ tso ɔ nɛ ji asafo ɔ nɛ e to sisi ɔ e yi. Lɛ ji ni gbogboehi a kpɛti nɔ kekle nɛ te si, nɛ e peeɔ kekle nɔ ngɛ nɔ tsuaa nɔ mi, 19 ejakaa e sa Mawu hɛ mi kaa bɔ nɛ e ngɛ kɛ pi si ɔ, e Bi ɔ hu nɛ e hi ja.

20 Kɛ gu nɔ́ nɛ e Bi ɔ tsu ɔ nɔ ɔ, Mawu je blɔ kɛ ha nɔ tsuaa nɔ nɛ ba e ngo, níhi nɛ ngɛ hiɔwe kɛ nihi nɛ ngɛ zugba a nɔ tsuo, ejakaa Kristo kɛ e sɛumi tso nɔ gbenɔ ɔ kpata Mawu kɛ nimli kɛ bɔ nihi kulaa a kpɛti. 21 Nyɛ nɛ be ko mi ɔ, nyɛ li Mawu ɔ hu piɛ he. Jamɛ a be ɔ mi ɔ, e he nyɛli ji nyɛ. Nyɛ juɛmi kɛ nɔ́ yayami peemi ɔmɛ gba nyɛɛ kɛ lɛ nyɛ kpɛti. Se amlɔ nɛ ɔ, e kpale nyɛ kɛ ba e ngɔ kaa e huɛhi. 22 E pee enɛ ɔ kɛ lɛ nitsɛ e gbenɔ ngɛ sɛumi tso ɔ nɔ. Kɛ gu enɛ ɔ nɔ ɔ, Kristo ngɔ nyɛ kɛ ba Mawu hɛ mi tutuutu. E kɛ nyɛ da si kaa ni klɔuklɔuhi ngɛ e hɛ mi nɛ piami ko loo nya pomi ko be nyɛ he. 23 Nɔ́ nɛ he hia ji kaa nyɛ he Anɔkuale nɛ ɔ nɛ nyɛɛ ye kɛ pi si, nɛ nyɛ he nɛ wa ngɛ Nutsɔ ɔ mi. Nɛ nyɛ he Manye Munyu ɔ nyɛɛ ye kaa Yesu gbo kɛ ha nyɛ, nɛ e ma he nyɛ yi wami. Enɛ ɔ ji bua jɔmi munyu nɛ a kɛ ba ha nyɛ ti nɔ fɛɛ nɔ, nɛ e ngɛ gbɛe kɛ ngɛ fiae ngɛ je ɔ mi tsuo. Nɛ ami Paulo hu e pee mi bua jɔmi kaa i fiɛ kɛ ha ni kpahi.

24 Ye ni tsumi ɔ eko ji kaa ma na amanehlu kɛ ha nyɛ; nɛ ye bua jɔɔ he, ejakaa i ngɛ yee kɛ ngɛ buae nɛ ma gbe Kristo amanehlu nɛ e na kɛ ha e Nɔmlɔ tso nɛ ji asafo ɔ nya.

25 Mawu tsɔ mi nɛ ma ba ye kɛ bua e asafo ɔ, nɛ ma je e laami blɔ nya tomi ɔ kpo kɛ tsɔɔ ma je li ɔmɛ. 26,27 E ngɔ laami sane nɛ ɔ ngɔ to kɛ je blema kɛ yi nɔ ɔmɛ, se amlɔ nɛ ɔ, e sa e hɛ mi kaa e je kpo ngɔ tsɔɔ nihi nɛ suɔ lɛ nɛ a ngɛ kɛ ha lɛ ɔ; nɛ ni nami kɛ anunyami nɛ ngɛ e blɔ nya tomi ɔ mi ɔ, e ngɛ kɛ ha nyɛ ma je li ɔmɛ hu. Laami sane nɛ ɔ ji Kristo nɛ ngɛ nyɛ tsui mi ɔ pɛ ji nyɛ hɛ nɔ kami kɛ ha anunyami nɛ ɔ.

28 Enɛ ɔ he je ɔ, wa fiɛɔ Kristo ngɛ he fɛɛ he kɛ haa nihi nɛ maa bu tue. Nɛ wa bɔɔ mɛ kɔkɔ nɛ wa tsɔɔ mɛ ni bɔ nɛ wa le. Wa suɔmi ji kaa wa kpaka nɔ tsuaa nɔ kɛ ba Mawu ngɔ nɛ e hi kɛ pi si ngɛ nɔ́ nɛ Kristo tsu kɛ ha nɔ fɛɛ nɔ ɔ he. 29 Enɛ ɔ he dengme i ngɛ gboe, nɛ ma nyɛ ma tsu ngɛ Kristo he wami nɛ ngɛ ni tsue ngɛ ye mi ɔ he.