1 Yesu Kristo, Mawu Bi ɔ, e nyakpɛ Manye Munyu ɔ ji nɛ ɔ nɛ.

2 Ngɛ Gbalɔ Yesaia womi ɔ mi ɔ, e ngma ke Mawu ma ha nɛ e Bi ɔ maa ba je nɛ ɔ mi; se loko ji e maa ba a, e maa tsɔ tsɔlɔ pɔtɛɛ ko kɛ sɛ hlami nɛ e ba dla blɔ ngɔ fɔ si ha e bami ɔ.

3 Yesaia ngma ke, "Gbi ko ngɛ pɛe ngɛ nga a nɔ ke, nyɛ dla Nutsɔ ɔ blɔ ɔmɛ nɛ nyɛɛ pee mɛ tlɔmɔɔ."

4 Tsɔlɔ pɔtɛɛ nɛ ɔ biɛ ji Yohane Baptisilɔ. E hi nga nɔ nɛ e fiɛ nɛ e de ke, "Nyɛ tsake nyɛ tsui nɛ a sɔle nyɛ konɛ Mawu nɛ wo nyɛ tɔmi ɔmɛ kɛ ke nyɛ." 5 Kɛkɛ nɛ nihi fuu je Yerusalem kɛ Yudea zugba a nɔ kɛ ho e ngɔ ya nɛ a ya hyɛ lɛ ha nɛ a bu lɛ tue. Nɛ benɛ a jaje a he yayami ɔmɛ ɔ, e baptisi mɛ ngɛ Yordan Pa a mi. 6 Yohane nɛ ɔ, yoma he bwɔmi tade nɛ e wo, lohwe he womi kpa fi e mlɛ mi, nɛ nga nɔ baalɛhi kɛ hwo pɛ ji e niye ni. 7 E ngɛ fiɛe ngɛ dee ke, "Nɔ ko nɛ kle kulaa pe mi ma; nɔ ko nɛ i sɛ kaa i pineɔ e tokota nya kpa tete po. 8 Ami lɛɛ nyu kɛkɛ nɛ i kɛ ngɛ nyɛ baptisie, se lɛɛ Mumi Klɔuklɔu ɔ nɛ e ma kɛ baptisi nyɛ."

9 Ligbi ko ngɛ jamɛ a be ɔ mi nɔuu ɔ, Yesu je Nazaret ngɛ Galilea kɛ ba Yohane ngɔ nɛ Yohane baptisi lɛ ngɛ Yordan Pa a mi. 10 Benɛ Yohane baptisi lɛ ta nɛ Yesu je kpo ngɛ nyu ɔ mi ɔ, e na hiɔwe nya nɛ bli nɛ Mumi Klɔuklɔu ɔ ngɛ si kplee kaa lahuɛ kɛ ma e ngɔ. 11 Nɛ gbi ko de kɛ je hiɔwe ke, "Mo ji ye suɔmi Bi ɔ nɛ, nɛ ye bua jɔɔ o he saminya."

12 Amlɔ ɔ mi nɔuu ɔ, Mumi Klɔuklɔu ɔ wo lɛ kɛ ho nga a nɔ ya. 13 E ya hi nga a nɔ ligbi nyingmi eywiɛ ngɛ nga mi lohwehi a kpɛti nɛ Abosiami ba ka lɛ, nɛ lɔ ɔ se ɔ, bɔfo ɔmɛ ba sɔmɔ lɛ.

14 Pee se ɔ, benɛ Matsɛ Herode nu Yohane kɛ wo tsu mi ɔ, Yesu ba Galilea nɛ e ba fiɛ Manye Munyu ɔ nɛ e de ke, 15 "Si ko nɛ a wo ɔ, e be su. Mawu Matsɛyemi ɔ su si ta. Nyɛ tsake nyɛ tsui nɛ nyɛ he Manye Munyu ɔ nɛ nyɛɛ ye."

16 Ligbi ko benɛ Yesu ngɛ nyɛɛe ngɛ Galilea Wo ɔ nya a, e na Simon kɛ e nyɛmi Andrea nɛ a ngɛ hɛe, ejakaa wo yali ji mɛ.

17 Kɛkɛ nɛ Yesu tsɛ mɛ nɛ e de mɛ ke, "Nyɛɛ ba nɛ nyɛ ba nyɛɛ ye se nɛ ma pee nyɛ nimli a klaahi a yi wami heli." 18 Nɛ amlɔ ɔ nɔuu ɔ, a si a ya amɛ nɛ a ya bɔni Yesu se nyɛɛmi.

19 Benɛ e ya e hɛ mi bɔɔ ɔ, e na Yakobo kɛ Yohane nɛ ji Zebedeo bimɛ ɔmɛ nɛ mɛ hu a hii si ngɛ a lɛ ɔ mi ngɛ ya mi kpɛe. 20 Kɛkɛ nɛ e tsɛ mɛ nɛ mɛ hu a si a tsɛ Zebedeo kɛ e apaa yeli ɔmɛ ngɛ lɛ ɔ mi nɛ a ya nyɛɛ e se.

21 Yesu kɛ nihi nɛ e tsɛ ɔmɛ tsa a nyɛɛmi ɔ nɔ kɛ ya su Kapernaum. Nɛ Hɔ nɛ ji Hejɔɔmi Ligbi ɔ nɔ mɔtu ɔ, a ho Yuda bi ɔmɛ a kpe he ɔ ya nɛ Yesu ya tsɔɔ ni ngɛ lejɛ ɔ. 22 Yesu ni tsɔɔmi ɔ pee ni ɔmɛ nyakpɛ saminya, ejakaa e tsɔɔ mɛ ni kaa nɔ ko nɛ ngɛ nɔ nɛ e ngɛ dee ɔ nɔ he wami; e ni tsɔɔmi ɔ je ekpa kulaa ngɛ womi ngmali ɔmɛ a nɔ ɔ he.

23 Tlukaa a, nyumu ko nɛ e be saminya, ejakaa mumi yayamihi ngɛ nɔ dee ha lɛ ɔ te si ngɛ ni ɔmɛ a kpɛti nɛ e hia ngmlaa ke, 24 "Mɛni he je o ngɛ wɔ haoe, Yesu Nazaret nɔ? Wa hɛ mi kpatami nɛ o ba lo? I le o mi tso; mo ji Mawu Bi Klɔuklɔu ɔ nɛ!"

25 Se Yesu ka mumi ɔ hɛ mi nɛ e de lɛ ke, "O nya nɛ jɔ; moo je kpo ngɛ e mi!" 26 Nɛ benɛ mumi yayami ɔ huanya nɔmlɔ tso ɔ wawɛɛ nɛ e po lɛ ngɔ fia si ɔ, kɛkɛ nɛ nɔ ɔ kpa ngmlaa nɛ mumi yayami ɔ hia kɛ je e mi. 27 Kikɛmɛ a nɔ nɛ ɔ pee nihi nɛ ngɛ lejɛ ɔ nyakpɛ saminya nɛ a bi ke, "Mɛni ji enɛ ɔ, tsɔɔmi he ko ba je kpo ngɛ wa kpɛti. E ngaa mumi yayamihi po a yi nɛ a buɔ tue nɛ a he jɔɔ!" 28 Sane nɛ ɔ ha nɛ Yesu biɛ pɛ ngɛ Galilea zugba a mi tsuo.

29 Benɛ a je kpe he ɔ nɔuu ɔ, a ho Simon kɛ Andrea a we ɔ mi ya. 30 Nɛ a ya na Simon nganyɛ nɛ asla yobu ko fia lɛ nɛ e pee kpotoo ke hwɔɔ si. Kɛkɛ nɛ a de Yesu nɔuu. 31 Yesu be kɛ ho hiɔtsɛ ɔ ngɔ ya nɛ e ya nu yo ɔ nine si nɛ e wo e nɔ kɛ da si nɛ amlɔ ɔ nɔuu ɔ, asla a po ngɛ e nɔ nɛ e sɔmɔ mɛ.

32 Gbɔkuɛ benɛ pu nɔ si se ɔ, nihi fuu wo a hiɔtsɛhi kɛ nihi hu nɛ mumi yayamihi ngɛ nɔ dee ha mɛ ɔ kɛ ba Yesu ngɔ konɛ e tsa mɛ. 33 Kɛkɛ nɛ agbo ɔ nya tsuo hyi tɔ kɛ nimli babauu nɛ je Kapernaum. 34 Nɛ Yesu tsa hiɔtsɛ slɔɔto ɔmɛ nɛ e hia mumi yayami ɔmɛ ngɛ nihi a mi. E ha we mumi yayami ɔmɛ blɔ nɛ a tu munyu ko kulaa, ejakaa mumi yayami ɔmɛ le e mi tso kaa Mawu Bi ji lɛ.

35 E nɔ jena makɛ mla nɛ je mi tsɔ we lolo ɔ, e te si nɛ e je kpo kɛ ho nga nɔ he ko ya nɛ e ya sɔle ngɛ lejɛ ɔ.

36 Pee se ɔ, Simon kɛ e huɛ ɔmɛ bɔni lɛ hlami; 37 nɛ benɛ a ya na lɛ ɔ, a de lɛ ke, "Mo nɛ nɔ tsuaa nɛ ngɛ hlae nɛ ɔ nɛ."

38 Se Yesu de mɛ ke, "Nyɛ ha nɛ waa ho kɔpe ɔmɛ nɛ ngɛ hiɛ ɔ kasa mi ɔmɛ a mi ya nɛ ma ya fiɛ ngɛ lejɛ ɔmɛ hu, ejakaa fiɛmi ɔ he nɛ i ba ngɛ."

39 Nɛ Yesu kpa Galilea zugba nɔ kɔpekɔpe ɔmɛ kulaa mi nɛ e fiɛ ngɛ a kpe he ɔmɛ nɛ e hiaa mumi yayami ɔmɛ ngɛ nihi a mi. 40 Ligbi ko ɔ, kpititsɛ ko ba Yesu ngɔ nɛ e ba kpla si ngɛ e hɛ mi nɛ e kpa lɛ pɛɛ ke, "Ke o suɔ ɔ, o ma nyɛ ma tsa mi."

41 Hiɔtsɛ ɔ ni pee Yesu mɔbɔ nɛ e sɔle e nine nɛ e ta e he nɛ e de lɛ ke, "I suɔ, kpiti ɔ nɛ e ta ha mo!" 42 Yesu nya nɔɛ si nɛ kpititsɛ ɔ na he wami.

43 Kɛkɛ nɛ Yesu wo lɛ blɔ, nɛ e wo lɛ si veveeve ke, 44 "Yaa nɔuu; o kɛ nɔ ko nɛ ko tu munyu ngɛ blɔ ɔ nɔ, nɛ o wo o he kɛ ya tsɔɔ osɔfo ɔ; konɛ o hɛɛ bɔ sami nɔ́ ɔmɛ nɛ Mose to ha kpititsɛmɛ nɛ na tsami ɔ, nɛ a kɛ ye o he odase kaa jehanɛ ɔ lɛɛ hiɔ ɔ jɔ ha mo."

45 Se benɛ nyumu ɔ je Yesu ngɔ nɔuu pɛ nɛ e bɔni nɔ tsuaa nɔ nɛ e kɛ maa kpe ɔ nɔ nɛ Yesu pee ha lɛ ɔ demi. E kɛ we nɛ nɔ tsuaa nɔ nu hiɔ nɛ ɔ tsami ɔ he ngɛ Galilea kulaa, nɛ lɔ ɔ he je ɔ Yesu nyɛ we nɛ e sɛɛ ma ko mi ngɛ paa mi hu, ejakaa he tsuaa he nɛ e maa gu ɔ nimli babauu ba buaa woɔ e he. Ja a he ɔ, he nɛ Yesu hii ji nga nɔ nɛ nihi jee mahimahi a mi kɛ baa e ngɔ.