1 Gbɔkuɛ mi benɛ Hejɔɔmi Ligbi ɔ be ɔ, Maria Magdalena kɛ Salome kɛ Maria nɛ ji Yakobo nyɛ ɔ ya he tsopa kɛ he via nɛ a ma kɛ ya wo gbogboe ɔ.

2 Ja a he je ɔ, e nɔ jena nɛ ji otsi ɔ kekle ligbi ɔ nɔ benɛ pu ke e tee si pɛ nɛ a ho yɔkɔ ɔ he ya. 3 Benɛ a yaa a, a bɔni susumi kaa mɛnɔ po nɛ e ma kpɛne tɛ ɔ kɛ je muɔ ɔ nya ha mɛ lo?

4 Se benɛ a ke a maa hyɛ ɔ, a na kaa a kpɛne jamɛ a tɛ agbo ɔ kɛ je muɔ ɔ nya nɛ muɔ ɔ nya fɔɔ si. 5 Nɛ benɛ a sɛ muɔ ɔ mi ɔ, a na niheyo ko nɛ hii si ngɛ a hiɔ nɔ ma je nɛ e wo tade futa; nɛ a tsui po. 6 Se bɔfo ɔ de mɛ ke, "Nyɛ ko ye gbeye! Nyɛ ngɛ Yesu nɛ je Nazaret ɔ nɛ a sɛu lɛ mwɔnɛ ɔ ji ligbi etɛ ɔ hlae lo? E te si. Nyɛ nɛɛ, he nɛ a to lɛ ngɛ ɔ ji nɛ. 7 Nyɛɛ kpale mohu nɛ nyɛ ya bɔ e kaseli ɔmɛ kɛ Petro hu amaniɛ ke, e sɛ nyɛ hlami kɛ yaa Galilea. Nyɛ maa na lɛ ngɛ lejɛ ɔ kaa bɔ nɛ e wo nyɛ si ɔ."

8 Kɛkɛ nɛ yi ɔmɛ wo fo kɛ je yɔkɔ ɔ he nɛ bibi gbe mɛ. A de we nɔ ko nɔ ko, ejakaa gbeye nu mɛ.

9 Hɔgba makɛ ji be nɛ Yesu te si kɛ je gbeje ɔ nɛ. Nɛ nɔ kekle nɛ e je e he si ngɔ tsɔɔ ji Maria Magdalena, nɔ nɛ e je mumi yayamihi kpaago kɛ je e mi ɔ. 10 Lɛ nɛ e ya bɔ kaseli ɔmɛ nɛ ngɛ kɔmɔ yee, nɛ a ngɛ ya foe ɔ amaniɛ. 11 E de mɛ ke e te si nɛ e hɛ ngɛ, se a he we lɛ yi.

12 Pee se ngɛ jamɛ a ligbi ɔ nɔuu nɔ ɔ, e je e he si ngɛ blɔ kpa nɔ ngɔ tsɔɔ e kaseli ɔmɛ a ti ni enyɔ be mi nɛ a ngɛ nyɛɛe kɛ je Yerusalem kɛ yaa kɔpe ko mi ɔ. 13 Ni nɛ ɔmɛ hu ya bɔ a nyɛmimɛ kaseli kpa amɛ amaniɛ kaa a na lɛ; se mɛ hu nɔ ko he we mɛ yi.

14 Enɛ ɔ se ɔ, e je e he si ngɔ tsɔɔ e kaseli nyɔngma kɛ kake nɛ piɛ ɔmɛ be mi nɛ a bua a he nya ngɛ ni yee. Nɛ e ka a hɛ mi ngɛ a tsui wami ɔ he je, kaa a he we amaniɛ nɛ nihi nɛ na lɛ ɔ bɔ mɛ ɔ nɛ a ye, kaa e te si kɛ je gbeje ɔ.

15 Jehanɛ ɔ e de mɛ ke, "Nyɛɛ ya je ɔ mi tsuo nɛ nyɛ ya fiɛ Manye Munyu ɔ kɛ ha nɔ́ fɛɛ nɔ nɛ a bɔ. 16 Ni nɛmɛ nɛ ma he maa ye nɛ a maa baptisi mɛ ɔ, a ma he a yi wami; nɛ ni nɛmɛ nɛ be hee maa ye ɔ, a maa bu mɛ fɔ.

17 Nɛ a ma ha ni nɛmɛ nɛ ma he maa ye ɔmɛ he wami nɛ a ma tsu nyakpɛ ni slɔɔtohi. A maa hiaa mumi yayamihi ngɛ ye biɛ mi nɛ a maa tu gbihi nɛ nɔ ko nui hyɛ. 18 A ma fiɛ sinɔ duɔtsɛmɛ a he nɛ a be mɛ nɔ́ ko pee. Nɛ ke ji a nu nɔ́ ko nɛ duɔ ngɛ mi hu e be mɛ gbee. Nɛ ke a wo a nine ngɔ to hiɔtsɛmɛ a nɔ ɔ, a ma na he wami."

19 Benɛ e kɛ mɛ tu munyu nɛ ɔmɛ se ɔ, a wo lɛ kɛ ho hiɔwe ya, nɛ e ya hi si ngɛ Mawu hiɔ nine nɔ.

20 Se e kaseli ɔmɛ lɛɛ a hia blɔ ya fiɛ Munyu ɔ ngɛ he tsuaa he. Nɛ Nutsɔ ɔ kɛ mɛ tsu ni nɛ e wo a munyu ɔmɛ he wami kɛ gu nyakpɛ nihi nɛ nyɛɛ a munyu ɔmɛ a se ɔ.