1 Ligbi ko maa pee be nɛ ɔ mi kɛ ɔ, Yesu to he hɛ kaa asafo nɛ ba bua ekohu ngɛ lɛ tue bue ɔ, hwɔ ngɛ mɛ yee. Kɛkɛ nɛ e tsɛ e kaseli ɔmɛ nɛ e de mɛ ke, 2 "Nimli nɛ ɔmɛ a ni ngɛ mi mɔbɔ pee. Ejakaa ligbi etɛ sɔuu ji nɛ ɔ nɛ a ba hiɛ ɔ nɛ a wui a nya mi nɔ́ ko. 3 Nɛ ke i wo mɛ blɔ ke a ho we mi ya kɛ muklii mi gu ɔ, klibi ma ya po a ti ni komɛ ngɛ blɔ ɔ nɔ, ejakaa a je he kɛ."

4 Se e kaseli ɔmɛ ha lɛ heto nɛ a bi ke, "Jije wa ma na niye ni ngɛ ngɛ nga nɛ ɔ nɔ nɛ maa tɔ nimli asafo nɛ pueɔ si nɛ ɔ lo?"

5 Nɛ e bi mɛ ekohu ke, "Abolo nyɛmɛ ngɛ nyɛ dɛ?" Nɛ a ha lɛ heto ke, "Kpaago." 6 Kɛkɛ nɛ e de ni ɔmɛ ke a hi si ngɛ zugba. Jehanɛ ɔ e wo abolo kpaago ɔ nɛ benɛ e na Mawu si ngɛ he se ɔ, e ku abolo ɔmɛ a mi nɛ e ngɔ kɛ ha e kaseli ɔmɛ ke a dla kɛ ha ni ɔmɛ. Nɛ a dla kɛ ha mɛ. 7 A ngɛ lo tsɔwi komɛ hulɔ. Yesu jɔɔ lɔ ɔ hu nɔ nɛ e de e kaseli ɔmɛ ke a dla lo ɔ hu kɛ ha ni ɔmɛ.

8 Nɛ asafo babauu ɔ tsuo ye ni ɔ nɛ nɔ tsuaa nɔ tɔ; nɛ bibliwi nɛ pue si nɛ a kukuɔ ɔ hyi kusii nguanguaanguahi kpaago. 9 Nihi nɛ ye ni ɔ a hiɛmi maa pee akpe eywiɛ. Nɛ niye ni ɔ se ɔ, e wo mɛ blɔ.

10 Kɛkɛ nɛ nɔuu nɛ e kɛ e kaseli ɔmɛ hu sɛ lɛ kɛ ho Dalmanuta ni ɔmɛ a mi ya. 11 Benɛ Farisi bi ɔmɛ nu he kaa e ba a, a ba e ngɔ nɛ a kɛ lɛ ba sa nya; nɛ a ka lɛ nɛ a de lɛ ke, "Moo pee hiɔwe okadi ko ngɔ tsɔɔ wɔ nɛ waa hyɛ konɛ waa na kaa Mawu Nɔmlɔ ji mo."

12 Benɛ Yesu nu enɛ ɔ, e hao ngɛ e mumi mi nɛ e bi ke, "Mɛni he je nɛ yi nɔ nɛ ɔ bimɛ ngɛ okadi hlae? Anɔkuale ji kaa a be okadi kpa ko pee hu kɛ tsɔɔ nyɛ."

13 Kɛkɛ nɛ e kpale sɛ lɛ ɔ mi amlɔ ɔ nɔuu nɛ e si mɛ kɛ ho pa a se ya. 14 Se e kaseli ɔmɛ a hɛ je nɔ nɛ a hɛɛ we abolo kɛ to dɛ, nɛ lɔ ɔ he je ɔ abolo kake too pɛ nɛ piɛ ngɛ lɛ ɔ mi ha mɛ.

15 Benɛ a ngɛ pa a nɔ kɛ yaa a, Yesu de mɛ ke, "Nyɛɛ hyɛ nyɛ he nɛ hi ngɛ Farisi bi ɔmɛ kɛ Matsɛ Herode a ma sasɛ ɔ he!"

16 E kaseli ɔmɛ susu kaa abolo nɛ a hɛɛ we ɔ he munyu nɛ Yesu ngɛ tue.

17 Yesu na le nɔ́ he nɛ a ngɛ sɛsɛɛ ɔ nɛ e bi mɛ ke, "Mɛni he je nɛ nyɛ ngɛ susue kaa abolo nɛ nyɛ hɛɛ we ɔ he munyu i ngɛ tue? Nyɛ kɔ we nɔ́ se lolo? Anɛ nyɛ juɛmi nya de ma lo? 18 Kɛ pee kɛɛ nɛ nyɛ ngɛ hɛ ngmɛ se nyɛ hyɛ we ní; nɛ nyɛ ngɛ tue hu se nyɛ nui nɔ́ ɔ? Pe nyɛ hɛ je nɔ́ fɛɛ nɔ nɔ mo?

19 Benɛ i ku abolo enuɔ mi ngɔ ha nyɛ nɛ nyɛ dla kɛ ha nihi akpe enuɔ ɔ, bibliwi nɛ nyɛ kukuɔ ɔ, kusii nyɛmɛ nɛ nyɛ na?" A ha lɛ heto ke nyɔngma kɛ enyɔ.

20 "Nɛ benɛ i ku abolo kpaago kɛ ha nyɛ nɛ nyɛ dla ngɔ ha nihi akpe eywiɛ ɔ nɛɛ, nyɛmɛ piɛ?" A ha heto ke, "Bibliwi kusii kpaago."

21 Nɛ e bi mɛ ke, "Kɛ pee kɛɛ nɛ nyɛ nui sisi kɛ sa? Nɛ nyɛ ngɛ susue kaa abolo nɛ wa hɛɛ we ɔ nɛ ngɛ ye juɛmi nya gbae lo?"

22 Benɛ a ya su Betsaida a, a wo nɔ ko nɛ e hɛ ngmɛ yu kɛ ba e ngɔ nɛ a kpa lɛ pɛɛ ke e wo e nine ngɔ ta e he nɛ e tsa lɛ. 23 Yesu ta hiɔtsɛ ɔ dɛ mi nɛ e kpaka lɛ kɛ je kpo ngɛ ma a mi. Nɛ benɛ e su lada kɛ pue hiɔtsɛ ɔ hɛ ngmɛ ɔmɛ a nɔ ɔ, e wo e nine ngɔ bu a nɔ. Kɛkɛ nɛ e bi lɛ ke, "O ngɛ nɔ́ hyɛɛ lo?"

24 Nyumu ɔ po he nɛ e de Yesu ke, "Ee, i ngɛ nihi hyɛe, se a pee kaa tohi ngɛ ye hɛ mi."

25 Yesu wo e nine ngɔ bu e hɛ ngmɛ ɔmɛ a nɔ ekohu. Hiɔtsɛ ɔ gbɛ e hɛ ngmɛ mi kɛkɛ nɛ e hɛ ngmɛ ɔmɛ bli nɛ e bɔni nɔ́ hyɛmi paa. 26 Nɛ Yesu wo lɛ blɔ ke e ho e we mi ya ngɛ e wekuli a ngɔ. Nɛ e bɔ lɛ kɔkɔ ke, "Mo ko de ke o ngɛ kpalee kɛ yaa kɔpe ɔ mi kekle!"

27 Enɛ ɔ se ɔ, Yesu kɛ e kaseli ɔmɛ si Galilea kɛ ho ma tsɔwi nɛ bɔle Kaisaria Filipi ɔ a mi ya. Benɛ a yaa ngɛ blɔ ɔ nɔ ɔ, e bi e kaseli ɔmɛ ke, "Mɛnɔ ni ɔmɛ deɔ ke i ji? Kɛ a ngɛ dee ngɛ ye he kɛɛ?" A ha lɛ heto ke, 28 "Ni komɛ ke Yohane Baptisilɔ ɔ ji mo, ni komɛ hu ke blema gbali ɔmɛ a ti nɔ eko ji mo."

29 Yesu bi mɛ ke, "Nɛ nyɛ nɛɛ, mɛnɔ tutuutu ji mi nɛ nyɛ le piɔ?" Petro ha heto nɛ e de lɛ ke, "Mo ji Yiwamihelɔ ɔ nɛ." 30 Se Yesu wo mɛ si ke a ko de nɛ nɔ ko nɛ e nu.

31 Enɛ ɔ se ɔ, e je sisi nɛ e bɔni e kaseli ɔmɛ amanehlu nɛ maa ba e nɔ kɛ nisɛ ni a ni slɔɔtohi nɛ a maa pee lɛ ɔ demi. Nɛ e de mɛ ke, "Nɔmlɔ Bi ɔ maa na nɔ, nɛ ma mi nikɔtɔma amɛ kɛ asafo nya dali ɔmɛ kɛ mlaa tsɔɔli ɔmɛ ma kua lɛ; nɛ a ma je e he gbi kɛ ha nɛ a maa gbe lɛ. Se ligbi etɛ se ɔ, e maa te si kɛ je gbeje." 32 E de mɛ enɛ ɔ paa, nɛ lɔ ɔ he je ɔ, Petro tsɛ lɛ kɛ ya se nɛ e bɔni e hɛ mi kami ngɛ munyu nɛ e tu ɔ he.

33 Se Yesu plɛ e hɛ mi kɛ kpee e kaseli ɔmɛ, nɛ e hyɛ mɛ, nɛ e gli kɛ wo Petro nɛ e de lɛ ke, "Moo be kɛ ho ye se ya, Abosiami, nimli a juɛmi nya munyu nɛ o ngɛ mi tue nɛ ɔ nɛ; e slo Mawu yi mi tomi."

34 Kɛkɛ nɛ Yesu tsɛ ni ɔmɛ kɛ e kaseli ɔmɛ kɛ ba e ngɔ nɛ e de mɛ ke, "Ke mo nɔ ko o suɔ nɛ o maa nyɛɛ ye se ɔ, lɛɛ o ma kua o he nɛ o wo o sɛumi tso ɔ nɛ o kɛ nyɛɛ ye se. 35 Ejakaa nɔ tsuaa nɔ nɛ susuu kaa e maa baa e klaa yi ɔ, e maa je e dɛ; se nɔ tsuaa nɔ nɛ ma wo e he kɛ sa afɔle ngɛ ye he loo ngɛ Manye Munyu ɔ he ɔ, e ma he lɛ nitsɛ e yi wami.

36 Mɛni se nɔmlɔ ma na ke ji kaa e na je nɛ ɔ mi nihi tsuo se e laa e klaa a. 37 Anɛ nɔ́ ko ngɛ nɛ he jua wa pe e klaa a lo? 38 Nɛ ke nɔ ko ngɛ nɛ ami kɛ ye munyu ɔ he peeɔ lɛ zo ngɛ yi nɔ bimɛ yayami peeli nɛ be hemi kɛ yemi nɛ ɔ a be nɛ ɔ mi ɔ, lɛ hu e he maa pee Nɔmlɔ Bi ɔ zo be mi nɛ e maa ba ngɛ e Tsɛ anunyami ɔ mi kɛ e bɔfo klɔuklɔu ɔmɛ."