नीरगमन 17

चाफर्‌या मे गेथु पाणी

1 अळतेण ईस्‌रायली माणहु नी आखी मंडळी सीन नाम ना जंगल मे गेथी नीकळी, अने यहोवा ना हुकम नी अनसारे नीकळीन रपीदीम नाम ना जागा मे पड़ावो नाख्‌या; अने तां तीमने पीवा नु पाणी नी जड़्‌यु।✝17:1 गीनती 33:12-14 2 करीन तीहया मुसा ह़ाते बक-बक करीन केवा बाज ज्‌या, "आमु ने पीवा नु पाणी लाव।" मुसो तीमने केदो, "तमु मारी ह़ाते काहा बक-बक कर र्‌या? अने यहोवा नी पारख काहा कर र्‌या?"✝17:2 गीनती 20:3; वेवस्‌थावीवरन 6:16 3 पण तां माणहु पाणी पीवा करीन तरहेला हता। ता तीहया आहयु कीन मुसा भणीन बक-बक करवा बाज ज्‌या, "आमु ने सोरा अने जानवरु भेळ तरहेला मार नाखवा करीन मीस्‌र गेथा काहा ली आवलो से?"✝17:3 नीरगमन 14:12 4 ता मुसो यहोवा ने आड़्‌यो, अने केदो, "आहया माणहु ह़ाते मे ह़ु करु? आहया आखा मने दगड़ाटीन मारवा नाखवा करीन तीयार से।" 5 यहोवा मुसा ने केदो, "ईस्‌रायली माणहु ना डायला माणहु मे गेथा थोड़ाक तारी ह़ाते ली ले; अने जे लाकड़ी वेर तु नील नंदी ने देदलो, तीने तारा हात मे लीन माणहु अगळ-अगळ चाल। 6 देख, मे तारी अगळ जाय्‌न होरेब नाम ना बड़ा ना एक ढाट पोर उबो रेही; अने तु तीहया ढाट पोर लाकड़ी देजे, ता तीनी मे गेथु पाणी नीकळहे, जीने आहया माणहु पी सके।" ता मुसो ईस्‌रायल ना डायला माणहु नी देखणते तेमेत कर्‌यो। 7 अने मुसो तीहया जागा नु नाम मस्‌सा*17:7 मतलब पारख अने मरीबा*17:7 मतलब झगड़ो पाड़्‌यो, काहाके ईस्‌रायली माणहु तां ह़ारीक मुसा ह़ाते बक-बक करला हता, अने यहोवा नी पारख आहयु कीन कर्‌या, "ह़ु यहोवा अमारी वचमे से के नी?"

अमालेकी माणहु ह़ाते झुमायणु

8 आनीन अळतेण अमालेकी जाती ना माणहु आवीन रपीदीम मे ईस्‌रायली माणहु ह़ाते झुमायवा बाज ज्‌या।✝17:8 1 समुवेल 15:2 9 ता मुसो यहोसु ने केदो, "अमारी जुगु ईस्‌रायली माणहु मे गेथा अदमी ने टाळीन छाट ले, अने बाहर जाय्‌न अमालेकी ह़ाते झुमाय; अने मे वाहणे भगवान नी लाकड़ी हात मे लीन बड़ा नी चोट्‌ली पोर उबो रेही।" 10 जेम मुसा ना आहया हुकम नी अनसारे यहोसु अमालेकी ह़ाते झुमायवा बाज ज्‌यो, अने मुसा, हारुन अने हुर बड़ा नी चोट्‌ली पोर चड़ ज्‌या। 11 जत्‌यार तक मुसो आह़फा नो हात उचो कर रेतो हतो तांह तक ते ईस्‌रायली माणहु जीकता हता; पण जत्‌यार मुसो हात हेटो करतो हतो ता अमालेकी माणहु जीकता हता।✝17:11 भजन सहीता 44:6; याकुब 5:16 12 पण जत्‌यार मुसा ना हात थाक ज्‌या, ता हारुन अने हुर एक दगड़ो लीन मुसान्‌तां हेटो मेक देदा, अने मुसो तीनी पोर बह ज्‌यो, अने हारुन अने हुर तीना हात ह़माळता र्‌या; एक जमणी ह़ोड़ अने एक डखरी ह़ोड़; अने तीना हात दाहड़ु बुडे तक उचा र्‌या। 13 अने यहोसु आह़फा नी तलवार नी ताखत सी अमालेकी माणहु ने हराय नाख्‌यो।

14 ता यहोवा मुसा ने केदो, "फोम राखवा करीन आहयी वात ने कीताप मे लीख ले अने यहोसु ने ह़मळाय दे के मे वादळान हेटो गेथो अमालेकी माणहु नी फोम करवा नी सेलाणी बी पुरी रीती सी मीटाड़ देही।"✝17:14 वेवस्‌थावीवरन 25:19; 1 समुवेल 15:2 15 ता मुसो एक वेदी बणायो अने तीनु नाम "यहोवा नीस्‌सी"*17:15 यहोवा नीस्‌सी यहोवा मने जीकाड़े पाड़्‌यो; 16 अने तीहयो केदो, "यहोवा नो झंडो धर राखो। पीड़ी सी पीड़ी तक मालीक जुगु अमालेकी माणहु ह़ाते अमारो झगड़ो हयतो रेहे।"