नीरगमन 32

ह़ोना नु वाछड़ु

1 जत्‌यार माणहु देख्‌या के मुसा ने बड़ा पोर गेथो उतरवा मे वार हय री, ता तीहया हारुन ने तां एक्‌ठा हय्‌न केवा बाज ज्‌या, "आव अमारी जुगु देवता बणाव, जे अमारी अगळ-अगळ चाले; काहाके तीहयो माणेह मुसा ने जे आमने मीस्‌र देस मे गेथा नीकाळीन ली आवलो से, आमु नी जाणता के तीनु ह़ु हयु?"✝32:1 नेवताळा ना काम 7:40 2 हारुन तीमने केदो, "तमारा लाड्‌या अने सोरा-सोरी ना कान्‌टे ह़ोना ना जे टोकर्‌या से तीने नीकाळो, अने मारीन्‌तां ली आवो।" 3 ता आखा माणहु तीमना कान्‌टे गेथा ह़ोना ना टोकर्‌या काड्‌या, अने हारुन ने तां ली आया। 4 हारुन ह़ोनु ने तीमना हात मे गेथु लेदो, अने एक ह़ाचा मे नाख्‌यो, अने एक वाछड़ु नी मुरती बणायो। ता माणहु केवा बाज ज्‌या, "ए ईस्‌रायल, तारो भगवान जे तने मीस्‌र देस गेथो छोड़ाय लावलो से, तीहयो आहयोत से।"✝32:4 1 राजा 12:28; नेवताळा ना काम 7:41 5 आहयु देखीन हारुन तीनी अगळ एक वेदी बणायो; अने आहयु परच्‌यार कर्‌यो, "वाहणे यहोवा जुगु तीवार रेहे।" 6 अने बीजा दाड़े माणहु ह़वारे उठीन होम बादा चड़ाया, अने मेल-मीलाप नी बादा ली आया; अने अळतेण बहीन खादा-पीदा, अने गलत काम करवा बाज ज्‌या।✝32:6 1 कुरन्‌थी 10:7

7 ता यहोवा मुसा ने केदो, "बड़े गेथो हेटो उतर जा, काहाके तारा माणहु, जीने तु मीस्‌र देस मे गेथा नीकाळ लावलो से, तीहया बगड़ जेला से; 8 अने जे वाटे चालवा नो हुकम मे तीमने आपलो तीहयी वाट गेथा एतरा साटा भटक ज्‌या, अने तीहया एक वाछड़ु नी मुरती बणाय र्‌या, अने तीनी पुजा कर्‌या, अने तीनी जुगु बादा बी चड़ाया, अने आहयु केदला से, ‘ए ईस्‌रायली, तमारो भगवान जे तमने मीस्‌र देस मे गेथो छोड़ाय लावलो से तीहयो आहयोत से।’" 9 अळतेण यहोवा मुसा ने केदो, "मे आहया माणहु ने देख्‌यो, अने ह़मळ, तीहया हेटाळ्‌ळा से। 10 हाव मने ना रोके, मने तीमनी पोर लागली से, जीनी सी मे तीमने खत्‌तम करु; पण तारी मे गेथी एक मोट्‌ली जाती उबजाड़ही।" 11 ता मुसो आह़फा ना भगवान यहोवा ने आहयु कीन वीन्‌ती करवा बाज ज्‌यो, "ए यहोवा, तने तारा माणहु पोर काहा रीह लागली से जीमने तु तारा सक्‌ती वाळा अने ताखत वाळा हात नी लारे मीस्‌र देस मे गेथो नीकाळ लावलो से? 12 मीस्‌री माणहु आहयु काहा केवा जोवे, के तु ईमने गलत मकसत सी, बड़ा पोर तीमने मारवा करीन, धरती नी उपर गेथा तीमने मीटाड़ देवा करीन मीस्‌र देस मे गेथा नीकाळ लावलो हतो? करीन तारी रीह ने कम कर, अने तारा माणहु नु नुकसान ना करे। 13 तारा चाकर्‌या अब्‌राहम, ईसाक, अने याकुब ने फोम कर जीमने तु आह़फा नीत ह़ाम खाय्‌न आहयु केदलो, ‘मे तमारी अवल्‌यात ने ह़रग ना तारान तेम घणी जादा करही, अने आहयु आखु देस जीमनी मे वात करलो से तमारी अवल्‌यात ने आपही के तीहया तीना हकदार्‌या जलम बणला रेहे।’"✝32:13 उबजणाय कीताप 22:16,17; 17:8 14 ता यहोवा आह़फा ना माणहु नु नुकसान करवा सी जे तीहयो केदलो तीनी सी मन फीरवी लेदो।

15 ता मुसो पासो फीरीन गवा नी बेम पट्‌टी ने हात मे लीन बड़ा पोर गेथो उतर ज्‌यो। तीहयी पट्‌टी पोर बेम धेड़ लीखलु हतु, 16 अने तीहयी बेम पट्‌टी भगवान नी बणावली हती, अने तीनी पोर जे टुचीन लीखलु हतु तीहयु भगवान नु लीखलु हतु। 17 जत्‌यार यहोसु ने माणहु नी अवाज नी कचाट ह़मळायी, ता तीहयो मुसा ने केदो, "पड़ावान्‌तां गेथी झुमायवा वाळा ह़रकी अवाज ह़मळाय।" 18 मुसो केदो, "आहयी जे अवाज से तीहयी नी ते जीकवा वाळा नी हय अने नी हारवा वाळा नी हय; मने ते गाव्‌वा नी अवाज ह़मळाय।" 19 पड़ावान्‌तां आवतेत मुसा ने तीहयु वाछड़ु अने नाचणु देखाव पड़्‌यु, ता मुसा ने रीह लागी, अने तीहयो पट्‌या ने आह़फा ना हात मे गेथो बड़ान हेटो नाखीन तोड़ नाख्‌यो। 20 ता तीहयो तीमनु बणावलु वाछड़ु ने लीन आक्‌ठु मे नाखीन धपाड़ देदो। अने तीने दळीन झीनु-झीनु कर देदो, अने तीने पाणी मे नाख देदो, अने ईस्‌रायली माणहु ने तीहयु पाणी पीवाड़ देदो।

21 ता मुसो हारुन ने केवा बाज ज्‌यो, "आहया माणहु तारी ह़ाते ह़ु करला के तु ईमने एतरा मोटा पाप मे फसाड़्‌यो?" 22 हारुन मुसा ने जपाप आप्‌यो, "ए मालीक तने रीह नी लागवा जोवे; तु ते आहया माणहु ने जाणे के आहया गलत करवा मे मन लगाड़ रेय। 23 अने तीहया मने केदा, ‘अमारी जुगु देवता बणाव जे अमारी अगळ-अगळ चाले; काहाके तीहया माणेह मुसा ने, जे आमु ने मीस्‌र देस गेथो छोड़ाय लावलो से, आमु नी जाणता के तीनु ह़ु हयु?’✝32:23 नेवताळा ना काम 7:40 24 ता मे तीमने केदो, ‘जीनी-जीनी पांह ह़ोना नु वजन हय, तीहया तीने काड लावे;’ अने जत्‌यार तीहया मने आप्‌या, मे तीने आक्‌ठु मे नाख देदो, ता आनी सी आहयु वाछड़ु बण ज्‌यु।"

25 हारुन तीहया माणहु नी रखवाळी नी कर्‌यो अने के तीहया आह़फाम ना वीरोद करन्‌या नी वच मे हाही-ठट्‌ठा करवा नी लायक बण ज्‌या। 26 तीमने छुटला देखीन मुसो पड़ावा ना झापले उबो हयो। अने केदो, "कोय यहोवा भणीन ना से तीहया मारीन्‌तां आवे।" ता आखा लेवी घोराणा ना माणहु तीनीन्‌तां एक्‌ठा हया। 27 तीहयो तीमने केदो, "ईस्‌रायली माणहु नो भगवान यहोवा आसम केय के आपणी-आपणी केड़्‌ये तलवार टांगीन पड़ावा मे फीरी-फीरीन एक-एक झापले जाय्‌न आह़फा-आह़फा ना भायु, दोस्‌तीदार्‌या, अने ह़ाते वाळा ने मारो।" 28 मुसो केदो तीनी अनसारे लेवी माणहु कर्‌या; अने तीहया दाहड़े तीन हजार माणहु नी आड़े-धेड़े मार नाख्‌या। 29 ता मुसो केदो, "तमु आज यहोवा जुगु पुंजारा ना जागा जुगु टाळला से, काहाके तमु आह़फाम ना तारा सग्‌गा भाय अने सोरा ना वीरोद मे हता। अने तीहयो आज ना दाड़े तमने बरकत आपे।"

30 बीजा दाहड़े मुसो माणहु ने केदो, "तमु घणो मोटो पाप करला से। हाव मे यहोवा ने तां उपर जही; आहयु हय सकहे के मे तमारा पाप नो पछतावो कर सकु।" 31 ता मुसो यहोवान्‌तां‌ जाय्‌न केवा बाज ज्‌यो, "गरा आय पड़े, आहया माणहु ह़ोना नो देवता बणावीन घणोत मोटो पाप करला से। 32 ते बी हाव तु ईमना पाप ने माफ कर नीता तारी लीखली कीताप मे गेथु मारु नाम काट दे।"✝32:32 भजन सहीता 69:28; परकासीतवाक्‌य 3:5 33 यहोवा मुसा ने केदो, "जे मारा वीरोद मे पाप करलु से तीनुत नाम मे मारी कीताप मे गेथु काट देही। 34 आव तु जाय्‌न तीहया माणहु ने तीहया जागे लीजा जीनी वात मे तारी ह़ाते करलो; देख, मारो ह़रगदुत तारी अगळ-अगळ चालहे। पण जे दाड़े मे डंड आपवा बाज जही, तीहया दाड़े ईमने आहया पाप नो बी डंड आपही।" 35 अने यहोवा तीहया माणहु पोर गरा मोकल्‌यो, काहाके हारुन नु बणावलु वाछड़ु ने तीहयात बणाय मांगला।