1 यहोवा भगवान मुसा ने केदो, 2 "ईस्‌रायली माणहु ने आहयु केजे के मारी जुगु भेट लावे। जेतरा आह़फाम नी मरजी सी आपवा हींडे तीमनीत पांह भेट लेजो। 3 अने जे चीज नी भेट लेवा नी से तीहयी आहयी से; मतलब ह़ोनु, चांदी, पीतळ, 4 नीळ्‌ळा, जामण्‌या अने रात्‌ला रंग ना लुगड़ा, पातळ्‌ळु सुती नु बणावलु कापड़ु, बोकड़ी ना नीम्‌बाळा, 5 रात्‌ला रंग वेर रंगली गाडरा नी खाल, सुईसो नाम नी मोट्‌ली माछली नी खाल, अने बाबळ्‌या ना लाकड़ा, 6 वीजाळु जुगु तेल, अभीसेक ना तेल जुगु अने गंदायण्‌या धुप जुगु गंदायण्‌या मसाला, 7 एपोद* अने छात्‌ये बांदवा नु कापड़ु नी जुगु सुलेमानी दगड़ो, अने लगाड़वा करीन मणी। 8 अने तीहया मारी जुगु एक चोखलो जागो बणावे के मे तीमनी वचमे रेम। 9 रेवा ना जागा ने अने तीनु आखु ह़मान ने तीहयी योजना नी अनसारे बणावजे जे मे तने देखाड़ही।

10 "बाबळ्‌या ना लाकड़ा नो एक बाक्‌सो बणावे। तीहयो ढाय हात नाम्‌बो, अने चवड़ाय अने उचाय डेड़-डेड़ हात नो रेय। 11 अने तीने चोखलु ह़ोनु वेर मोय अने बाहर पालीस करावजे। अने बाक्‌सा पोर च्‌यारो-मेर ह़ोनु नी कोर बणावजे। 12 अने ह़ोना ना च्‌यार कड़ा बणावीन तीना च्‌यारोव पाया पोर, एक ह़ोड़ बे कड़ा अने बीजी ह़ोड़ बे कड़ा लगाड़जे। 13 अळतेण बाबळ्‌या ना लाकड़ा ना डींगा बणावजे, अने तीने बी ह़ोनु वेर पालीस करावजे। 14 अने डींगा ने बाक्‌सा ना बेम ह़ोड़ ना कड़ा मे घालजे, जीनी सी तीनी वेर बाक्‌सा ने उचले। 15 तीहया डींगा बाक्‌सा ना कड़ा मेत रेय; अने तीनी गेथा अगळ नी करवा जोवे। 16 अने जे गवा नी चीट्‌ठी मे तने आपही तीने तीहयात बाक्‌सा मे मेकजे।

17 "अळतेण चोखलु ह़ोनु वेर एक पछतावा नु ढाकणु बणावजे; तीहयु ढाय हात नाम्‌बु, अने डेड़ हात चवड़ु रेवा जोवे,✝ 18 अने ह़ोनु नाखीन बे करुब* बणावीन पछतावा ना ढाकणा ना बेम मुंडे लगाड़जे। 19 एक करुब एक मुंडे अने बीजो करुब बीजा मुंडे लगाड़जे; करुबु ने अने पछतावा नु ढाकणु ने एकीत टुकड़ा वेर बणावजे। 20 तीहया करुब ना पाखड़ा उपर गेथा एवा फेलला बणे के पछतावा नु ढाकणु तीमनी सी ढकाय्‌न रेय, अने तीमना मोडा आम्‌बा-साम्‌बा अने पछतावा नु ढाकणु भणी रेय। 21 अने पछतावा नु ढाकणु ने बाक्‌सा पोर लगाड़जे; अने जे गवा नी चीट्‌ठी मे तने आपही तीने बाक्‌सा मे मेकजे। 22 मे तां तने भेट्‌या करही; अने ईस्‌रायली माणहु जुगु जेतरा हुकम तने आपवा ना रेहे, तीमना आखा ना बारा मे पछतावा ना ढाकणान उपर रीन अने तीहया करुब नी वचमे गेथो, जे गवा नी चीट्‌ठी ना बाक्‌सा पोर रेहे, तारी ह़ाते वात कर्‌या करही।

23 "अळतेण बाबळ्‌या ना लाकड़ा नी एक टेबल बणावजे; तीनी लम्‌बाय बे हात, अने चवड़ाय एक हात हय, अने उचाय डेड़ हात नी हय। 24 तीने चोखलु ह़ोनु वेर पालीस करावजे, अने तीनी च्‌यारो मेर ह़ोना नी कोर बणावजे। 25 अने तीनी च्‌यारो-मेर च्‌यार आंगळा चवड़ी पटड़ी बणावजे, अने आहयी पटड़ी नी च्‌यारो मेर ह़ोना नी एक कोर बणावजे। 26 अने ह़ोना ना च्‌यार कड़ा बणावीन टेबल ना तीहया खुणा मे लगाड़जे जे तीना च्‌यारो पाया मे रेहे। 27 तीहया कड़ा कोर नी ह़ातेत रेवा जोवे, जीनी सी टेबल ने उचलवा करीन डींगा ने मजबुती जड़ सके। 28 डींगा ने बाबळ्‌या ना लाकड़ा वेर बणावीन ह़ोनु वेर पालीस करावजे। अने टेबल तीमनीत वेर उचले। 29 अने तु धुप जुगु परात अने धुप नु ठाहरु, अने मग्‌गा अने रेचव्‌वा ना कटवरा, आखा चोखलु ह़ोनु ना बणावजे। 30 अने तु टेबल पोर मारी अगळ भेट ना रोट्‌ला सदा मेक्‌या करजे।✝

31 "अळतेण चोखलु ह़ोना नो एक दीवो मेकवा नी दीवलाय बणावजे। ह़ोनु नखाड़ीन तीहयी दीवा मेकवा नी दीवलाय पाञा नी डंडी भेळ बणावजे; तीने फुल ह़रकु, गाठ अने फुल, आखु एकीत टुकड़ा नु बणावजे; 32 अने तीना खुणा मे गेथा छो डाळ्‌या नीकळला रेहे, तीन डाळ्‌या ते दीवो मेकवा ना खुटा नी एक ह़ोड़ नीकळला रेहे, अने तीन डाळ्‌या बीजी धेड़े नीकळला रेहे; 33 एक-एक डाळ्‌ये बदाम ना फुल ने तेम तीन-तीन फुल ह़रकु, एक-एक गाठ, अने एक-एक फुल रेवा जोवे; दीवो मेकवा नी दीवलाय मे गेथा पुरा छोव डाळ्‌या आसमेत रेवा जोवे; 34 अने दीवो मेकवा नी दीवलाय नी डंडी मे बदाम ना फुल ह़रका, च्‌यार फुलुन तेवा आह़फा-आह़फाम नी गाठ अने फुल भेळ रेवा जोवे; 35 अने दीवो मेकवा ना खुटे गेथा नीकळला पुरा छोव डाळ्‌या मे गेथा बे-बे डाळ्‌यान हेटी एक-एक गाठ रेवा जोवे, तीहयी गाठ अने दीवो मेकवा नो खुटो एकीत चीज वेर बणली रेवा जोवे। 36 तीनी गाठ अने डाळ्‌या, आखु दीवो मेकवा ना खुटा भेळ एकीत टुकड़ा ना रेवा जोवे, चोखलु ह़ोनु नखाड़ीन पुरो दीवो मेकवा नो खुटो एकीत टुकड़ा नो बणावजे। 37 अने ह़ात दीवा बणावजे; अने दीवा ने धपाड़जे के तीहया दीवो मेकवा ना खुटा अगळ वीजाळु करे। 38 तीना चीमटा अने थाळी आखु चोखलु ह़ोनु नु रेवा जोवे। 39 तीहयु आखु आहयु ह़मान भेळ चोवतीस कीलो नी आड़े-धेड़े चोखलु ह़ोनु ना बणे। 40 अने चेतीन रीन आहयु आखु ह़मान ने तीनीन तेमेत बणावजे, जे तने मे आहया बड़ा पोर देखाड़लो से।✝