1 "अळतेण धुप धपाड़वा करीन बाबळ्‌या ना लाकड़ा नी वेदी बणावजे। 2 तीनी लम्‌बाय एक हात अने चवड़ाय एक हात नी रेवा जोवे, तीहयी च्‌यार खुट्‌याण रेवा जोवे, अने तीनी उचाय बे हात नी रेवा जोवे, अने तीना ह़ींगड़ा तीहयात टुकड़ा वेर बणावे। 3 अने वेदी ना उप्‌पर वाळा ढाकणा, अने तीनी च्‌यारो मेर नी धेड़े वाळु ने अने ह़ींगड़ा ने चोखलु ह़ोनु वेर पालीस करजे, अने तीनी च्‌यारो मेर ह़ोनु नी एक कोर बणावजे। 4 अने तीनी कोर तळे तीनी आम्‌बा-साम्‌बा ना बेम पल्‌ला पोर ह़ोना ना बे-बे कड़ा बणावीन तीनी बेम धेड़ लगाड़जे, तीहया वेदी ने उचलवा ना डींगा ना खाचा ना कामे लागहे। 5 डींगा ने बाबळ्‌या ना लाकड़ा ना बणावीन तीने ह़ोनु वेर पालीस करजे। 6 अने तु तीने तीहया पड़दा नी अगळ मेकजे जे गवा नी चीट्‌ठी ना बाक्‌सा नी अगळ से, मतलब पछतावा नु ढाकणु नी अगळ जे गवा नी चीट्‌ठीन उपर से, तांत मे तने भेट्‌या करही। 7 अने तीहयीत वेदी पोर हारुन वारु गंदायण्‌यान धुप धपाड़्‌या करे; अने दाड़ीक ह़वारे जत्‌यार तीहयो दीवा ने वारु करे ता तीहयो धुप धपाड़े, 8 अने ह़ांत्‌ली टेमे जत्‌यार हारुन दीवो धपाड़े ता धुप धपाड़्‌या करे, आहयु धुप यहोवा अगळ तमारी पीड़ी सी पीड़ी तक हमेसा धपाड़्‌या करे। 9 तीहयी वेदी पोर तमु बीजी भातीन धुप नी धपाड़जो, अने नी तीनी पोर अनबादा अने नी होम बादा चड़ावजे; अने नी तीनी पोर पीयाला नी बादा चड़ावजे। 10 हारुन साल मे एक वार आना ह़ींगड़ा पोर पछतावो करे; अने तमारी पीड़ी सी पीड़ी साल मे एक वार पछतावा नी पाप नी बादा ना लोय वेर आनी पोर पछतावो करवा जोवे; आहयु यहोवा जुगु आखा गेथु चोखु से।"

11 ता यहोवा मुसा ने केदो, 12 "जत्‌यार तु ईस्‌रायली माणहु नी गीनती करवा बाज जाय, ता गणवा नी टेमे जीमनी गीनती हयी हय तीहया आह़फा-आह़फाम ना जीव नी करते यहोवा ने पछतावा नी कीमत आपे, जीनी सी जत्‌यार तु तीमनी गीनती करवा बाज र्‌यो हय तीहयी टेमे कानी बी गरा तीमनी पोर नी आय पड़े। 13 जेतरा माणहु ने गण देय तीहया चोखला जागा ना तोल नी अनसारे आदो सीक्‌को* आपे, यहोवा नी भेट आदो सीक्‌को रेवा जोवे।✝ 14 वीह साल ना नीता तीनी गेथा वदु उमर ना जेतरा गीणाय जाय तीमनी मे गेथा एक-एक जणो यहोवा जुगु भेट आपे। 15 जत्‌यार तमु आह़फाम ना जीव ना पछतावा जुगु यहोवा ना लेदे भेट आपे, ता नी ते पोमत्‌ला माणहु आदा सीक्‌का गेथु वदु आपे; अने नी गरीब माणहु तीनी गेथु कम आपे। 16 अने तु ईस्‌रायली पांह गेथो पछतावा नी कीमत लीन भगवान नी हजुरी ना तम्‌बु मे कामे लगाड़जे; जीनी सी तीहयो पय्‌हो यहोवा भगवान अगळ ईस्‌रायली नी फोम नी सेलाणी ठेरे, अने तीमना जीव नो पछतावो बी रेवा जोवे।"

17 यहोवा मुसा ने केदो, 18 "तु हातु-पोगु धोव्‌वा करीन एक मोट्‌लो तपलो, अने तीनो पायो बी पीतळ नो बणावजे। तीने भगवान नी हजुरी ना तम्‌बु नी वेदी नी वचमे मेकीन तीनी मे पाणी भर देजे;✝ 19 अने तीनी मे हारुन अने तीना सोरा आह़फा-आह़फाम ना हातु पोगु धोया करे। 20 जत्‌यार-जत्‌यार तीहया मेल-मीलाप वाळा तम्‌बु मे जाय तत्‌यार-तत्‌यार तीहया हातु-पोगु पाणी वेर धोवे, नीता मर जहे; अने जत्‌यार-जत्‌यार तीहया वेदीन्‌तां सेवा-चाकरी करवा, मतलब यहोवा भगवान जुगु हवन धपाड़वा करीन आवे तत्‌यार-तत्‌यार तीहया हातु-पोगु धोवे, नीता तीहया मर जहे। 21 आहयी हारुन अने तीनी पीड़ी सी पीड़ी तक नी अवल्‌यात जुगु जलम नी रीती ठेरे।"

22 अळतेण यहोवा मुसा ने केदो, 23 "तु वारु सी वारु गंदायण्‌यो मसालो लेजे, मतलब चोखला जागा ना सेकेल नी अनसारे पांच ह़ो सेकेल* आह़फोत नीकळलो गंदायण्‌यो रोह, अने तीनो आदो, मतलब ढाय ह़ो सेकेल* वारु गंदायण्‌यो मसाला नो पोपड़ो, अने ढाय ह़ो सेकेल वारु गंदायण्‌यो अगर मसालो, 24 अने पांच ह़ो सेकेल तजपान्‌टा, अने एक हीन* जेतुन नु तेल लीन 25 तीमनी पांह अभीसेक नु अभीसेक नु तेल, मतलब वारु गंदाय तीहयी रीती सी तीयार करलु वारु गंदायण्‌यु तेल बणावजे; आहयु अभीसेक नु चोखलु तेल ठेरे। 26 अने तीनी वेर भगवान नी हजुरी ना तम्‌बु ने, अने गवा नी चीट्‌ठी ना बाक्‌सा ने, 27 अने आखु ह़मान भेळ टेबल ने, अने ह़मान भेळ दीवो मेकवा ना खुटा ने, अने धुप वेदी ने, 28 अने आखु ह़मान भेळ होम बादा नी वेदी ने, अने पाया भेळ मोट्‌ला तपला ने ह़जाड़जे, 29 अने तीमने चोखु करजे, जीनी सी तीहया आखु गेथा चोखा ठेरे; अने जे कंय तीमने ठोकाय जहे तीहयु बी चोखु हय जहे। 30 अळतेण हारुन ने तीना सोरा भेळ अभीसेक करजे, अने आहयी रीते तीमने मारी जुगु पुंजारा नु काम करवा करीन चोखा करजे। 31 अने ईस्‌रायली माणहु ने मारो आहयो हुकम ह़मळावजे, ‘आहयु तेल तमारी पीड़ी सी पीड़ी तक मारी जुगु चोखलु अभीसेक नु तेल रेहे। 32 आहयु काना बी माणेह ना डील पोर नी नाखजे, अने कंय बी भेसकीन आनीन तेवु बीजु तेल नी बणावजे; आहयु चोखलु से, आहयु तमारी जुगु बी चोखलु रेहे। 33 जे कोय आनीन तेवु कंय भेसकीन बणावे, नीता जे कोय आनी मे गेथु थोड़ुक बीजी जाती वाळा ने चोपड़े, तीने आह़फा ना माणहु मे गेथो टाळ देहे।’"

34 अळतेण यहोवा मुसा ने केदो, "बोल, नखी, अने कुं‌दरु नाम ना, आहया वारु गंदायण्‌या मसाला चोखला लोबान भेळ ली लेजे, आहयु आखु बराबर तोल ना रेवा जोवे, 35 अने आमनो धुप मतलब खारलु मीठु भेसकीन वारु गंदाय तीहयी रीती नी अनसारे वारलु अने चोखलु धुप बणावजे। 36 अळतेण तीनी मे गेथु थोड़ुक दळीन झीनु कर देजे, ता तीनी मे गेथु थोड़ुक मेल-मीलाप वाळा तम्‌बु मे गवा नी चीट्‌ठी अगळ, जां मे तने मळ्‌या करही, मेकजे; तीहयु तमारी जुगु आखा गेथु चोखलु केवायहे। 37 जे धुप तु बणावही, तीनीन तेवु तमु कंय भेसकीन तमारी जुगु नी बणावजो; तीहयु तमारी अगळ यहोवा जुगु चोखलु रेहे। 38 जे कोय ह़ुंगवा करीन तीनीन तेवु कंय बी बणावे तीने आह़फा ना माणहु मे गेथो टाळ देहे।"✝