नीरगमन 26

भगवान नी हजुरी नु तम्‌बु

1 "अळतेण रेवा ना जागा जुगु दह पड़दा बणावजे; आहया पातळ्‌ळा सुत वेर बणावला नीळ्‌ळा, जामण्‌या अने रात्‌ला रंग ना कापड़ु ना रेय। अने तीमनी पोर वारु रीते करुब ना फुटक्‌या बणावीन ह़जाड़जे। 2 एक-एक पड़दा नी लम्‌बाय अट्‌ठावीस हात अने चवड़ाय‌ च्‌यार हात नी रेवा जोवे: आखा पड़दा एकीत माप ना रेवा जोवे। 3 पांच पड़दा एक-बीजा ह़ाते जोड़ायला रेवा जोवे; अने जे बीजा पांच पड़दा रेहे तीहया बी एक-बीजा ह़ाते जोड़ायला रेवा जोवे। 4 अने जां आहया बेम पड़दा जोड़हे तां नी बेम कोर पोर नीळ्‌ळा-नीळ्‌ळा छेवड़ा लगाड़जे। 5 बेम कोर मे पचाह-पचाह छेवड़ा एवा लगाड़जे के तीहया आम्‌बा-साम्‌बा हय। 6 अने ह़ोना ना पचाह हेकड़ा बणावजे; अने जोड़ायला पड़दा ने आहया हेकड़ा वेर जोड़ देजे जीनी सी पुरो रेवा नो जागो एक बण जाय।

7 "अळतेण रेवा ना जागा नी उपर, तम्‌बु जुगु बोकड़ी ना नीम्‌बाळा ना ग्‌यारे पड़दा बणावजे। 8 एक-एक पड़दा नी लम्‌बाय तीस हात अने चवड़ाय च्‌यार हात नी रेवा जोवे; पुरा ग्‌यारे पड़दा एकीत माप ना रेवा जोवे। 9 अने पांच पड़दा अलग अने छो पड़दा अलग जोड़ावजे, अने छटवा पड़दा ने तम्‌बुन अगळ वाळीन डबल कर देजे। 10 अने तु पचाह हेकड़ा तीहया पड़दा ना कोर मे जे बाहर गेथा भेसकहे अने पचाहेत हेकड़ा बीजी ह़ोड़ ना पड़दा नी कोर मे जे बाहर गेथा भेसकहे बणावजे। 11 अने पीतळ ना पचाह हेकड़ा बणावजे, अने हेकड़ा ने छेवड़ा मे लगाड़ीन तम्‌बु ने आसम जोड़ावजे के मळीन एक हय जाय। 12 तम्‌बु ना पड़दा नो बचलो वाटो, आदो पड़दो, जे बच जाय, तीहयो रेवा ना जागा नी पाछली ह़ोड़ टंगायलो रेहे। 13 अने तम्‌बु ना पड़दा नी लम्‌बाय मे गेथा एक हातेक एथली धेड़, अने एक हातेक बीजी धेड़ रेवा ना जागा ने ढाकवा करीन तीनी बेम धेड़े टंगायला रेवा जोवे। 14 अळतेण तम्‌बु जुगु रात्‌ला रंग वेर रंगली गाडरा नी खाल नु एक ओडवा नु अने तीनी उपर सुईसो नाम नी मोट्‌ली माछली नी खाल नु बी एक ओडवा नु बणावजे।

15 "अळतेण रेवा ना जागा ने उबा करवा करीन बाबळ्‌या ना लाकड़ा ना चोवखट बणावजे। 16 एक-एक चोवखट नी लम्‌बाय दह हात अने चवड़ाय डेड़ हात नी रेवा जोवे। 17 एक-एक चोवखट मे एक-बीजा ह़ाते जोड़ायला बे-बे खाचा रेवा जोवे; रेवा ना जागा ना आखा चोवखट ने आहयीत भात्‌ये बणावजे। 18 रेवा ना जागा जुगु जे चोवखट तु बणावही तीमनी मे गेथा वीह चोवखट ते दखणाव नी ह़ोड़ नी लेदे रेवा जोवे; 19 अने वीह चोवखट नी हेटा चांदी ना चाळीह पाया बणावजे, मतलब एक-एक चोवखट नी हेटा तीना खाचा नी जुगु बे-बे पाया। 20 रेवा ना जागा नी बीजी ह़ोड़, मतलब धुराव नी ह़ोड़ नी जुगु वीह चोवखट बणावजे; 21 अने तीमनी जुगु चांदी ना चाळीह पाया बणावजे, मतलब एक-एक चोवखट तळे बे-बे पाया रेवा जोवे। 22 रेवा ना जागा नी पाछली ह़ोड़, मतलब बुडणली ह़ोड़ नी जुगु छो चोवखट बणावजे। 23 अने पाछला वाटा मे रेवा ना जागा ना खुणा जुगु बे चोवखट बणावजे; 24 आहया हेटा गेथा बे-बे भाग ना रेवा जोवे, अने बेम भाग उप्‌पर ना मुंडे तक एक-एक कड़ा मे भेसकवा जोवे; बेम चोवखट नो आहयोत रुप रेवा जोवे; आहया बेम खुणा जुगु रेवा जोवे। 25 अने आंठ चोवखट रेवा जोवे, अने तीमना चांदी ना ह़ोळ्‌ळे पाया रेवा जोवे; मतलब एक-एक चोवखट तळे बे-बे पाया रेवा जोवे।

26 "अळतेण बाबळ्‌या ना लाकड़ा ना डांडा बणावजे, मतलब रेवा ना जागा जुगु नी एक ह़ोड़ ना चोवखट नी जुगु पांच, 27 अने रेवा ना जागा नी बीजी ह़ोड़ ना चोवखट नी जुगु पांच डांडा, अने रेवा ना जागा नो जे हीस्‌सो बुडणली ह़ोड़ पाछली ह़ोड़ रेहे, तीमनी जुगु पांच डांडा बणावजे। 28 वचे वाळो डांडो जे चोवखट नी वच मे रेहे तीहयो तम्‌बु ना एक मुंडा भणी गेथो बीजा मुंडा भणीन तक पुगवा जोवे। 29 अळतेण चोवखट ने ह़ोनु वेर पालीस करावजे, अने तीमना कड़ा ने जे घेरा ना काम मे आवहे तीमने बी ह़ोनु वेर पालीस करावजे; अने डांडा ने बी ह़ोनु वेर पालीस करावजे। 30 अने रेवा ना जागा ना तम्‌बु ने आसम उबो करजे जेम आहया बड़ा तने देखाड़लु से।

31 "अळतेण नीळ्‌ळा, जामण्‌या अने रात्‌ला रंग ना अने पातळ्‌ळु सुती वेर बणावलु कापड़ु नो एक वचे वाळो पड़दो बणावजे; तीनी पोर वारु गुथीन करुब ना फुटक्‌या बणावजे। 32 अने तीने ह़ोनु वेर मुड़ला बाबळ्‌या ना च्‌यार खम्‌बा पोर टांगजे, ईमना आकड़ा ह़ोना ना रेवा जोवे, अने आहया चांदी ना च्‌यार पाया पोर उबा रेवा जोवे। 33 अने वचे वाळा पड़दा ने आकड़ान हेटा टांगीन, तीनी आडळ गवा नी चीट्‌ठी नो बाक्‌सो मोय लीज्‌जे, आहयी रीते तीहयो वचे वाळो पड़दो तमारी जुगु चोखला जागा ने आखा गेथा चोखला जागा ने अलग करीन राखहे।✝26:33 ईब्‌रानीयो 6:19; 9:3-5 34 अळतेण आखा गेथा चोखला जागा मे गवा नी चीट्‌ठी ना बाक्‌सा उपर पछतावा नु ढाकणु ने मेकजे। 35 अने तीहया पड़दान बाहर रेवा ना जागान दखणाव भणीन टेबल मेकजे; अने तीनी धुराव भणीन टेबल अगळ दीवो मेकवा ना खुटा ने मेकजे। 36 अळतेण तम्‌बु नु झापलु जुगु नीळ्‌ळु, जामण्‌यु अने रात्‌ला रंग नु अने पातळ्‌ळु सुती नु बणावलु कापड़ु नो कड़ाय बणावलो एक पड़दो बणावजे। 37 अने आहया पड़दा जुगु बाबळ्‌या ना पांच खम्‌बा बणावजे, अने तीमने ह़ोना नी पालीस चड़ावजे, तीमना छल्‌ला ह़ोना ना रेवा जोवे, अने तीमनी जुगु पीतळ ना पांच पाञा बणावजे।